ជំនួបអ្នកនិពន្ធលើកដំបូង អ្នកនិពន្ធ EMO និយាយពីរឿង "អ្នកនិពន្ធអត់ល្បី ល្បីតែអ្នកចម្រៀង"!

2022-11-21 09:28:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមអ្នកនិពន្ធបទចម្រៀងល្បីៗជាច្រើន បានធ្វើការជួបជុំគ្នាលើកដំបូងកាលពីចុងសប្ដាហ៍នេះ ស្របពេលដែល អ្នកនិពន្ធល្បីឈ្មោះម្នាក់ គឺលោក EMO បានសារសព្ទលើកដំបូងអំពីរឿង "អ្នកនិពន្ធអត់ល្បី ល្បីតែអ្នកចម្រៀង"។

នៅក្នុងបទសម្ភាសន៍ផ្ទាល់ជាមួយអ្នកសារព័ត៌មាន EMO បានបង្ហើបឲ្យដឹងថា អ្នកនិពន្ធចម្រៀងម្នាក់ មានការលំបាកច្រើន ទន្ទឹមគ្នានោះផលដែលបានមកក៏មិនសូវសមនឹងការខិតខំថែមទៀត។ ដូច្នេះហើយ សូម្បីតែលោកខ្លួនឯងធ្លាប់មានគំនិតចង់បោះបង់ថែមទៀត។ ការត្អូញត្អែររបស់អ្នកនិពន្ធឯករាជ្យរូបនេះ ក៏ទន្ទឹមគេមើលឃើញថា អ្នកនិពន្ធដែលជាអ្នកជួយឲ្យអ្នកចម្រៀងល្បី ប៉ុន្តែខ្លួនឯងត្រូវកប់នៅក្រោយវាំងននខ្មៅ និងស្ទើរតែគ្មានអ្នកស្គាល់សម្រាប់អ្នកនិពន្ធខ្លះ។

EMO បានទទួលស្គាល់លើបញ្ហានេះ ក្នុងនោះលោលលើកឡើងថា បញ្ហាគឺមានពាក់ព័ន្ធមួយផ្នែកនឹងអ្នកចម្រៀងតែម្ដង។ លោកថ្លែងថា "អ្នកចម្រៀងពេលខ្លះយកទៅច្រៀង គឺអត់សូវលើកពីអ្នកនិពន្ធ ពេលខ្លះគាត់យកចម្រៀងចេញពីស្ទូឌីយ៉ូមួយចឹង គាត់អត់សូវឲ្យតម្លៃអ្នកនិពន្ធ គាត់ច្រៀងកើបលុយតែឯងអីចឹងទៅ ខ្ញុំនិយាយតែអ្នកចម្រៀងខ្លះ មិនមែនទាំងអស់ទេ"។

ស្ដារស្ថានភាពនេះ អ្នកនិពន្ធរូបនេះ បញ្ជាក់ថា បច្ចុប្បន្នលោកផ្ដោតមួយផ្នែកលើការប្រូម៉ូតខ្លួនឯង ក៏ដូចជាលើកកម្ពស់អ្នកនិពន្ធដូចគ្នាឯទៀតតាមរយៈបណ្ដាញសង្គម។ មួយផ្នែកទៀត គឺការចេញមុខនៅក្នុងកម្មវិធីនានា ជាក់ស្ដែងលោក និងអ្នកនិពន្ធច្រើននាក់ទៀតមានដូចជា Tho Meet ជាដើម ត្រូវបានអញ្ជើញចូលរួមក្នុងកម្មវិធីជួបជុំអ្នកនិពន្ធរៀបចំដោយ The Mix of Sharing ក្រុមហ៊ុនឯកទេសខាងផ្គត់ផ្គង់ឧបករណ៍ភ្លេងសម្រាប់បម្រើឲ្យស្ទូឌីយ៉ូ។

លោកថា នេះជាការជួបជុំយ៉ាងកម្ររបស់អ្នកនិពន្ធគ្នាឯង ហើយលោកដែលជាភ្ញៀវ VIP មួយរូបរបស់ក្រុមហ៊ុនខាងលើ ក៏ជាអ្នកជួយរៀបចំសម្របសម្រួលអ្នកនិពន្ធមកជួបជុំគ្នាដែរ។ លោកថា នេះជាឱកាសល្អ ដែលអ្នកនិពន្ធអាចជួបគ្នា និងឱកាសបង្ហាញខ្លួនឯងទៅមហាជន ខណៈកន្លងមក អ្នកនិពន្ធតែងតែនៅពីក្រោយវាំងននខ្មៅ។ មិនត្រឹមប៉ុណ្ណោះ លោកក៏ចង់ឲ្យមិត្តអ្នកនិពន្ធទាំងអស់បានដឹងខ្លះៗពី The Mix of Sharing ផង។

តាមលោក គ្រី សុខលៀង ជា Founder បានឲ្យដឹងថា The Mix of Sharing គឺក្រុមហ៊ុនឯកទេសខាងផ្គត់ផ្គង់ឧបករណ៍ភ្លេងប្រើនៅក្នុងស្ទូឌីយូ។ ចាប់ផ្ដើមនៅ ២០១៩ ក្រុមហ៊ុននេះ ត្រឹមជាអាជីវកម្មតាមផ្ទះប៉ុណ្ណោះ តែបច្ចុប្បន្នបានក្លាយជាក្រុមហ៊ុនធំ១ និងទើបតែបានធ្វើកិច្ចសហការជាមួយដៃគូស្ថិតនៅក្នុងតំបន់អាស៊ីអាគ្នេយ៍ផ្គត់ផ្គង់ឧបករណ៍ភ្លេងម៉ាក Proel នៅកម្ពុជាថែមទៀត។

លោក គ្រី សុខលៀង ជា Founder របស់ The Mix of Sharing

គ្រី សុខលៀង លើកឡើងថា សិល្បៈតន្ត្រីក្នុងស្រុកបាន និងកំពុងរីកច្រើនស្ទើរប្រហាក់ប្រហែលនឹងប្រទេសជិតខាង ហើយលោកក៏ចង់ក្លាយជាចំណែក១ ក្នុងការធ្វើឲ្យវិស័យនេះកាន់តែរីកចម្រើនមួយកម្រិតទៀត តាមរយៈផ្គត់ផ្គង់ឧបករណ៍ភ្លេងគុណភាពខ្ពស់ បច្ចេកវិទ្យារបស់អឺរ៉ុប មានអាឡឺម៉ង់ អ៊ីតាលី ជាដើម។ លោកបន្តទៀតថា សិល្បៈតន្ត្រីមួយដែលមានការទទួលស្គាល់ជាសកល ត្រូវអ្នកអ្នកនិពន្ធល្អ អ្នកចម្រៀងមានទេពកោសល្យ បូករួមនឹងឧបករណ៍ភ្លេងល្អ គុណភាពខ្ពស់៕