លោក អ៊ុំ សយពិនណារ៉ុង តារា​សម្ដែង​ និង​ ម៉ូដែល​ក្នុង​ក្រុម Hamsa Super Model ដែល​បាន​ចេញ​ទៅ​ប្រកួត​កម្មវិធី​មួយStar Hunk International Contest 2014 នៅ​ប្រទេស សិង្ហបុរី កាល​ពី​ពាក់​កណ្ដាល​ខែ វិច្ឆិកា ​កន្លង​ទៅ ពេល​នេះ​​ទទួល​បាន​​ដូច​បំណង​ហើយ ដោយ​លោក​បាន​ទទួលបាន​​ពាន​ជា " តារា​​មុខ​មាន​​មន្ត​ស្នេហ៍"។

Star Hunk International Contest 2014 ដែល​បាន​ធ្វើ​នៅ​ប្រទេស សិង្ហបុរី បាន​បញ្ចប់​ហើយ​កាល​ពី​ចុង​សប្ដាហ៍​មុន​នេះ បន្ទាប់​ពី​បាន​ដំណើរ​ការ​ប្រកួត​ពី​ថ្ងៃ​ទី ១៣ រហូត​ដល់​ថ្ងៃ​ទី ២៣ ខែ វិច្ឆិកា ឆ្នាំ ២០១៤។ កម្មវិធី​នេះ​មាន​ប្រទេស​ជុំវិញ​ពិភពលោក​​ចំនួន ១៧ ចូល​រួម ហើយ​បេក្ខជន​​​សរុប​មាន​ចំនួន ៣៣ នាក់។ លក្ខខ័ណ្ឌ​នៃ​កម្មវិធី​ប្រទេស​មួយ​អាច​បញ្ជូន​តារា​របស់​ខ្លួន​​ទៅ​ចូល​រួម​មិន​ឲ្យ​លើស​ពី ៣ នាក់​ឡើយ។

សម្រាប់​ប្រទេស​កម្ពុជា​បាន​បញ្ជូន​តារា​តែ​ម្នាក់​​ប៉ុណ្ណោះ​ទៅ​ចូល​រួម​ប្រកួត​កម្មវិធី​នេះ​ គឺ លោក អ៊ុំ សយពិនណារ៉ុង ហើយ​ជា​លទ្ធផល​តារា​រូប​នេះ​បាន​ជាប់​ជា "តារា​មុខ​មាន​មន្ត​ស្នេហ៍"។ នេះ​បើ​តាម​ការ​​ឲ្យ​ដឹង​ពី ​លោក មាស ណារ៉ូ អ្នក​គ្រប់គ្រង Hamsa Entertainment Cambodia និង​ជា​ប្រធាន ក្រុម​ម៉ូដែល Hamsa Super Model ដែល​ជា​អ្នក​បញ្ជូន​តារា​នេះ​ទៅ​ចូលរួម។

លោក មាស ណារ៉ូ បាន​​រៀបរាប់​ឲ្យ​ដឹង​ថា ប្រទេស​ដែល​ជាប់​ក្នុង​កម្មវិធី Star Hunk International Contest 2014 លេខ១ បាន​ទៅ​លើ​ប្រទេស ហ្វីលីពីន លេខ ២ បាន​ទៅ​លើ​ប្រទេស ម៉ុងហ្គោលី លេខ៣ បាន​ទៅ​ប្រទេស ម៉ាឡេស៊ី ។ ក្រៅ​ពី​​ពី​នេះ Star Hunk International មាន​ពាន​ពីរ​ផ្នែក​​ទៀត TOP5 និង TOP12។

ពាន TOP5 មាន​តែ ២ ប្រទេស​ប៉ុណ្ណោះ គឺ សាំងហ្គាពួរ និង ថៃ។

ចំណែក​ឯ​ពាន TOP12 ឬ Special Awards (TOP12) មាន​ប្រទេស​ទាំង​អស់ ៦ ក្នុង​នោះ​មាន ឥណ្ឌូណេស៊ី ២ នាក់ ហ្វីលីពីន ១ នាក់ កម្ពុជា​​ ១ នាក់ តៃវ៉ាន់ ១ ម្នាក់ មីយ៉ាន់ម៉ា ១ នាក់  និង ប៉ាគីស្ថាន ១ នាក់។

ចុង​ឆ្នាំ ២០១៥​ នេះ ក្រៅ​ពី ​លោក អ៊ុំ សយពិនណារ៉ុង មាន​​តារា​ម៉ូដែល​កម្ពុជា ៣នាក់​​ផ្សេង​ទៀត​បាន​ទទួល​ពាន​មក​ពី​ក្រៅ​ប្រទេស​ដូច​គ្នា ក្នុង​នោះ កញ្ញា ទូច មិនាថ កញ្ញា នូ ទឹម​ស្រី​នៀត និង លោក យិត មាសឧស្សាហ៏ ហៅ Edwin ។

កញ្ញា ទូច មិនាថ បាន​ទទួល​ពាន ជា​តារា​រាង​ស្អាត ពី​ការ​ប្រកួត​កម្មវិធី Miss Chinese Cosmo Beauty Pageant Southeast Asia Contest 2014 នៅ​ប្រទេស ម៉ាឡេស៊ី កាល​ពី​ពាក់​កណ្ដាល​ខែ កក្កដា ឆ្នាំ ២០១៤។

ចំណែក កញ្ញា នូ ទឹម​ស្រី​នៀត ក៏​ធ្លាប់​បាន​ឈ្នះ​ជយលាភី​ផ្នែក​ប្រជាប្រិយ (Miss Popular Vote Award) ក្នុង​កម្មវិធី Miss Grand International ពី​ប្រទេស​ថៃ កាល​ពី​ដើម​ខែ តុលា ឆ្នាំ ២០១៤​ផង​ដែរ។

រីឯ លោក យិត មាសឧស្សាហ៏ ហៅ Edwin បាន​ជាប់​ពានរង្វាន់​តារា​ញញឹម​ស្រស់ ជាង​គេ “ Mr. Smiley Award in Mister Asia Contest 2014 ” នៅ​ទី​ក្រុង​ហុង​កុង​​កាល​ពី​ចុង​ខែ​កញ្ញា ឆ្នាំ ២០១៤ ។

លោក មាស ណារ៉ូ​បាន​លើក​ឡើង​ថា ជា​មោទនភាព​ថ្មី​មួយ​របស់​ក្រុម​ម៉ូដែល Hamsa Super Model ដែល​បាន​ទទួល​ពាន​ពី​កម្មវិធី​នេះ។ ជា​មួយ​គ្នា​​នោះ​លោក​​ប្រាប់​ថា នឹង​ខិតខំ​ដឹក​នាំ​ក្រុម​ម៉ូដែល របស់​លោក​ឲ្យ​កាន់​តែ​ប្រសើរ​ជាង​​នេះ​​ថែម​ទៀត ជា​ពិសេស​នោះ​ព្យាយាម​ទាក់​ទង់ កម្មវិធី​ប្រកួត​នៅ​ក្រៅ​ប្រទេស​ឲ្យ​បាន​ច្រើន ដើម្បី​ឲ្យ​តារា​កម្ពុជា​មាន​ឱកាស​បាន​ទៅ​ចូល​រួម​ប្រកួត៕

អានអត្ថបទ៖ តារា​ថ្មីៗ Cute Cute ដល់​ហើយ កម្មវិធី​យប់មិញ អានអត្ថបទ៖ ប៊ុត សីហា សុំ​ទោស​ទស្សនិកជន​រឿង​ពាក់​ស្បែក​ជើង​ថត​ជា​មួយ​ព្រះសង្ឃ!

អត្ថបទ៖ ខុត សីហា