BTS គឺជាក្រុមចម្រៀងដ៏មានឥទ្ធិពលអស្ចារ្យមួយនៅក្នុងវិស័យតន្ត្រីលំដាប់ពិភពលោក នាប៉ុន្មានឆ្នាំចុងក្រោយនេះ។ ភាពជោគជ័យរបស់ ក្រុមនេះបានបើកឱកាសឱ្យតន្ត្រី K-Pop ចូលទីផ្សារអន្តរជាតិ ជាពិសេសទីផ្សារអឺរ៉ុប-អាមេរិក។

នៅឆ្នាំ ២០២២ BTS បានប្រកាសផ្អាកខ្លួនមួយរយៈ ដើម្បីសម្រាក និងធ្វើការលើគម្រោងផ្ទាល់ខ្លួន។ ចាប់តាំងពីពេលនោះមក សមាជិក BTS បានប្តូរវេនគ្នាចេញស្នាដៃទោល ដោយបើកទំព័រថ្មីក្នុងអាជីពរបស់ពួកគេ ហើយទោះបីចេញមុខតែឯងក៏ឥទ្ធិពលពួកគេនៅតែមិនអន់ដែរ រួមមាន Jungkook ដែល​ជា​សមាជិកពៅដែរ។

សមាជិកវ័យក្មេងជាងគេរបស់ BTS រូបនេះទទួលបានសមិទ្ធិផលដ៏អស្ចារ្យមិនត្រឹមតែក្នុងអំឡុងពេលរបស់លោកជាមួយក្រុមប៉ុណ្ណោះទេ ប៉ុន្តែក្រោយចេញបទចម្រៀងទោល Jungkook កាន់តែលេចធ្លោថែមមួយកម្រិត។

ទោះបីជាមានអាយុត្រឹម ២៦ ឆ្នាំក៏ដោយ ប៉ុន្តែ Jungkook បានចូលប្រឡូកក្នុងវិស័យសិល្បៈអស់រយៈពេល ១០ ឆ្នាំមកហើយ។ ការចាប់ផ្ដើមអាជីពទាំងវ័យក្មេង ប៉ុន្តែផ្អែកលើភាពប៉ិនប្រសប់ និងភាពវៃឆ្លាត លោកត្រូវបានគេព្យាករណ៍ថាជាកោសិកា "មិនធម្មតា" ឡើយប្រចាំ K-Pop នាពេលអនាគត។

ដើរលើវិថីសិល្បៈ ពិភពភ្លើងពណ៌ចាំងមកលើខ្លួនជា​ច្រើនឆ្នាំមក​នេះ Jungkook ច្បាស់ជាជួបជាមួយនឹង​រឿងជា​ច្រើន ប៉ុន្តែលោកនៅតែជម្នះអ្វីៗគ្រប់យ៉ាង ហើយបានក្លាយជាតារា K-Pop ដែលជោគជ័យបំផុតក្នុងប្រវត្តិសាស្ត្រ។ ពេលបង្ហាញខ្លួនជាមួយ BTS ក្នុងឆ្នាំ ២០១៣ Jungkook ទើបមានអាយុត្រឹមតែ ១៥ ឆ្នាំក្នុងនាមជាអ្នកចម្រៀង រ៉េប និងអ្នករាំសំខាន់របស់ក្រុម "Golden Maknae" ទទួលបានការចាប់អារម្មណ៍យ៉ាងខ្លាំងដោយសារតែទេពកោសល្យ និងរូបរាងសង្ហារបស់គាត់។

សមាជិកពៅរបស់ BTS បានចេញស្នាដៃទោលផ្លូវការជាមួយនឹងបទចម្រៀងដែលមានចំណងជើងថា "Seven" ដែលមាន Latto ជាអ្នក Feat ជាមួយ។

ទោះបីជាបានចេញបទចម្រៀងទោលជាច្រើនក្នុងអំឡុងពេលដែលនៅ Active ជាមួយក្រុម ប៉ុន្តែ «Seven» ត្រូវបានគេចាត់ទុកថាជាបទចម្រៀងទោលផ្លូវការដំបូងរបស់ Jungkook។ បទចម្រៀងនេះបានបង្កើតសមិទ្ធផលដែលមិនធ្លាប់មានពីមុនមកសម្រាប់សិល្បករទោល K-Pop និងប្រកួតប្រជែងដោយផ្ទាល់ជាមួយបទចម្រៀងរបស់តារាចម្រៀងអឺរ៉ុប និងអាមេរិក។

បទចម្រៀងនេះបានបង្ហាញខ្លួនជាលើកដំបូងនៅលេខ ១ នៅលើតារាងបទចម្រៀងជាសកលរបស់ Spotify ដែលមានការ Stream ដល់ទៅជិត ១៦ លានដង។ Jungkook បានក្លាយជាតារាចម្រៀងទោលប្រុសដំបូងគេ និងជាសិល្បករទីបីក្នុងប្រវត្តិសាស្ត្រដែលមានចំនួន​ Stream ដល់ទៅ ១៥ លាន ដងក្នុងថ្ងៃចេញផ្សាយដំបូង។ ជាមួយគ្នានោះ លោកក៏ក្លាយជាតារា K-Pop តែមួយគត់ដែលបានបង្ហាញខ្លួននៅលើកំពូលតារាង Spotify របស់សហរដ្ឋអាមេរិក។

បទ «Seven» បានវ៉ាដាច់បទ «Flowers» របស់ Miley Cyrus ដោយក្លាយជាបទចម្រៀងដែលមានសន្ទុះលឿនបំផុតដែលអាចឈានដល់ចំនួនស្ដាប់ ១០០ លានដងក្នុងប្រវត្តិសាស្ត្រ ក្នុងរយៈពេលតិចជាង ៦ ថ្ងៃ។ បទចម្រៀងនេះក៏បានចូលក្នុងកំណត់ត្រាពិភពលោក Guinness ជាបទចម្រៀងរបស់តារាចម្រៀងប្រុសដែលមានចំនួនអ្នកទស្សនាច្រើនជាងគេក្នុងមួយសប្តាហ៍។

បទចម្រៀងល្បីរបស់តារាចម្រៀងកើតក្នុងឆ្នាំ ១៩៩៧ បានចូលក្នុងតារាង Billboard Hot 100 នៅលេខ ១ ហើយនៅតែជាប់ចំណាត់ថ្នាក់កំពូលទាំង ១០០ បន្ទាប់ពី ៧ សប្តាហ៍។ បទចម្រៀងនេះបានរក្សាតំណែងកំពូលទាំងនៅលើតារាង Global 200 និង Global Excluding US រយៈពេល ៧ សប្តាហ៍ជាប់គ្នា។ ជាលទ្ធផល Jungkook បានវ៉ាដាច់ BTS ដោយក្លាយជាសិល្បករអាស៊ីដំបូងគេដែលអាចធ្វើរឿងនេះបាន។

អ្នកជំនាញតន្ត្រីពិភពលោកប្រៀបធៀប Jungkook ទៅ Justin Timberlake, Harry Styles ឬ Michael Jackson។ ពួកគេ​បាន​ដឹងថា សិល្បករ​ទាំង​បួន​សុទ្ធ​តែ​មាន​ទេព​កោសល្យ​ចេញ​ពី​ក្រុម​ចម្រៀង​ប្រុស មាន​មូលដ្ឋាន​អ្នក​គាំទ្ររឹងមាំ​ខ្លាំងមិនធម្មតា និង​ទទួល​បាន​ជោគជ័យ​ជា​សាកល​ពេល​ចេញ​បទ​ចម្រៀង​ទោល។ ផលិតករតន្ត្រីដែលឈ្នះពានរង្វាន់ Grammy លោក Andrew Watt បាននិយាយថាអ្នកចម្រៀង Dreamers ថាជាមនុស្សឧស្សាហ៍ព្យាយាម មានចិត្តល្អ មានការគោរព មិនខុសពី "កំពូលតារាអាមេរិក" នោះទេ។

Jungkook មាន​សក្ដានុពល​គ្រប់​គ្រាន់​ដើម្បី​ក្លាយ​ជា "Pop Prince" នា​ពេល​អនាគត។ តារា​ប្រុស​រូប​នេះ​មាន​រូប​រាង​សង្ហា ទេពកោសល្យ​ពូកែ អត្តចរិក​ល្អ មាន​ការ​ចាប់​ផ្ដើម​រឹង​មាំ ព្រម​ទាំង​ក្រុម​គ្រប់​គ្រង​អាជីព។

ជាមួយនឹងការចាប់ផ្តើមដ៏រឹងមាំរបស់សមាជិក BTS និងអ្នកគាំទ្រដ៏ច្រើន វាមិនមែនជាការលំបាកសម្រាប់ "Golden Maknae" ក្នុងការចេញបទចម្រៀងទោល ប៉ុន្តែភាពជោគជ័យដែលលោកទទួល​បាន​ក៏ពុំមែន​ ទទួលបាន​ដោយងាយៗនោះដែរ គឺសុទ្ធតែកើតចេញពីកម្លាំងកាយចិត្តទាំងស្រុង។

ស្នាដៃទោលរបស់ BTS សុទ្ធតែមានពណ៌តន្ត្រីខុសៗគ្នា ដោយក្នុងនោះ RM, J-hope, Suga មានទំនោរផ្តោតលើការរ៉េប និង ហ៊ីបហប ឯបងធំ Jin ចេញបទជាមួយតន្ត្រីប៉ុបរ៉ុក ស្របពេល Jimin បង្ហាញពីចរិតលក្ខណៈបទចម្រៀងតាមរយៈតន្ត្រីប្រភេទ ប៉ុប និង Hip-Hop ឯ Taehyung ទាញយកដែលជាបុរសសំឡេងជ្រៅរចេញបទជាប្រភេទ R&B / Soul។ ចំណែក Jungkook បានជ្រើសរើសតន្ត្រីប៉ុបបែបទំនើបដែលមានឥទ្ធិពលបំផុតនៅចក្រភពអង់គ្លេស។ ខណៈពេលដែលសមាជិកទាំងអស់ដែលនៅសេសសល់បានជ្រើសរើសបទដំបូងជាភាសាកូរ៉េ ប៉ុន្តែតារាចម្រៀងដែលកើតក្នុងឆ្នាំ ១៩៩៧ បានជ្រើសរើសបញ្ចេញបទចម្រៀងជាភាសាអង់គ្លេសសុទ្ធ ដែលបង្ហាញពីការតំរង់ទិសអន្តរជាតិយ៉ាងច្បាស់សម្រាប់ការបង្ហាញមុខដំបូងនេះ។

បន្ថែមពីលើ Style តន្ត្រី Jungkook បង្កើតរូបភាពខុសពីអ្វីដែលសមាជិកក្រុម K-Pop ​ភាគច្រើនដេញតាម។ Jungkook បានផ្លាស់ប្តូរបន្តិចម្តងៗពីបុរសសង្ហា គួរអោយស្រឡាញ់ ទៅជា “Hot Male God” ដែលមនុស្សរាប់ពាន់នាក់ស្រឡាញ់ដកចិត្តពុំរួច។

ការសហការរបស់លោក ជាមួយម៉ាកសំលៀកបំពាក់ Calvin Klein និងការថតរូបស៊ិចស៊ី សំដៅទៅលើរូបភាពដែលមហាជនប៉ែកលោកខាងលិចភាគច្រើនចូលចិត្តខ្លាំងណាស់ ពោលរូបភាពជា បុរសសង្ហា និងទាក់ទាញបំផុត។

បច្ចុប្បន្ននេះ មានតារាចម្រៀងប្រុសវ័យក្មេង ដែលមានឥទ្ធិពលមិនតិចនាក់ទេដូចជា Justin Bieber ហាក់ស្ងាត់ពីឆាកតន្ត្រីបន្តិចម្តងៗ ដើម្បីចំណាយពេលរីករាយនឹងជីវិតអាពាហ៍ពិពាហ៍ និងការព្យាបាលខ្លួន ឯ Shawn Mendes និង Charlie Puth ក៏ហាក់ដូចជាមិនទាន់មានសកម្មភាពញឹកញាប់ក្នុងពិភពតន្ត្រី។

ជំនួសមកវិញ តារាប្រុសដែលអាច "ប្រយុទ្ធ" ជាមួយតារាស្រីដូចជា Taylor Swift, Olivia Rodrigo, Billie Eilish បាននៅពេលនេះ គេសម្លឹងឃើញតែ Jungkook ម្នាក់ប៉ុណ្ណោះ។ មនុស្សជាច្រើនជឿថា Jungkook មានគុណសម្បត្តិសំខាន់ក្នុងនាមជាតារាប៉ុបពិភពលោក ដែលជាអ្នកស្នងតំណែងដ៏មានសក្តានុពលនៃចំណងជើង "Pop Prince" នាពេលអនាគត៕

ប្រភព៖ Kenh14   អត្ថបទ៖ ធារី