ដកតែ ២នាក់ ក្រៅពីនេះតារាជាប់ពាក់ព័ន្ធក្ដីក្ដាំ «Burning Sun» ចេញមុខវិញបណ្ដើរៗហើយ

2024-01-24 04:09:45
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃទី ២៤ ខែវិច្ឆិកា ឆ្នាំ ២០១៨ បុរសម្នាក់ឈ្មោះ Kim Sang Kyo ត្រូវបានគេរាយការណ៍ថាបានប្រព្រឹត្តិបទល្មើសរំលោភ នៅក្លឹប Burning Sun ដែលជាក្លឹប Gangnam និងជាកម្មសិទ្ធិរបស់អតីតសមាជិកក្រុម BIGBANG គឺ Seungri។ បន្ទាប់ពីមានការឈ្លោះប្រកែកគ្នានេះ មានការស៊ើបអង្កេតជាបន្តបន្ទាប់ទៅលើ Burning Sun និង Seungri ដែលបានបែកធ្លាយបណ្តាញដែលមានទំនាក់ទំនងគ្នាទៅវិញទៅមក។

អ្វីដែលគួរឱ្យភ្ញាក់ផ្អើលបំផុតមួយនៃការស៊ើបអង្កេតបានបង្ហាញពី Group Chat ដែលជាកន្លែងដែលវីដេអូសិចខុសច្បាប់ត្រូវបានចែកចាយ ហើយសមាជិកដែលមានក្នុង Group នោះមានតារាល្បីជាច្រើននាក់ ដូចជា Seungri, Jung Joon Young, Yong Jun Hyung និង Choi Jonghoon។

ក្នុងចំណោមតារាទាំងបីរូបនេះ បានទទួលបានការកាត់ទោសដាក់ពន្ធនាគារពីបទឧក្រិដ្ឋរៀងៗខ្លួន៊ ក្នុងនោះ Seungri ទទួលបានការកាត់ទោសចំនួន ៣ ឆ្នាំ សម្រាប់បទចោទប្រកាន់ចំនួន ៩ ដែលរួមមានពេស្យាចារ ជួញដូរផ្លូវភេទ ការកេងបន្លំ ការបំពានច្បាប់សុវត្ថិភាពអាហារ ការលេងល្បែងស៊ីសង និងការបំពានច្បាប់ប្តូរប្រាក់បរទេស។

Seungri

ចំណែក Jung Joon Young ត្រូវបានកាត់ទោសឱ្យជាប់ពន្ធនាគាររយៈពេល ៦ ឆ្នាំ ពីបទរំលោភផ្លូវភេទលើក្រុមក្មេងៗ និងពីបទយក និងចែកចាយ វីដេអូសិចដែលថតដោយខុសច្បាប់ ខណៈដែលអតីត FTISLAND គឺ Choi Jonghoon ត្រូវបានកាត់ទោសឱ្យជាប់ពន្ធនាគារ ៥ ឆ្នាំពីបទចូលរួមក្នុងការរំលោភជាមួយគ្នាដែរ។

Jung Joon Young

Choi Jonghoon

តារាផ្សេងទៀតដែលបានលើកឡើងដូចជា Yong Jun Hyun (អតីតសមាជិក HIGHLIGHT) និង Lee Jonghyun (អតីតសមាជិក CNBLUE) មិនត្រូវបានប្រឈមមុខនឹងការចោទប្រកាន់ពីបទពាក់ព័ន្ធទាំងនេះទេ ប៉ុន្តែពួកគេសម្រេចចាកចេញពីក្រុម ហើយឈប់សម្រាកពីវិស័យនេះ។

Lee Jonghyun

មិនដល់ប្រាំឆ្នាំស្រួលបួលផង បន្ទាប់ពីរឿងក្ដីអាស្រូវនេះផ្ទុះឡើង តារាដែលជាប់ពាក់ព័ន្ធស្ទើរតែទាំងអស់នេះ បានវិលត្រឡប់មកក្នុងពិភពសិល្បៈជាបន្តបន្ទាប់វិញ។

Yong Jun Hyung មិនត្រូវបានចោទប្រកាន់ណាមួយទេ ប៉ុន្តែបានទទួលស្គាល់ ដោយសារភាពថាបានដឹងថា Jung Joon Young ថតវីដេអូខុសច្បាប់ ដោយនិយាយថាលោកមិនបានចាត់ទុកវាជារឿងធំទេពេលនោះ។ យ៉ាងណាក្ដីអតីតសមាជិក HIGHLIGHT រូបនេះ ក៏បានវិលមកបន្តការងារ កាលពីខែវិច្ឆិកា ឆ្នាំ ២០២២ ហើយថ្មីៗនេះត្រូវបានគេចាប់អារម្មណ៍ឡើងវិញ បន្ទាប់ពីបែកធ្លាយព័ត៌មានថា លោក និង HyunA កំពុងមានទំនាក់ទំនងស្នេហានឹងគ្នា។

Yong Jun Hyung

Eddy Kim វិញត្រូវបានគេព្យួរករណីទុកសិន សម្រាប់ "អំពើចែកចាយរូបភាពអាសអាភាស" ក្នុងក្រុមរបស់ Jung Joon Young។ ប៉ុន្តែក្រោយការស៊ើបអង្កេត ព្រះរាជអាជ្ញាក៏សម្រេចផ្អាកការចោទប្រកាន់។ ដោយសារ លោកទាញរូបថតតែមួយសន្លឹកពីអ៊ីនធឺណិត និង Share ចូល Group តែ ១ ដងទេនៅក្នុងក្រុម។

Eddie Kim

នៅថ្ងៃទី ២៣ ខែមករា ឆ្នាំ ២០២៤ Eddie Kim និង Yoon Jong Shin បានចេញបទ "It'll Be Alright" ដែលជាការបង្ហាញមុខលើកដំបូងរបស់ លោកចាប់តាំងពីផ្ទុះរឿងអាស្រូវ។

ការកាត់ទោសជាប់ពន្ធនាគាររយៈពេល ៥ ឆ្នាំរបស់ Choi Jonghoon ត្រូវបានកាត់បន្ថយមកត្រឹម ២ ឆ្នាំ ហើយគាលោកត្រូវបានដោះលែងនៅខែវិច្ឆិកា ឆ្នាំ ២០២១។ លោកត្រូវបានគេមើលឃើញជាលើកដំបូងនៅឯព្រះវិហារជាមួយម្តាយទៀតផង។

ថ្មីៗនេះ មានសេចក្តីរាយការណ៍ថា Choi Jonghoon បានបង្ហាញវត្តមានលើ Platform ជប៉ុន Fanicon និងបង្ហាញពីបំណងចង់ឱ្យអ្នកគាំទ្រគាំទ្រសកម្មភាពនាពេលអនាគតរបស់លោកសាឡើងវិញ។

ចំពោះ Seungri ត្រូវបានដោះលែងពីពន្ធនាគារបន្ទាប់ពីបានជាប់ពន្ធនាគាររយៈពេល ១៨ ខែ នៃការកាត់ទោស **៣ ឆ្នាំ**របស់លោក។ កាលពីពេលថ្មីៗនេះ អតីតសមាជិកក្រុម BIGBANG រូបនេះ បានចូលរួមកម្មវិធីខួបកំណើតមួយនៅក្នុងប្រទេសកម្ពុជា ដោយលោកបានសន្យាថានឹងនាំ G-Dragon មកជាមួយទៀតផងលើកក្រោយ។

Jung Joon Young នៅតែជាប់ពន្ធនាគារដដែល ដូច្នេះមានន័យថា មានតែ តារាដែលមានសេរីភាពតែម្នាក់គត់ដែលមិនត្រឡប់មកវិញគឺ Lee Jonghyun ព្រោះតាំងពីមានរឿង មិនមានអ្នកណាបានដឹងឮពីលោកឡើយ។

ខណៈពេលដែលការវិលត្រឡប់មកវិញរបស់តារាខាងលើ ក៏មានមតិពីអ្នកនិយមលេងអ៊ីនធឺណិតៅភាគច្រើនសម្ដែងការរិះគន់យ៉ាងខ្លាំង ស្របពេលអ្នកខ្លះទៀតបើកបេះដូងការវិលមកវិញ និងសង្ឃឹមថាពួកគេនឹងកែខ្លួនចេញពីចិត្តជាថ្មី៕

SabayOne កម្មវិធីកម្សាន្តថ្មីរបស់ Sabay បើកឲ្យប្រើសាកល្បងពីពេលនេះ! ចុះឈ្មោះតាមរយៈតំណភ្ជាប់នេះ https://bit.ly/3QVlYVB

ប្រភព៖ Koreaboo អត្ថបទ៖ ធារី