គម្រោង​ស្ពានវែងជាងគេ​ស្រុកខ្មែរ ឆ្លងកាត់ទន្លេសាបនៅខេត្តកំពង់ឆ្នាំង និងផ្លូវភ្ជាប់ទៅកំពង់ធំ ឈានដល់ការបើកកិច្ចប្រជុំហើយ

  • 2024-05-30 07:15:57
  • ចំនួនមតិ 0 | ចំនួនចែករំលែក 0

ចន្លោះមិនឃើញ

នៅទីបំផុត​ គម្រោងស្ពាន​វែងជាងគេនៅកម្ពុជា គឺ​ស្ពាន​ឆ្លងកាត់​ទន្លេសាប នៅខេត្តកំពង់ឆ្នាំង និងផ្លូវ ៥០C ភ្ជាប់ទៅខេត្តកំពង់ធំ ដែល​ជាផ្លូវចំកណ្តាលប្រទេស ត្រូវបាន​បង្ហាញ​លទ្ធផល​នៃការសិក្សាសមិទ្ធិលទ្ធភាពបឋម ក្នុងកិច្ចប្រជុំ​មួយ​ ក្រោម​ការដឹកនាំរបស់​ឯកឧត្តម ប៉េង ពោធិ៍នា រដ្ឋមន្រ្តី​ក្រសួងសាធារណការ និងដឹកជញ្ជូន កាលពីថ្ងៃទី២៩ ខែឧសភា ឆ្នាំ​២០២៤។

បន្ទាប់ពីបានស្តាប់ការធ្វើបទបង្ហាញរួច ឯកឧត្តមរដ្ឋមន្ត្រី បានផ្តល់អនុសាសន៍ឱ្យ ថ្នាក់ដឹកនាំទទួលបន្ទុកគម្រោងខាងលើ ដឹកនាំសម្របសម្រួលរៀបចំកិច្ចប្រជុំកម្រិតបច្ចេកទេស ដោយមានការចូលរួមពី អគ្គនាយកដ្ឋានជំនាញ និងភាគីពាក់ព័ន្ធ ដើម្បីជជែកពិភាក្សា និងពិនិត្យវាយតម្លៃឱ្យបានគ្រប់ជ្រុងជ្រោយ ទៅលើលទ្ធផលនៃការសិក្សាសមិទ្ធិលទ្ធភាពបឋម។

បើតាមការលើកឡើង​របស់ឯកឧត្តមឧបនាយករដ្ឋមន្រ្តី ស៊ុន ចាន់ថុល កាលពីឆ្នាំមុន ក្នុងពេលឯកឧត្តម​កាន់តំណែងជារដ្ឋមន្រ្តីសាធារណការ បាន​ឱ្យដឹងថា គម្រោង​ស្ពាន​ឆ្លងកាត់​ទន្លេសាប​ក្នុងខេត្តកំពង់ឆ្នាំងនេះ គឺមានប្រវែង​ ៣,៣គីឡូម៉ែត្រ (សិក្សាលើកមុន ៣,៩គីឡូម៉ែត្រ) គ្រោងចំណាយ ១០០លានដុល្លារ ដោយពេលសង់រួច វានឹងក្លាយ​ជាស្ពានវែងជាងគេ​នៅកម្ពុជា។ ចំណែក​ផ្លូវ ៥០C គ្រោង​ចំណាយការសាងសង់ ១៥០លានដុល្លារ។

សូម​រំលឹក​ថា ​ក្នុង​ពិធីបុណ្យទន្លេ កាលពីខែមីនា ឆ្នាំ​២០១៩ នៅ​ខេត្តកំពង់ឆ្នាំង សម្តេច​តេជោ ហ៊ុន សែន បាន​ប្រកាស​​សម្រេច​ចិត្ត​ឱ្យ​មាន​ការ​សាងសង់ស្ពាន និង​ផ្លូវភ្ជាប់ពីខេត្ត​កំពងឆ្នាំង ទៅ​ខេត្តកំពង់ធំ ដើម្បីសម្រួល​ដល់ការធ្វើដំណើរ ចំណេញ​ពេលវេលា និងកាត់បន្ថយ​ការចំណាយ​របស់​ប្រជាពលរដ្ឋ។

សម្តេច​បញ្ជាក់​ថា ផ្លូវនេះ មាន​ចម្ងាយ​ជាង ៥៧គីឡូម៉ែត្រ ដែល​តភ្ជាប់ពី​ស្រុក​កំពង់លែង នៃ​ខេត្ត​កំពង់ឆ្នាំង ទៅកាន់​ក្រុងស្ទឹងសែន នៃខេត្ត​កំពង់ធំ។ ក្នុងនោះ​គឺត្រូវ​ធ្វើស្ពាន​ដែល​វែង​ជាងគេ​នៅក្នុងប្រទេស​កម្ពុជា ដែល​ឆ្លង​ដៃ​ទន្លេ​ទាំង៣ គឺ៖ ទន្លេ​ផ្សារក្រោម, ទន្លេ​ជល់មុខ និង​ទន្លេកំពង់ហាវ។

គួរដឹងថា​បច្ចុប្បន្ន ស្ពាន​ដែល​វែង​ជាងគេ​នៅ​កម្ពុជា គឺ​ស្ពាន «​ត្សឹ​បា​សា​» ឬ​ស្ពាន «​អ្នក​លឿង​» ដែលមាន​ប្រវែង​២២១៥​ម៉ែត្រ ឆ្លងកាត់ទន្លេមេគង្គក្រោម ភ្ជាប់ខេត្តកណ្តាល និង​ខេត្តព្រៃវែង។ ស្ពាន​នេះ ត្រូវបាន​ដាក់​ឲ្យ​ប្រើប្រាស់​ជា​ផ្លូវការ​កាលពីដើម​ខែមេសា ឆ្នាំ​២០១៥៕ 

អត្ថបទ៖ សំភី

អត្ថបទពេញនិយម