ក្លឹបបាល់ទាត់វិសាខា ទទួលបានដៃគូថ្មីដើម្បីរួមចំណែកអភិវឌ្ឍន៍វិស័យបាល់ទាត់នៅកម្ពុជា

2024-08-17 04:01:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបបាល់ទាត់វិសាខា ម្សិលមិញនេះបានចុះអនុស្សរណៈនៃការយោគយល់គ្នា (MOU) ជាមួយភេសជ្ជ:ប៉ូវកម្លាំង M-150 ដើម្បីចូលរួមឧបត្ថម្ភគាំទ្រ និងរួមចំណែកអភិវឌ្ឍធនធានកីឡាករជាមួយក្លឹប ក៏ដូចជាវិស័យកីឡាបាល់ទាត់នៅកម្ពុជា ។

ទិដ្ឋភាពម្សិលមិញ

លោក សូរ មុនីរតន៍ អនុប្រធានក្លឹបបាល់ទាត់វិសាខា និងលោក សុខ ចេមី នាយកគ្រប់គ្រងក្រុមហ៊ុនអេច អេស ស៊ី ត្រេឌីង ដែលជាក្រុមហ៊ុននាំចូលចែកចាយផ្តាច់មុខភេសជ្ជ:ប៉ូវកម្លាំង M-150 ក៏មានការចូលរួមជាសក្ខីភាពពីគណៈគ្រប់គ្រង និងកីឡាករ-កីឡាការិនីជាច្រើនផងដែរ។

ទិដ្ឋភាពម្សិលមិញ

នាឱកាសនោះ កញ្ញា អ៊ូ បញ្ញាសុកិត្យា បានសម្ដែងនូវសេចក្ដីសោមនស្សរីករាយ និងស្វាគមន៍យ៉ាងកក់ក្ដៅ ចំពោះដៃគូសហការឧបត្ថម្ភថ្មី M-150 តាមរយៈកិច្ចសហការយូរអង្វែងរយៈពេល ៥ឆ្នាំ ចាប់ពីឆ្នាំ២០២៤-២០២៩ ស្របពេលក្លឹបកំពុងស្វែងរកក្រុមហ៊ុនភេសជ្ជៈប៉ូវកម្លាំងដើម្បីជួយទ្រទ្រង់ក្លឹប រួមចំណែកអភិវឌ្ឍធនធានកីឡាករគ្រប់កម្រិតពីក្រុមយុវជនថ្នាលរហូតដល់ក្រុមឈុតធំព្រមទាំងក្រុមបាល់ទាត់នារី។

ទិដ្ឋភាពម្សិលមិញ

ថ្នាក់ដឹកនាំក្លឹបខាងលើបន្ដថា ការបណ្ដាក់ទុនពីវិស័យឯកជន គឺជាការរួមចំណែកដ៏ធំ ក្នុងការអភិវឌ្ឍក្លិប និងវិស័យបាល់ទាត់ ។ ដូច្នេះកញ្ញាសង្ឃឹមថា នឹងមានក្រុមហ៊ុនផ្សេងៗទៀត ដែលមានចំណាប់អារម្មណ៍ចង់សហការជាមួយវិស័យកីឡា មិនថាក្លិបបាល់ទាត់ ឬវិស័យកីឡាផ្សេងៗនោះទេ នឹងចូលរួមគាំទ្រឲ្យបានច្រើន ដើម្បីផលិតបាននូវធនធានកីឡាករ-កីឡាការិនីឆ្នើមៗ សម្រាប់ចូលរួមជាមួយក្រុមជម្រើសជាតិ ក៏ដូចជាប្រកួតប្រជែងលើឆាកអន្ដរជាតិជាដើម។

បញ្ជាក់ដែរថា កិច្ចចុះអនុស្សរណៈនៃការយោគយល់គ្នា (MOU) ជាមួយភេសជ្ជ:ប៉ូវកម្លាំង M-150 នេះធ្វើឡើងនៅកីឡដ្ឋានព្រីនស៍ កាលពីថ្ងៃទី១៦ ខែសីហា ឆ្នាំ២០២៤៕

អត្ថបទ៖ នួន ស៊ីណា