អង្គការផ្កាយសមុទ្រ នឹង​ចូលរួមក្នុងព្រឹត្តិការណ៍ដ៏អស្ចារ្យមិនធ្លាប់មានគឺ Gumball 3000 ដែលប្រព្រឹត្តទៅនៅមុខសណ្ឋាគារ Raffles ក្នុងក្រុងសៀមរាប ថ្ងៃច័ន្ទ ទី១៦ ខែកញ្ញា ឆ្នាំ២០២៤។ ព្រឹត្តិការណ៍ដ៏ធំនេះត្រូវបានរៀបចំឡើងក្រោមកិច្ចសហការជាមួយ Laureus Sport for Good និងទទួលបានការគាំទ្រពី Gumball 3000 ។

ព្រឹត្តិការណ៍នេះនឹងប្រមូលផ្តុំកីឡាករ កីឡាការនីវ័យក្មេង ក្នុងនោះមានកុមារា ១៥នាក់ និងកុមារី ១៥នាក់ ដែលនឹងបង្ហាញជំនាញបាល់ទាត់ក៏ដូចជាការចូលរួមលេង​កីឡា​ដែល​កំពុង​ពេញនិយម​នៅ​កម្ពុជា​និង​ប្រកួត​លក្ខណៈ​មិត្តភាព​ជាមួយគ្នាថែមទៀតផង។

កម្មវិធី​នេះ​ចាប់ពីម៉ោង៣ថ្ងៃត្រង់​តទៅ​ហើយ​នឹងរំលេចឲ្យឃើញពីភាពវិជ្ជមាននៃកម្មវិធីបាល់ទាត់របស់ អង្គការផ្កាយសមុទ្រ ដែលមានគោលបំណងជួយលើកកម្ពស់កុមារ និងយុវជន ដោយជម្រុញការធ្វើការងារជាក្រុម ភាពជា អ្នកដឹកនាំ និងស្មារតីសាមគ្គីជាសហគមន៍ជាដើម ។ កីឡាករវ័យក្មេងៗទាំងនេះដែលបានឆ្លងកាត់ការបង្វឹកពីគ្រូបង្វឹកបាល់ ទាត់អង្គការផ្កាយសមុទ្រចំនួន ៦រូប នឹងមកជួបជុំគ្នាបង្ហាញពីសារៈសំខាន់នៃកីឡាដែលជាមធ្យោបាយដ៏មានប្រសិទ្ធភាពបំផុតជម្រុញការផ្លាស់ប្តូរក្នុងសង្គមដោយនាំមកនូវសមភាព និងការចូលរួម ។

កម្មវិធីបាល់ទាត់របស់អង្គការផ្កាយសមុទ្រ ដែលទទួលបានការគាំទ្រពី Laureus Sport for Good អស់រយៈពេលជាច្រើនមក គឺមិនមែនគ្រាន់តែជាការហ្វឹកហាត់បាល់ទាត់នៅលើទីលានប៉ុណ្ណោះទេ ប៉ុន្តែថែមទាំងមានបញ្ចូលការរៀនសូត្រជំនាញ បំណិនជីវិត និងគុណតម្លៃ ដើម្បីជួយកុមារកសាងអនាគតដ៏ត្រចេះត្រចង់ផងដែរ។ បន្ថែមពីនេះទៀតព្រឹត្តិការណ៍មួយនេះក៏ជាឱកាសដ៏វិសេសសម្រាប់សាធារណជនក្នុងការមើលឃើញដោយផ្ទាល់នូវគុណតម្លៃដ៏ធំរបស់កីឡាក៏ដូចជាការខិតខំប្រឹងប្រែងរបស់អង្គការផ្កាយសមុទ្រក្នុងការបណ្តុះកុមារ និងយុវជនកម្ពុជាដែលជាអ្នកដឹកនាំជំនាន់ក្រោយទៀតផង ។

អ្នកស្រី ជួប វិច្ឆិកា ជាអគ្គនាយិកាប្រតិបត្តិអង្គការផ្កាយសមុទ្របានមានប្រសាសន៍ថា “ពួកយើងពិតជាមានមោទនភាព យ៉ាងធំធេង ដែលបានចូលរួមក្នុងព្រឹត្តិការណ៍ Gumball 3000 Rally នៅក្រុងសៀមរាប។ ព្រឹត្តិការណ៍នេះមិនត្រឹមតែជាព្រឹត្តិការណ៍កីឡាបាល់ទាត់ទេតែវាក៏បង្ហាញពីភាពខ្លាំង និងទេពកោសល្យរបស់កីឡាករកីឡាការនីវ័យក្មេងរបស់យើងផង ដែរ ដែលសុទ្ធសឹងតែជាកុមារ និងយុវជនទទួលបានការគាំទ្រពីកម្មវិធីនានារបស់អង្គការជួយឲ្យពួកគេជំនះឧបសគ្គជាច្រើនរហូតដល់ជោគជ័យក្នុងជីវិត។”

អង្គការផ្កាយសមុទ្រសូមអញ្ជើញសហគមន៍ក្នុងស្រុកភ្ញៀវកិត្តិយស និងអ្នកគាំទ្ររបស់ Gumball 3000 ទាំងអស់ឲ្យចូលរួមទស្សនាក្នុងព្រឹត្តិការណ៍នៅមុខសណ្ឋាគារ Raffles ដើម្បីជួយលើកទឹកចិត្តកីឡាករវ័យក្មេងរបស់យើង ។ ការគាំទ្ររបស់អ្នកនឹងរួមចំណែកជួយឲ្យពួកគេបន្តអភិវឌ្ឍខ្លួន និងខិតខំប្រឹងប្រែងពង្រឹងសមត្ថភាពឲ្យបានខ្លាំងពូកែទាំងនៅក្នុង និង ក្រៅទីលានបាល់ទាត់។​ ទីតាំង​គឺ​មុខសណ្ឋាគារ Raffles ក្រុងសៀមរាប​ ខេត្ត​សៀមរាប​ ចាប់​ពី​ម៉ោង​៣រសៀល​តទៅ៕​

អត្ថបទ៖ នួន ស៊ីណា​