ឯកឧត្តម បណ្ឌិតសភាចារ្យ សុខ ទូច គឺជាបញ្ញវន្តខ្មែរ និងបច្ចុប្បន្ន ជាប្រធាននៃរាជបណ្ឌិត្យសភាកម្ពុជា ដែលត្រូវបានគេចាត់ទុកថាជា "អ្នកសិក្សាជាន់ខ្ពស់របស់រដ្ឋាភិបាល"។ លោកកើតនៅឆ្នាំ ១៩៦៥ នៅភូមិតាកយ ឃុំព្រែកដំបូក ស្រុកស្រីសន្ធរ ខេត្តកំពង់ចាម។ ប្រភពខ្លះបានលើកឡើងថា លោកបានកើតនៅថ្ងៃទី ៧ ខែតុលា ឆ្នាំ ១៩៦៩។

នៅឆ្នាំ ១៩៨៩ មុនពេលការដួលរលំនៃសហភាពសូវៀត លោក សុខ ទូច បានទៅសិក្សានៅសាកលវិទ្យាល័យ Voronezh State ។ នៅទីនោះ លោកបានទទួលបរិញ្ញាបត្រ ផ្នែកវិទ្យាសាស្ត្រនយោបាយនៅឆ្នាំ ១៩៩៥ និង បរិញ្ញាបត្រជាន់ខ្ពស់ផ្នែកវិទ្យាសាស្ត្រនយោបាយនៅឆ្នាំ ១៩៩៦ ហើយបន្តយក បណ្ឌិតផ្នែកប្រវត្តិសាស្ត្រនយោបាយនៅឆ្នាំ ១៩៩៩ ។ និក្ខេបបទ របស់លោក ផ្តោតលើតួនាទីរបស់អង្គការសហប្រជាជាតិក្នុងជម្លោះកម្ពុជា។ លោកក៏ទទួលបានបរិញ្ញាបត្រជាន់ខ្ពស់ផ្នែកសុខភាពសាធារណៈក្នុងឆ្នាំ ១៩៩៨ តាមរយៈអាហារូបករណ៍ពីរដ្ឋាភិបាលអូស្ត្រាលីនៅសាកលវិទ្យាល័យ New South Wales ។

នៅឆ្នាំ ២០០១ លោក សុខ ទូច បានក្លាយជាមន្ត្រីរដ្ឋបាលនៅវិទ្យាស្ថានមនុស្សសាស្ត្រ និងវិទ្យាសាស្ត្រសង្គមនៃរាជបណ្ឌិត្យសភាកម្ពុជា។ នៅឆ្នាំ ២០០៣ លោកបានក្លាយជាប្រធានផ្នែកប្រវត្តិសាស្ត្រ និងវិទ្យាសាស្ត្រនយោបាយនៃ វិទ្យាស្ថានមនុស្សសាស្ដ្រ និងវិទ្យាសាស្ដ្រសង្គម នៃរាជបណ្ឌិត្យសភាកម្ពុជា។ ពីឆ្នាំ ២០០៥ ដល់ឆ្នាំ ២០១៥ លោកបានបម្រើការជាអនុប្រធាន (អគ្គនាយករង) នៃវិទ្យាស្ថានទំនាក់ទំនងអន្តរជាតិកម្ពុជា នៅរាជបណ្ឌិត្យសភាកម្ពុជា។ ពីឆ្នាំ ២០១១ ដល់ឆ្នាំ ២០១៥ លោក គឺជាប្រធានគណៈកម្មការវិទ្យាសាស្ត្រនយោបាយនៃក្រុមប្រឹក្សាជាតិភាសាខ្មែរ។

នៅក្នុងឆ្នាំ ២០១៥ លោក សុខ ទូច ត្រូវបានតំឡើងឋានៈជាប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជ្យបណ្ឌិត្យសភាកម្ពុជា ឋានៈស្មើ អគ្គនាយក។ នៅឆ្នាំ ២០១៧ លោក ត្រូវបានតែងតាំងជាប្រធានរាជបណ្ឌិត្យសភាកម្ពុជា ដោយមានឋានៈស្មើ រដ្ឋមន្ត្រី។ ចាប់តាំងពីកាន់តំណែងនេះមក លោក សុខ ទូច បានក្លាយជាអ្នកកែទម្រង់ ដោយតម្រូវឱ្យសមាជិកបណ្ឌិត្យសភាបង្កើនស្តង់ដាររបស់ពួកគេ និងចូលរួមក្នុងការស្រាវជ្រាវ និងការបោះពុម្ពផ្សាយវិទ្យាសាស្ត្រឱ្យកាន់តែច្រើន។

គួរឱ្យដឹងថា លោក សុខ ទូច ត្រូវបានប្រគល់ភារកិច្ចឱ្យបង្កើតផែនទីព្រំដែនភាពជាក់លាក់ GPS របស់កម្ពុជាតាំងពីឆ្នាំ ២០១៦។ លោកបានសិក្សា និងស៊ើបអង្កេតបញ្ហាប្រឈមដែល បឹងទន្លេសាប កំពុងប្រឈមមុខ តាមសំណើរបស់រដ្ឋាភិបាលក្នុងឆ្នាំ ២០២១ ។ លោក បានទទួលគ្រឿងឥស្សរិយស ជាច្រើន សម្រាប់ការចូលរួមចំណែកជួយដល់ប្រទេសជាតិ៕