គុណភាពខ្យល់នៅក្នុងសង្កាត់ទាំង ៥០ នៃទីក្រុងបាងកក ត្រូវបានចាត់ថ្នាក់ជាពណ៌ "ទឹកក្រូច" ឬចាប់ផ្តើមប៉ះពាល់ដល់សុខភាព នៅព្រឹកថ្ងៃពុធ ទី ២៦ ខែមីនា ឆ្នាំ២០២៥។ នេះបើយោងតាមមជ្ឈមណ្ឌលព័ត៌មានគុណភាពខ្យល់ នៃរដ្ឋបាលរាជធានីបាងកក (BMA)។

មជ្ឈមណ្ឌលព័ត៌មានគុណភាពខ្យល់ បានរាយការណ៍ថា កម្រិតមធ្យមនៃ PM2.5 នៅទូទាំងទីក្រុងបាងកក នៅថ្ងៃពុធនេះគឺ ៤៤.៥ មីក្រូក្រាមក្នុងមួយម៉ែត្រគូប (µg/m³) ដែលលើសពីស្តង់ដារប្រទេសថៃ ៣៧.៥ µg/m³ ក្នុងរយៈពេលមធ្យម ៣ ម៉ោង (ពីម៉ោង ៥ ព្រឹក ដល់ ៧ ព្រឹក)។ កាលពីម្សិលមិញ ក្នុងពេលដូចគ្នា កម្រិតនេះគឺ ៥១.២ µg/m³។

PM2.5 សំដៅលើភាគល្អិតតូចៗដែលមានអង្កត់ផ្ចិត ២.៥ មីក្រូម៉ែត្រ ឬតូចជាងនេះ ដែលអាចជ្រៀតចូលទៅក្នុងសួត និងចរន្តឈាម បង្កគ្រោះថ្នាក់ដល់សុខភាពដូចជា ជំងឺផ្លូវដង្ហើម និងជំងឺសរសៃឈាមបេះដូង។ ប្រភពសំខាន់នៃ PM2.5 រួមមាន ផ្សែងចរាចរណ៍ រោងចក្រ ភ្លើងឆេះព្រៃ និងការដុតសំណល់កសិកម្ម។

សង្កាត់ទាំង ៥ ដែលរាយការណ៍ថាមានកម្រិត PM2.5 ខ្ពស់ជាងគេរួមមាន Bueng Kum (៦៤.២ µg/m³), Wang Thonglang (៥៦.៩ µg/m³), Sathorn (៥៦.៩ µg/m³), Bang Na (៥៤.៨ µg/m³) និង Bang Phlat (៥១.៩ µg/m³)។

មជ្ឈមណ្ឌលព័ត៌មានគុណភាពខ្យល់របស់ថៃ បានណែនាំឱ្យប្រជាជននៅបាងកក ពាក់ម៉ាស់ ជៀសវាងចំណាយពេលនៅខាងក្រៅ និងធ្វើការពីផ្ទះប្រសិនបើអាចធ្វើទៅបាន។ អ្នកដែលជួបប្រទះរោគសញ្ញាដូចជា ក្អក រមាស់ភ្នែក ឬពិបាកដកដង្ហើម គួរតែទៅជួបគ្រូពេទ្យ នេះបើតាមការបន្ថែមរបស់មជ្ឈមណ្ឌល៕

ប្រភព៖ The Nation   អត្ថបទ ៖ គីម ណារ៉ាក់