មនោសញ្ចេតនាដ៏ជ្រាលជ្រៅរវាង Lucky និងម្ចាស់ដែលធ្លាប់មើល៍ថែជិត ៣០ឆ្នាំ ត្រូវបានកាត់ផ្ដាច់ភ្លាមៗដោយមិនដឹងមូលហេតុ បានបន្សល់ទុកនូវភាពក្ដុកក្ដួលក្នុងចិត្ដស្ទើរគ្រប់គ្នា ក្រោយបានឃើញសកម្មភាពលាគ្នាទាំងអាល័យនៅនាទីចុងក្រោយ។

បើទោះបីជាសត្វមិនអាចនិយាយស្ដីបាន ដើម្បីបង្ហាញពីមនោសញ្ចេតនា ឬបង្ហាញពីអារម្មណ៍របស់ខ្លួនចំពោះម្ចាស់ ប៉ុន្ដែ Luck ដែលជាដំរីកំព្រាមេតាំងពីអាយុ ៦ខែ ហើយបានយកមនុស្សជាមេដើម្បីមើល៍ថែជំនួស បានស្រែក និងរត់ស្ទាក់ផ្លូវម្ចាស់ ដោយដឹងថាខ្លួនត្រូវបែកពីម្ចាស់រហូត។

គិតត្រឹមថ្ងៃទី១ ខែកក្កដា ឆ្នាំ២០២៥ នេះ លោក ទ្រី ស៊ីថេង ដែលធ្លាប់បម្រើការងារនៅឧទ្យាន សួនសត្វភ្នំតាម៉ៅជាច្រើនឆ្នាំ នៅតែមិនទាន់បង្ហាញមូលហេតុដែលខ្លួនលាឈប់ពីកាងារ ជាពិសេសដាច់ឃ្លាតឆ្ងាយពី Lucky ដែលធ្លាប់មើលថែដោយផ្ទាល់ដៃតាំងពីតូចនោះមកនៅឡើយទេ ខណៈដែលមហាជន និងអ្នកដែលអាណិតស្រឡាញ់ lucky។

មិនស្រាយចម្ងល់ដោយត្រង់ៗចំពោះមហាជនចំពោះការឃ្លាតឆ្ងាយពី Lucky នេះ លោក ទ្រី ស៊ីថេង ធ្លាប់ឆ្លើយសំណួរដោយខ្លីតាមបណ្ដាញសង្គមទៅកាន់អ្នកចោទសួរថា “តើលោកត្រូវផ្ដាស់ប្ដូរកាងារនៅណា?” លោកក៏ឆ្លើយតបយ៉ាងខ្លីថា៖ “ខ្ញុំអត់ទាន់មានគោលដៅទេ”។​

ក្រៅពីនេះ លោក​ក៏នៅ​មានពាក្យពីរឃ្លាទៀតដែល​បង្ហាញ​ពី​អារម្មណ៍របស់ខ្លួន​ទៅ​កាន់ Lucky ដែល​លោក​ចាត់ទុកដូចជាកូន ឬសមាជិកគ្រួសារខ្លួន​នោះ​ថា៖ "ប្រហែលជាដឹងហើយមើល៍ទៅ បានជាមកលេង និងស្និទ្ធស្នាលជាមួយខ្ញុំយ៉ាងនេះ"។ និង​ឃ្លាចុងក្រោយ​លោក​បាន​ពោលថា៖ "បើអាចយកទៅជាមួយបាន ខ្ញុំយកទៅហើយ ខ្ញុំពិតជារំជួលចិត្តណាស់"។

ចម្លើយបែបនេះ បានធ្វើឲ្យមហាជនកាន់តែមន្ទិល ហើយនឹកគិតថាលោកច្បាស់ជាមានសម្ពាធ ឬបញ្ហាអ្វីនៅកន្លែងដែលខ្លួនធ្លាប់បំពេញការងាររាល់ថ្ងៃហើយ ទើបលោកសម្រេចចិត្ដលាឈប់ដែលខ្លួនស្រឡាញ់ ហើយមិនទាន់មានគោលដៅថ្មីដែលត្រូវដើរបែបនេះ៕