ក្រោនប៉េណាល់ទីចាញ់ Diamond ខណៈវេស្ទើនចាញ់ក្រុមមីយ៉ាន់ម៉ា៤-១
- 2014-12-09 14:34:30
- ចំនួនមតិ 0 | ចំនួនចែករំលែក 0
ក្រោនប៉េណាល់ទីចាញ់ Diamond ខណៈវេស្ទើនចាញ់ក្រុមមីយ៉ាន់ម៉ា៤-១
ចន្លោះមិនឃើញ
ជើងឯកកម្ពុជាភ្នំពេញក្រោនអស់ឱកាសឡើងទៅវគ្គបន្តនៃពានរង្វាន់អន្តរជាតិ Yunnan-Asean ហើយកាលពីយប់មិញ បន្ទាប់ពីចាញ់គ្រាប់បាល់ប៉េណាល់ទីក្រុម Diamond FC ខណៈក្រុមសាកលវិទ្យាល័យវេស្ទើនត្រូវក្រុមសាកលវិទ្យាល័យមកពីប្រទេសមីយ៉ាន់ម៉ាបំបាក់ដោយលទ្ធផល៤-១សម្រាប់ការប្រកួតព្រឹត្តិការណ៍កីឡាសាកលវិទ្យាល័យអាស៊ានលើកទី១៧ នៅប្រទេសឥណ្ឌូណេស៊ី។
ការប្រកួតប្រជែងស្វែងរកអ្នកឈ្នះបន្តទៅ១/២ផ្តាច់ព្រ័ត្រនៃពានរង្វាន់អន្តរជាតិ Yunnan-Asean ឆ្នាំ២០១៤ ក្រុមជើងឯកកម្ពុជាភ្នំពេញក្រោនបានត្រឹមស្មើ១-១ នឹងក្រុមស្ម័គ្រចិត្តចិន Diamond FC បន្ទាប់ពីបញ្ចប់ការប្រកួត។ ដើម្បីកាត់សេចក្តីរក ក្រុមឡើងទៅវគ្គបន្ត ក្រុមទាំងពីរត្រូវទាត់បាល់ប៉េណាល់ទី។ ជាលទ្ធផលភ្នំពេញក្រោនចាញ់ដោយបាល់ប៉េណាល់ទី ប៉ុន្តែមន្ត្រីទទួលបន្ទុកសារព័ត៌មានភ្នំពេញក្រោនលោក Andy ប្រាប់ថា លោកបានសួរទៅគ្រូបង្វឹកលោក Sam ដែរ តែមិនបានឆ្លើយតបថា ចាញ់បាល់ប៉េណាល់ទីប៉ុន្មានទល់នឹងប៉ុន្មាននោះទេ។ សម្រាប់ពានរង្វាន់អន្តរជាតិ Yunnan-Asean ឆ្នាំ២០១៤នេះ ក្រុមភ្នំពេញក្រោនមិនស្គាល់រសជាតិជ័យជម្នះទេ បន្ទាប់ពី៣ប្រកួតកន្លងមកស្មើ២ និងចាញ់១ក្នុងនោះស្មើក្រុមចិន Mengzi Wanhao ដោយលទ្ធផល០-០ និងបន្តស្មើក្រុមU-19 Muangthong United ដោយលទ្ធផល០-០។
ចំណែកក្រុមវិញវេស្ទើននៅប្រទេសឥណ្ឌូណេស៊ីវិញទទួលរងការខកចិត្តយ៉ាងខ្លាំង បន្ទាប់ពីក្រុមមកពីប្រទេសមីយ៉ាន់ម៉ាបំបាក់ក្នុងលទ្ធផល ៤-១ កាលពីរសៀលម្សិលមិញក្នុងព្រឹត្តិការណ៍បើកឆាកនៃកីឡាសាកលវិទ្យាល័យអាស៊ាន។
អត្ថបទ៖ ជាន ចាន់រ៉ា