ពីក្រោយការមិនចូលរួម Cambodia's Got Talent របស់អ្នកលេង Street Magic ខ្មែរ

2014-12-09 16:36:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពលរដ្ឋរដ្ឋខ្មែរ អ្នកមានសមត្ថភាពចម្រុះ បានចុះឈ្មោះប្រកួតប្រជែងក្នុងកម្មវិធី Cambodia's Got Talent ព្រោងព្រាត។ ងាកមកលោក តេង សាម៉ៅ អ្នកលេងវេទមន្តតាមផ្លូវ (Street Magic) ខ្មែរ អត់បានចូលរួមកម្មវិធីដ៏ល្បីមួយនេះទេ ដោយលោកមានមូលហេតុផ្ទាល់ខ្លួនរបស់លោក។

“កម្មវិធីគេល្អតើ...ប៉ុន្តែខ្ញុំខ្លួនឯងទេ ដែលមិនអាចចូលរួមបាន ព្រោះរវល់ខ្លាំងពេក ដកឃ្លាមិនរួចទេ អីចឹងទើបមិនចូលរួម ក្រែងប៉ះពាល់ដល់កម្មវិធីគេ!”។

មមាញឹកក្នុងការងារសម្ដែង ក៏ដូចជាបញ្ចេញសមត្ថភាពតាមកម្មវិធីផ្សេងៗ គឺជាមូលហេតុចម្បងដែលលោក សាម៉ៅ មិនបានចូលរួម Cambodia's Got Talent។ លោកថា តាំងពីមុនកម្មវិធីចាប់ផ្ដើមមកឥឡូវលោកទទួលកម្មវិធីដល់ទៅជាង ២៧កម្មវិធីឯណោះ។ "មកទល់ឥឡូវខ្ញុំសម្ដែងរួចរាល់អស់ ២០កម្មវិធីហើយ នៅសល់៧ទៀត ដែលត្រូវសម្ដែងឲ្យគេ!”។

ក្រៅពីកម្មវិធី ៧ ដែលនៅសល់លោកត្រូវសម្ដែង អ្នកលេងវេទមន្តតាមផ្លូវរូបនេះ ប្រាប់ថា លោកក៏ទទួលបានការងារថ្មីបន្តទៀតដែរ ក្នុងនោះលោកទើបចុះកុងត្រាសម្ដែងរួចរាល់ជាមួយសណ្ឋាគារហ៊ីម៉ាវ៉ារី ព្រមទាំងកំពុងស្ថិតក្នុងការចរចាជាមួយកម្មវិធីរៀបចំដោយធនាគារ ABA ផង។ ក្រៅពីការងារសម្ដែង លោក ជាប់រវល់ជាមួយការងារផលិតស្ប៉តពាណិជ្ជកម្ម បញ្ចូលសំឡេង និងដឹកនាំរឿងគេថែមទៀត។ សាម៉ៅ ថ្លែងថាទាំងនេះ សុទ្ធជាហេតុផលដែលលោកមិនអាចចូលរួមបាន។

សកម្មភាពសម្ដែងរបស់លោក តេង សាម៉ៅ ក្នុងកម្មវិធីផ្សេងៗ

មិនខុសអីនឹង "The Voice Cambodia" កម្មវិធី “Cambodia's Got Talent” គឺជាកន្លែងរកអ្នកមានសមត្ថភាព និងផ្ដួចផ្ដើមឲ្យពួកគេមានឱកាសក្លាយជាអ្នកអាជីពលើជំនាញពិតប្រាកដរបស់ខ្លួន។ និយាយលើចំណុចនេះ លោក តេង សាម៉ៅ ប្រាប់ថា លោកជាអ្នកអាជីពរួចទៅហើយ។ ដូច្នេះមិនសំខាន់ទេរឿងលោកចូលរួម ឬមិនចូលរួមកម្មវិធីខាងលើ។

យ៉ាងណាក៏ដោយ ក៏មិនមានន័យថា លោកមិនអើពើនឹងកម្មវិធីនេះរហូតដែរ។ "ដូចខ្ញុំប្រាប់ពីខាងលើ ហេតុផលមកតែពីខ្ញុំរវល់ខ្លាំងប៉ុណ្ណោះ បើ Season ក្រោយមានឱកាសខ្ញុំនឹងចូលរួម!"។ លោក តេង សាម៉ៅ បញ្ជាក់៕

អត្ថបទ៖បាត់មុខយូរ តេង សាម៉ៅ ត្រឡប់មកវិញជាមួយនឹងការឲ្យលុយធីប

អត្ថបទផ្សេងៗពាក់ព័ន្ធនឹង Cambodia's Got Talent មាននៅទីនេះ...!!!

អត្ថបទ៖ ទារិកា