វេស្ទើនកាន់តែយ៉ាប់ពេលប្រកួតបង្គ្រប់កិច្ចនឹងឡាវ រសៀលនេះ
- 2014-12-12 16:11:32
- ចំនួនមតិ 0 | ចំនួនចែករំលែក 0
វេស្ទើនកាន់តែយ៉ាប់ពេលប្រកួតបង្គ្រប់កិច្ចនឹងឡាវ រសៀលនេះ
ចន្លោះមិនឃើញ
ក្រុមសាកលវិទ្យាល័យវេស្ទើនតំណាងឲ្យប្រទេសកម្ពុជាត្រូវប្រកួតបង្គ្រប់កិច្ចនឹងក្រុមសាកលវិទ្យាល័យមកពីប្រទេសឡាវ នៅក្នុងពូល B ក្នុងព្រឹត្តិការណ៍កីឡាសាកលវិទ្យាល័យអាស៊ានលើកទី១៧ នៅប្រទេសឥណ្ឌូណេស៊ី វេលាម៉ោង៣:៣០នាទីរសៀលថ្ងៃនេះ។
ការប្រកួតបញ្ចប់ភារកិច្ចនេះ ក្រុមវេស្ទើនទោះជាឈ្នះក៏គ្មានឱកាសឡើងទៅជុំបន្ទាប់ ក្រោយចាញ់ពីរប្រកួតជាប់គ្នាក្នុងនោះចាញ់មីយ៉ាន់ម៉ា ៤-១ និងបន្តចាញ់ឥណ្ឌូណេស៊ី៣-០។ ផ្ទុយទៅវិញ ក្រុមឡាវកាន់តែមានទំនុកចិត្តដោយសារមិនទាន់ស្គាល់ពាក្យបរាជ័យឡើយក្រោយពីរប្រកួតកន្លងមកគឺស្មើឥណ្ឌូណេស៊ី ២-២ និងបំបាក់ក្រុមមីយ៉ាន់ម៉ា ៣-១។
មុនព្រឹត្តិការណ៍កីឡាសាកលវិទ្យាល័យអាស៊ានចាប់ផ្តើម ក្រុមវេស្ទើនត្រូវបានគណៈកម្មាធិការរៀបចំការប្រកួតមិនអនុញ្ញាតឲ្យកីឡាករ៣នាក់ចូលរួមទេដោយសារពួកគេមានអាយុលើស ខណៈលក្ខណកំណត់អាយុពី១៨ទៅ២៨ឆ្នាំ។
សម្រាប់ការប្រកួតនេះក្រុមវេស្ទើនកាន់តែយ៉ាប់យឺនខ្លាំងជាងកាលប្រកួតពីរលើកមុនទៀត។ អ្នកចាត់ការក្រុមវេស្ទើន លោក ឡៃ សុធា បានប្រាប់ថា ក្រុមរបស់លោកកាន់តែធ្វើការងារធ្ងន់ជាងមុនដោយសារសមាជិកក្រុមកាន់តែនៅសល់តិចជាងមុន។
លោកបាននិយាយថា ៖«យើងនៅគ្នាតែ១៥នាក់ ហើយពេលនេះកីឡាករពីរនាក់របួស និងកាតក្រហមម្នាក់ទៀត អីចឹងមានតែ១២នាក់ទេ ហើយអ្នករបួសពីរនាក់ហ្នឹងមិនដឹងថាអាចលេងបានអត់»។ ទោះជាយ៉ាងណាលោកបានប្ដេជ្ញាថា ក្រុមរបស់លោកនឹងខំប្រឹងឲ្យអស់ពីលទ្ធភាពសម្រាប់ការប្រកួតបញ្ចប់នេះ។
ទន្ទឹមជាមួយនេះ លោក ឡៃ សុធា បានសុំទោសដល់អ្នកគាំទ្រ និងប្រជាជនកម្ពុជាដែលក្រុមរបស់លោកធ្វើមិនបានល្អសម្រាប់ការប្រកួតក្នុងព្រឹត្តិការណ៍នេះ។ លោកបាននិយាយថា ៖«ខ្ញុំសុំទោសចំពោះប្រជាជនកម្ពុជាទាំងអស់គ្នាក្នុងនាមជាយើងជាអ្នកដឹកនាំ ហើយយើងខ្ញុំសុំទោសចំពោះជាតិរបស់យើងដែលធ្វើមិនបានល្អ ហើយសូមគាំទ្របន្ត។ យើងខ្ញុំសន្យាថា យើងនឹងប្រឹងឲ្យអស់ពីលទ្ធភាពសម្រាប់ការប្រកួតខាងមុខនេះ»។
ស្ថិតនៅក្នុងពូល B មានតែក្រុម៣ប៉ុណ្ណោះដែលត្រូវប្រជែងគ្នាទៅកាន់វគ្គបន្តគឺ ឥណ្ឌូណេស៊ី មីយ៉ាន់ម៉ា និងឡាវ ខណៈក្រុមវេស្ទើនអស់ឱកាសហើយ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
