រឿង "ខ្មោចអាសង្ហា " រងការចោទយកបទចម្រៀងរបស់គ្រិស្ទៀនមកប្រើគ្មានការអនុញ្ញាត

2014-12-17 17:48:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តខ្នាតធំរឿង "ខ្មោចអាសង្ហា" របស់ផលិតកម្ម ភូមិពេជ្រភាពយន្តបានរងការចោទប្រកាន់ពីអ្នកនិពន្ធដែលស្ថិតក្នុងក្រុមគ្រិស្ទៀន ថា បានយកចម្រៀង Original Song របស់ពួកគេ "ក្ដីស្នេហ៍អស្ចារ្យ" ទៅប្រើក្នុងខ្សែភាពយន្តរបស់ខ្លួនដោយគ្មានការអនុញ្ញាត។

"នៅក្នុងខែនេះសហគមន៍គ្រីស្ទបរិស័ទទូទាំងប្រទេសមានការភ្ញាក់ផ្អើលដែលវីដេអូរឿង "ខ្មោចអាសង្ហារ" របស់ផលិតកម្មភូមិពេជ្របានលួចយក original song របស់គ្រីស្ទាន យកទៅប្រើប្រាស់ដោយគ្មានការអនុញ្ញាត។ ក្នុងនាមយើងខ្ញុំជាសហគមន៍គ្រីស្ទបរិស័ទកម្ពុជា សូមសំដែងការមិនពេញចិត្ត និងប្រកាសជាសាធារណថា បទភ្លេង និងការសម្រួលតន្ត្រីនេះបានលួចពីសហគមន៍គ្រីស្ទបរិស័ទយើងដោយគ្មានការអនុញ្ញាតទេ។ ម្ចាស់ផលិតកម្មសុទ្ឋរស់នៅក្រៅស្រុក ល្មមស្គាល់ពីច្បាប់ផង។"

លោក ស៊ីវ សុខឿន ដែលអះអាងថាជាបុគ្គលនៅក្នុងក្រុមអ្នកនិពន្ធបទចម្រៀងសម្រាប់គ្រឹស្ទបរិស័ទ បានសរសេរលើ Facebook រួមទាំងលើគេហទំព័រhttp://sskpromotion.com របស់លោកផង។ យ៉ាងណាលោកបានអះអាងថា លោកមិនមែនជានិពន្ធបទនេះផ្ទាល់ទេ អ្នកនិពន្ធផ្ទាល់គឺលោក លោក ពេជ្រ ច័ន្ទបុរី។

ងាកមកអ្នកនិពន្ធផ្ទាល់វិញ បានឆ្លើយប្រាប់ Sabay ព្រឹកនេះទៀតថា ជារឿងពិតដែលថា បទចម្រៀងស្នាដៃថ្មីសុទ្ធសាធរបស់លោកធ្វើសម្រាប់ក្រុមគ្រិស្ដបរិស័ទ ត្រូវបានគេយកទៅប្រើក្នុងភាពយន្តខាងលើដោយគ្មានការអនុញ្ញាត។ "ខ្ញុំបានទទួលដំណឹងតាំងពីភាពយន្តនេះតាំងពីដំបូង ហើយខ្ញុំបានទូរសព្ទទៅភាគីខាងភាពយន្ត ប៉ុន្តែកូនចៅគាត់បានពង្វាងខ្ញុំមិនជួបជាមួយថ្នាក់លើរបស់ពួកគេទេ"។

លោក បុរី បន្តថាបទ "ក្ដីស្នេហ៍អស្ចារ្យ" លោកបាននិពន្ធថ្មីសុទ្ធសាធទាំងទំនុក និងទំនុកភ្លេងតាំងពីឆ្នាំ ២០០៦សម្រាប់ក្រុមគ្រិស្ដបរិស័ទច្រៀង។ ក្នុងករណីនេះ អ្នកនិពន្ធរូបនេះ បញ្ជាក់ថា ការព្យាយាមភ្ជាប់ទំនាក់ទំនងរបស់លោក ទៅកាន់ភាគីខាងភាពយន្ត គ្រាន់តែជាការសាកសួរព័ត៌មានប៉ុណ្ណោះ។ "គ្រាន់តែចង់សួរថា គាត់បានបទនេះពីណា មានគេយកទៅលក់ឲ្យ ឬក៏គាត់យកពី Youtube ប៉ុណ្ណោះ គិតថាមិនបាច់វែងឆ្ងាយអីទេ និងសុំថាលើកក្រោយកុំធ្វើអីចឹងទៀត!"។

វិលមកចាងហ្វាងផលិតកម្ម ភូមិពេជ្រភាពយន្តម្ចាស់ផលិតរឿង "ខ្មោចអាសង្ហា" លោក ដើង ពុទ្ធពណ៌វិញ មិនទាន់អាចសុំការអធិប្បាយបានទេជុំវិញករណីខាងលើ តាំងពីរសៀលម្សិលមិញរហូតដល់ព្រឹកនេះ ក្នុងនោះទូរសព្ទរបស់លោកទទួលការហៅចូល ប៉ុន្តែមិនមានអ្នកទទួល។

បើទោះជាម្ចាស់និពន្ធផ្ទាល់ អះអាងថា មិនចង់វែងឆ្ងាយក្ដី ប៉ុន្តែលោក ស៊ីវ សុខឿន តំណាងគ្រិស្ដបរិស័ទ បានស្នើឲ្យស្ថាប័នពាក់ព័ន្ធមានក្រសួងព័ត៌មាន និងក្រសួងវប្បធម៌ចូលអន្តរាគមន៍ផង។ ពាក់ព័ន្ធករណីនេះ ឯកឧត្តម ជា ច័ន្ទបូរិបូរណ៍ រដ្ឋលេខាធិការក្រសួងព័ត៌មាន ប្រាប់ថានេះមិនមែនជាសមត្ថកិច្ចរបស់ក្រសួងព័ត៌មានទេ។

http://youtu.be/kzd_J_xNhrU

"មិនមែនជាសមត្ថកិច្ចរបស់ក្រសួងព័ត៌មានទេ បើរឿងហ្នឹងចាក់បញ្ចាំងលើកញ្ចក់ទូរទស្សន៍ទើបជាសមត្ថកិច្ចរបស់ក្រសួង បើត្រឹមបញ្ចាំងនៅរោងកុន មិនមែនជាសមត្ថកិច្ចក្រសួងទេ"។ ឯកឧត្តម ថ្លែងថា ការសុំសិទ្ធិចេញថតរបស់ផលិតករលើរឿងណាមួយ គឺសុំពីក្រសួងវប្បធម៌ ដូច្នេះជាសមត្ថកិច្ចរបស់ក្រសួងនេះ។

យ៉ាងណាក៏ដោយ លោក ស៊ិន ច័ន្ទសាយ៉ា ប្រធាននាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈ មិនអាចសុំការអធិប្បាយបានទេនៅព្រឹកនេះ ដោយទូរសព្ទរបស់លោកទទួលការហៅចូល ប៉ុន្តែមិនមានការឆ្លើយតប។

ដំណោះស្រាយលើករណីនេះ ឯកឧត្តម ជា ច័ន្ទបូរិបូរណ៍ ថ្លែងថា មានតែផ្លូវពីរប៉ុណ្ណោះ ទី១ភាគីទាំងពីរស្វែងរកការសម្រុះសម្រួលទ្វេភាគី និងទី២ស្ថាប័នតុលាការ ប្រសិនបើភាគីខាងដើមចោទពិតជាចង់បានសំណងតាមរូបភាពណាមួយនោះ។ ឯកឧត្តម បានហៅករណីនេះថា ជាករណីដំបូង និងជាសញ្ញាល្អមួយដែលថា សិល្បៈតន្ត្រីរបស់យើងកាន់ត្រូវការបទចម្រៀង Original Song៕

ទើបរកឃើញ…ភាពយន្តក្នុងអតីតកាលមួយរឿងបានបំបែក... អត្ថបទផ្សេងៗពាក់ព័ន្ធនឹងភាពយន្តជាតិ សូមចុចទីនេះ!!!

អត្ថបទ៖ ទារិកា