នេះនែ!...យុវវ័យជាអ្នកបញ្ចូលសំឡេងដ៏កម្រ បានប៊ូតុងមាសពី Cambodia's Got Talent យប់មិញ!

2014-12-23 13:30:25
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក អេ ឋានរិទ្ធ និង កញ្ញា ឈុន ម៉ារីណែត បានធ្វើឲ្យគណៈកម្មការ Cambodia's Got Talent មានការផ្អើល និង ពោលសរសើរក្ដែងៗ ចំពោះសមត្ថភាពសម្ដែងរឿងឥតព្រាងទុក រហូតផ្ដល់ប៊ូតុងមាសដល់ពូកគេទៀតផង។

ទោះបីជាយ៉ាងណា កញ្ញា ឈុន ម៉ារីណែត បានប្រាប់ Sabay ថា ពូកគេបានចាប់ដៃគូសម្ដែងរយៈពេល ៣ ឆ្នាំ មកហើយ តាំងពីដំបូង នៃការបំពេញការងារជាបុគ្គលិកវិទ្យុវាយោអេហ្វអឹម ស្របពេលរៀនមហាវិទ្យាល័យច្បាប់ជាមួយគ្នាផងដែរ។

កញ្ញាអះអាងថា អាជីពបញ្ចូលសំឡេង កើតចេញពីការព្យាយាមហាត់រៀនដោយខ្លួនឯងប៉ុណ្ណោះ មិនបានទទួលការបណ្ដុះបណ្ដាលត្រឹមត្រូវពីនរណាឡើយ។ ម៉ារីណែត និយាយថា៖ "ខុសត្រូវយ៉ាងណាយើងជួយកែគ្នាទៅវិញទៅមក ព្រោះមិនមាននរណាផ្សេងជួយបង្រៀននោះទេ យូរទៅក៏ធ្វើបាន"។

អ្នកផលិតកម្មវិធីវិទ្យុរូបនេះបន្តថា ដោយការខិតប្រឹងប្រែងជាបន្តបន្ទាប់ និង អនុវត្តន៍ជាប្រចាំក្នុងកម្មវិធីផ្សាយនៅតាមស្ថានីយវិទ្យុ នាំឲ្យអ្នកទាំងពីរសម្រេចបានលទ្ធផលដូចសព្វថ្ងៃ។ ក្នុងនោះម្នាក់ៗអាចធ្វើជាសំឡេងបានចំនួន ១០ ឯណោះ រួមមាន ចាស់ ក្មេង យុវវ័យ និង តួឯក ឬតួរងជាដើម។

ម៉ារីណែត បញ្ជាក់ថា៖ “ ការសម្ដែងជាសំឡេងមនុស្សចាស់ពិបាកជាងគេ ពូកយើងចំណាយពេលហ្វឹកហាត់ច្រើនដង ព្រោះសំឡេងមិនទាន់មូលល្អទេ"។ ម៉ារីណែត បន្តថា មានផលលំបាកមួយចំនួនសម្រាប់នាង នោះជាការញែកសំឡេងឲ្យដាច់ចេញពីគ្នា និង កត្តាវ័យនៅក្មេងផងដែរ។

អានអត្ថបទ៖ ចេញមុខមាត់ប្រុសសង្ហាអនាគតប្ដី ឆៃ លីដាឡែន

ស្រីស្អាតជាអ្នកផលិតកម្មវិធីវិទ្យុខាងលើយល់ថា អាជីពជាអ្នកបញ្ចូលសំឡេងបែបនេះ មិនសូវមានការចាប់អារម្មណ៍ពីមនុស្សទូទៅនោះទេ។ កញ្ញារំពឹងថា អាជីពនេះ អាចរកលុយបានច្រើននៅពេលអនាគតមិនខាន។ ចំពោះលទ្ធផលប៊ូតុងមាសក្នុងកម្មវិធី Cambodia's Got Talent កាលពីយប់មិញនេះ ពូកគេចាត់ទុកថា ជាការវាស់ស្ទង់សមត្ថភាព នៅក្នុងរយៈពេល នៃការចាប់ដៃគូសម្ដែងប៉ុន្មានឆ្នាំកន្លងមកនេះ អាចនិយាយបានថា ជាការចាប់ផ្ដើមទទួលយកព័ត៌មានត្រលប់មកវិញ។

“ដំបូងឡើយ ពូកយើងមិនរំពឹងថា បានទទួលលទ្ធផលដូច្នេះទេ គ្រាន់តែមានការតាំងចិត្តមួយថា ធ្វើវាឲ្យបានប៉ុណ្ណោះ"។ នាងឲ្យដឹងបន្ថែមថា នឹងឡើងបង្ហាញសមត្ថភាពក្នុងវគ្គ Live Show នៃកម្មវិធីលំដាប់អន្តរជាតិមួយនេះ នៅពាក់កណ្ដាលខែមករា២០១៥ខាងមុខ។

អានអត្ថបទ៖ អ៊ិន សុទ្ធា ថាមានអ្នកចិញ្ចឹមមែន ប៉ុន្តែមិនមែនវ័យ៤០ឆ្នាំទេ គឺ៦០ឆ្នាំឯណោះ!

ប៉ុន្តែតួបញ្ចូលសំឡេងស្រីរូបនេះ មិនទាន់ដឹងលទ្ធផលយ៉ាងណាចំពោះការប្រកួតលើកក្រោយនោះទេ ព្រោះដៃគូ អេ ឋានរិទ្ធ ត្រូវត្រឡប់ទៅរស់នៅឯខេត្តបាត់ដំបងវិញ ដើម្បីបំពេញតួនារីក្នុងក្របខ័ណ្ឌរដ្ឋ។ ដូច្នេះ ពូកគេមានពេលវេលាតិចតួច ដើម្បីហាត់សមប៉ុណ្ណោះ នៅមុនពេលការប្រកួតមកដល់៕

http://youtu.be/BR6tqmEFfQE

អត្ថបទ៖ សំ ជំនាញ