នារីវាយកូនបាល់កម្ពុជាទីមួយ បំបាក់ចិនម្សិលមិញ បន្តប៉ះជើងខ្លាំងចិនទៀត
- 2014-12-24 15:46:36
- ចំនួនមតិ 0 | ចំនួនចែករំលែក 0
នារីវាយកូនបាល់កម្ពុជាទីមួយ បំបាក់ចិនម្សិលមិញ បន្តប៉ះជើងខ្លាំងចិនទៀត
ចន្លោះមិនឃើញ
កីឡាការិនីវាយកូនបាល់កម្ពុជាតែម្នាក់គត់ និងទីមួយដែលមានឈ្មោះប្រកួតលក្ខណៈអន្តរជាតិកញ្ញា Andrea Ka បានយកឈ្នះជើងខ្លាំងចិននាង Zhang ដែលមានចំណាត់ថ្នាក់ពិភពលោក ៩០០សម្រាប់ការប្រកួតទោលក្នុងព្រឹត្តិការណ៍ ITF Woamen's Circuit Series កាលពីម្សិលមិញនៅទីក្រុងហុងកុង។
សម្រាប់ការយកឈ្នះនេះ កីឡាការិនីកម្ពុជាដែលមានដើមកំណើតនៅប្រទេសបារាំង និងកំពុងសិក្សានៅសហរដ្ឋអាមេរិក Andrea Ka បានបំបាក់កីឡាការិនី Zhang នៅជុំទីមួយដោយលទ្ធផល ៧-៥ និង ៦-៤។
ពាក់ព័ន្ធនឹងការប្រកួតនេះ Andrea បានប្រាប់ Sabay ថា ៖«ខ្ញុំកំពុងផ្តោតលើការប្រកួត។ ខ្ញុំបានឈ្នះជុំទីមួយហើយ ហើយព្រឹកនេះខ្ញុំត្រូវប្រកួតនឹងកីឡាការិនីចិនទៀត។ ខ្ញុំពិតជារីករាយ ដែលទទួលបានឱកាសនេះ អីចឹងខ្ញុំត្រូវប្រឹងប្រែងប្រកួត»។
កីឡាការិនីកម្ពុជាដែលមានឪពុកម្តាយជាខ្មែរបានបន្តទៀតថា ៖«ខ្ញុំចង់ប្រាប់ដល់ប្រជាជនកម្ពុជាថា អ្វីៗអាចកើតមានឡើង។ ក្តីសង្ឃឹម និងការជឿជាក់គឺជាកូនសោឆ្ពោះទៅរកភាពជោគជ័យ។ ខ្ញុំតំណាងឲ្យកម្ពុជា ពីព្រោះខ្ញុំជាជនជាតិកម្ពុជា។ ឪពុកម្តាយខ្ញុំកើតនៅកម្ពុជា។ ពិតណាស់ នេះជាលើកដំបូងហើយដែលយើងទទួលបានពិន្ទុកីឡាវាយកូនបាល់ពិភពលោក WTA។ វាពិតជាមានកិត្តិយសណាស់ដែលវត្តមានរបស់ខ្ញុំតំណាងឲ្យប្រទេសកម្ពុជាសម្រាប់ការប្រកួតដ៏ធំនេះ»។
ទោះបីជាយ៉ាងណារហូតដល់ពេលនេះ កីឡាការិនីកម្ពុជារូបនេះមិនទាន់មានចំណាត់ថ្នាក់ពិភពលោកនៅឡើយទេ ខណៈនេះជាលើកទីមួយដែលកញ្ញាទទួលបានឱកាសប្រកួតជាលក្ខណៈអន្តរជាតិ និងតំណាងឲ្យកម្ពុជាក្នុងការស្វែងរកពិន្ទុ និងចំណាត់ថ្នាក់ពិភពលោក៕
អត្ថបទ៖ ជាន ចាន់រ៉ា