វណ្ណ ស៊ីដារ៉ូ នៅក្មេងសោះ ក្លាយជាអ្នកដឹកនាំថត MV នៅហង្សមាស

2015-01-05 22:13:03
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតជយលាភីចំណាត់ថ្នាក់លេខ ២ កម្មវិធី "ពេជ្រកំពុងច្នៃ" វណ្ណ ស៊ីដារ៉ូ កំពុងត្រៀមខ្លួនក្លាយជាអ្នកដឹកនាំថត MV នៅក្នុងផលិតកម្មហង្សមាស ក្រោយពីបានចំណាយពេលលើវិស័យនេះ ប៉ុន្មានឆ្នាំចុងក្រោយ។

ដារ៉ូ បានប្រាប់ Sabay មុននេះថា រូបគេកំពុងត្រៀមចូលបំពេញការងារជាផ្លូវការនៅក្នុងផលិតកម្មចម្រៀងឈានមុខខាងលើឆាប់ៗ។ ការសម្រេចចិត្តបែបនេះ ក្រោយពីបានចរចារួចរាល់លើលក្ខខណ្ឌមួយចំនួនជាមួយថ្នាក់ដឹកនាំផលិតកម្ម។ អ្នកដឹកនាំ MV វ័យក្មេងរូបនេះ ក៏បានបង្ហាញការព្រួយបារម្ភខ្លះដែរ ព្រោះរូបគេមានវ័យក្មេងនៅឡើយ បើប្រៀបធៀបជាមួយអ្នករួមការងារផ្សេងទៀត។

ប៉ុន្តែទោះបីជាយ៉ាងណា ស៊ីដារ៉ូ បានអះអាងថា ធ្លាប់បានសម្រេចសមិទ្ធផលភាពយន្តខ្នាតខ្លីមួយចំនួនកន្លងមកដែរ ហើយថែមទាំងបានយកទៅចូលរួមប្រកួតក្នុងកម្មវិធីផ្សេងៗ។ ជាក់ស្ដែងថ្មីៗនេះ ស្នាដៃកុនខ្លីរបស់គេមានចំណងជើងថា "ម្ចាស់សូរតន្ត្រី" បានជាប់ចំណាត់ថ្នាក់លេខ ៣ នៃការប្រកួត "បាយ័ន Short Film”។

រូបគេបន្ថែមថា ក្រោយជាប់ជយលាភីភ្លាម ខាងផលិតកម្មហង្សមាស បានហៅទៅចរចាគ្នា និង ផ្ដល់មុខតំណែងមួយកន្លែងក្នុងនាមជាអ្នកដឹកនាំថតចម្រៀងខារ៉ាអូខេ។ ដារ៉ូ ចាត់ទុកថា ជាសញ្ញាវិជ្ជមាន និងជាឱកាសមួយសម្រាប់រូបគេ ដើម្បីទទួលបានបទពិសោធន៍បន្ថែមទៀត ក្រៅពីការដឹកនាំកុនខ្លីទៅហើយ ថែមទាំងក្លាយជាអ្នកដឹកនាំថតចម្រៀងខារ៉ាអូខេបន្ថែមទៀត។

ទោះបីជាយ៉ាងណា អតីតជយលាភីកម្មវិធី "ពេជ្រកំពុងច្នៃ" ឆ្នាំ២០១៣រូបនេះ បានបង្ហាញសុទិដ្ឋិនិយមថា នឹងព្យាយាមអស់ពីលទ្ធភាព ដើម្បីទទួលបានលទ្ធផលស្នាដៃល្អប្រសើរ នៅក្នុងការចាប់ផ្ដើមដំបូងនេះ តាមការខិតខំប្រឹងប្រែង និង ការសហការល្អនៅក្នុងក្រុម៕