រឿង "កូនមាសម្ដាយ" ទទួលពានរង្វាន់ល្អបំផុត ពីអាមេរិក នឹងបញ្ចាំងនៅភ្នំពេញឆាប់ៗនេះ

2015-01-15 12:00:51
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿង "កូនមាសម្ដាយ" ដែលជាប្រភេទខ្សែភាពយន្តឯកសារឆ្លុះបញ្ចាំងពីជីវិតកូនខ្មែរម្នាក់បាននិរទេសពីប្រទេសកម្ពុជាទៅកាន់ទឹកដីសហរដ្ឋអាមេរិកក្រោយរបបកម្ពុជាប្រជាធិបតេយ្យ នឹងចាប់ផ្ដើមចាក់បញ្ចាំងជាផ្លូវការលើកដំបូងនៅក្នុងព្រះរាជាណាចក្រកម្ពុជា ក្នុងរោងភាពយន្ត Major Cineplex by Cellcard នាចុង ខែមករា ខាងមុខនេះ។ នេះបើយោងតាមសេចក្ដីប្រកាសព័ត៌មានរបស់ផលិតកម្ម ស្ទូឌីយ៉ូរីវ៉ូល បានឲ្យដឹងនៅថ្ងៃនេះ។

http://youtu.be/rzwzyAZ2LlY

លោក ស្រី អានីដា យុអិ អាលី ជាផលិតករនៃស្ទូឌីយ៉ូរីវ៉ូល បានប្រាប់គេហទំព័រ Sabay ថា ខ្សែភាពយន្តនេះបានចំណាយពេលថតរយៈពេល ២ ឆ្នាំ ដែលឆ្លុះបញ្ចាំងអំពីជីវិតពិតរបស់ លោក ខៀវ កុសល។ កុសល ដែលមានដើមកំណើតនៅតំបន់ជំរំ ភៀសខ្លួននៃព្រំដែនកម្ពុជា-ថៃ ហើយបានចាកចេញពីប្រទេសកម្ពុជាទៅ កាន់អាមេរិកនៅក្នុងអំឡុងឆ្នាំ ១៩៨១ ដែលនៅពេលនោះ កុសលទើបតែមានអាយុ ១ ខួប ប៉ុណ្ណោះ។

លោកស្រី អានីដា បានបន្តថា រឿង "កូនមាសម្ដាយ" គឺជាខ្សែភាពយន្តឯកសារល្អបំផុតដែលទទួលបានពានរង្វាន់ ពីក្រុង សាន់ហ្វ្រាន់ស៊ីស្កូ សហរដ្ឋអាមេរិក ហើយសាច់រឿងនេះ ចង់បង្ហាញមនុស្សគ្រប់គ្នាដឹងពីជីវិតពិតរបស់ កុសល ដែលធ្លាប់ជាប់ពន្ធធនាគារនៅអាមេរិករយៈពេល១៤ ឆ្នាំ និង ការនិរទេសខ្លួនមកកាន់ប្រទេសកម្ពុជាវិញកាលឆ្នាំ ២០១១។

“រឿងនេះចង់បង្ហាញសារសំខាន់មិនចង់ឲ្យមនុស្សគ្រប់គ្នាគិតថា គ្រប់មនុស្សនិរទេសខ្លួនមកប្រទេសកំណើតវិញសុទ្ធតែអាក្រក់នោះទេ គឺគាត់ (កុសល) រងការលំបាកច្រើន ប៉ុន្ដែ អ្វីៗមានហេតុនិងផលវា"។ អានីដានិយាយ។

លោក ខៀវ កុសល តួអង្គសំខាន់ក្នុងរឿង "កូនមាសម្ដាយ" ខ្សែភាពយន្ដឯកសារបានពីក្រុងសាន់ហ្រាន់ស៊ីសកូ

បន្ថែមលើនេះ ផ្អែកតាមសេចក្ដីប្រកាសព័ត៌មានរបស់ផលិតកម្ម ស្ទូឌីយ៉ូរីវ៉ូល បានឲ្យដឹងបន្ថែមថា រឿង "កូនមាសម្ដាយ" គឺជារឿងឯកសារស្ដីពីជីវិតកវីនិរទេស លោក ខៀវ កុសល ក្រោយពីលោកត្រូវបានអញ្ជើញឲ្យសម្ដែងជាតំណាងប្រទេសកម្ពុជានៅកម្មវិធីវប្បធម៌អូឡាំព្យានៅទីក្រុងឡុងនាឆ្នាំ ២០១២។

រឿង "កូនមាសម្ដាយ" ជាស្នាដៃរបស់ផលិតករឈ្មោះ ម៉ាសាហ៊ីរ៉ូ ស៊ូកាណុ ជាជនជាតិជប៉ុន ដែលលោកចង់បង្ហាញពីយុវជនឆេវឆាវ តែមានភាពប៉ិនប្រសប់ និង ស្រស់ថ្លាម្នាក់ដែលតស៊ូស្វែងរកគោលដៅជីវិតមួយផ្អែកទៅលើពាក្យកាព្យជាភាសាអង់គ្លេស ក្រោយពីបានសេរីភាពដែលជាចំណងដៃ នៃការនិរទេសរបស់លោក។ ការសម្ដែងរបស់កុសលនៅទីកុ្រងឡុង គឺជាពេលជោគជ័យរបស់ កុសល ទាំងនៅអាមេរិក និង កម្ពុជា។

ឈុតមួយ កុសល ស្រក់ទឹកភ្នែកគ្រាច្រៀងកាព្យជាភាសាអង់គ្លេស ទៅកាន់មហាជន

ទាក់ទងទៅនឹងបញ្ហានេះ អ្នកស្រី អានីដា បាននិយាយបន្ថែមថា "ពាក្យសម្ដី លាយជាមួយតន្រ្តី ល្ខោន ថាមពលស្រស់ៗ និង មន្តស្នេហ៍របស់កុសល បានផ្ដល់នូវធាតុកម្សាន្តមួយ ដែលបានធ្វើឲ្យអ្នកទស្សនាទូទៅដែលធម្មតាមានការមិនពេញចិត្តចំពោះការនិរទេសអ្នកទោសនោះ ឲ្យមានពន្លឺបន្ថែមទៀតចំពោះបញ្ហានេះ។ បើទោះជាកុសល បានទទួលបម្រាមហាមមួយជីវិតមិនឲ្យចូលទៅសហរដ្ឋអាមេរិកក៏ដោយ ពួកយើងសង្ឃឹមថា រឿងរបស់លោក ខ្លឹមសារ និង ការងារដែលបានជំរុញទឹកចិត្តទាំងអស់នេះអាចទៅដល់កន្លែង ប៉ុន្តែ រូបរាងរបស់លោកមិនអាចទៅដល់"។

លោក ជី សិលា នាយកប្រតិបត្តិក្រុមហ៊ុន SABAY DIGITAL CORP. បានមានប្រសាសន៍ថា "Sabay គឺជាក្រុមហ៊ុនឈានមុខគេក្នុងការផ្ដល់ការកម្សាន្តបែបឌីជីថលដំបូងគេនៅកម្ពុជា។ ពួកយើងគាំទ្រសមិទ្ធិករភាពយន្តឯករាជ្យជាពិសេសគឺអ្នកដែលចាប់អារម្មណ៍នៅក្នុងការប្រាប់រឿងរ៉ាវដែលកើតឡើងនៅក្នុងស្រុកខ្មែរ។ បន្ទាប់ពីក្រុមការងារសប្បាយបានមើលភាពយន្តរឿង "កូនមាសម្ដាយ" ពួកយើងដឹងថា វាគឺជារឿងសំខាន់មួយសម្រាប់បញ្ចាំងឲ្យទស្សនិកជនបានទស្សនាពីព្រោះ ប្រជាជនត្រូវការមើលឃើញនូវអ្វីដែលខុសប្លែកពីមុន អ្វីដែលអាចជំរុញពួកគេឲ្យគិតកាន់តែស៊ីជម្រៅអំពីអត្ថន័យក្នុងនាមជាខ្មែរក្នុងពេលបច្ចុប្បន្ន"។

គេនៅចាំបានថា ខ្សែភាពយន្តឯកសាររឿង "កូនមាសម្ដាយ" បានទទួលពានរង្វាន់ជាខ្សែភាពយន្តឯកសារល្អបំផុតប្រចាំឆ្នាំ ២០១៤ ពីក្រុងសាន់ហ្វ្រាន់ស៊ីស្កូ សហរដ្ឋអាមេរិក ក្រោយពីបានយកទៅចាក់បញ្ចាំងលើកដំបូងនៅក្នុងមហោស្រពភាពយន្តអន្តរជាតិនៃមជ្ឈមណ្ឌលសម្រាប់ការផ្សព្វផ្សាយរបស់ប្រជាជនអាស៊ី-អាមេរិកលើកទី ៣២។

ខ្សែភាពយន្តដែលទទួលបានពានរង្វាន់មួយនេះ នឹងយកមកចាក់បញ្ចាំងលើកដំបូង គឺនៅរោងភាពយន្ត Major Cineplex by Cellcard នៅផ្សារទំនើប AEON នាថ្ងៃទី ២៩ ខែ មករា ឆ្នាំ ២០១៥ ចាប់ពីម៉ោង ៦ ល្ងាច។ ភ្ញៀវកិត្តិយសដែលត្រូវបានអញ្ជើញចូលរួម មានដៃគូផលិត អ្នកចូលរួមវិភាគទាន សមាជិកសំខាន់ៗនៃឧស្សាហកម្មភាពយន្ត អ្នកដែលមានមុខនៅក្នុងរឿង និង សមាជិកអ្នកសារព័ត៌មាននានា។ ដោយឡែក ខ្សែភាពយន្តនេះនឹងត្រូវចាក់បញ្ចាំងជូនជាសាធារណៈចាប់ពីថ្ងៃសុក្រ ទី ៣០ ខែ មករា នៅរោងភាពយន្ត Major Cineplex by Cellcard, Platinum Cineplex និង រោងភាពយន្ត Legend Cinema។ ខ្សែភាពយន្តនេះ នឹងត្រូវចាក់បញ្ចាំងយ៉ាងហោចណាស់រយៈពេលពេញមួយសប្ដាហ៍នៅក្នុងរោងភាពយន្តចំនួន ៥ ក្នុង រាជធានីភ្នំពេញ៕