ទីបំផុត! ឌីជេ ឡាយអិន បានត្រឹមពោលពាក្យអហោសិកម្ម

2015-01-19 17:10:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ឌីជេ ឡាយអិន បានត្រឹមពោលពាក្យថា អហោសិកម្មឲ្យអតីតភរិយា អ្នកនាង សន សុម៉ាលីនដា ប៉ុណ្ណោះ ក្រោយចំណងអាពាហ៍ពិពាហ៍រយៈពេលជាច្រើនឆ្នាំបានបញ្ចប់ ក្រោមអំណាចសាលក្រមតុលាការ ដែលបានជំនុំជម្រះ កាលពីថ្ងៃទី ១៥ ខែមករា កន្លងទៅនេះ។

លោកប្រាប់ Sabay ថា៖ "ខ្ញុំមានតែដើរតាមផ្លូវរបស់ខ្ញុំ ហើយនាងដើរតាមផ្លូវរបស់នាងចុះ សង្ឃឹមថា បានសុខជារៀងរហូតទៅ កុំដូចពេលនេះទៀត"។ ពិធីកររូបនេះបន្តថា នឹងត្រលប់ទៅរៀបចំជីវិតឡើងវិញ មិនបន្តធ្វើបាបខ្លួនឯងទៀតទេ ព្រោះរយៈពេល ៣ ខែ កន្លងមក មិនឃើញបានផលប្រយោជន៍អ្វីសោះ ថែមទាំងខាតពេលវេលាទៀតផង។

ឡាយអិន បានអះអាងថា នីតិវិធីរបស់តុលាការបានសម្រេចឲ្យអតីតភរិយា ជាអ្នករក្សាកូនទាំងអស់។ ចំណែករូបគេមិនបានរក្សាកូននោះទេ ហើយក៏គ្មានការបង់អាហារកិច្ចចិញ្ចឹមរហូតដល់កូនៗមាននីតិភាពនោះដែរ ព្រោះភាគីម្ដាយមានលទ្ធភាព ហើយមិនព្រមទទួលយកនោះដែរ។

“ទោះបីយ៉ាងណាក៏ដោយ ឈាមរបស់ខ្ញុំនៅទីណា ខ្ញុំក៏ទៅដល់ទីនោះដែរ ដាច់ខាតមិនបោះបង់កូនទេ"។ ឡាយអិន បង្ហាញជំហរថា នឹងស្កាត់ទៅជួបកូនទាំងអស់ ប្រសិនបើមានការនឹករលឹក ហើយសង្ឃឹមថា ភាគីម្ដាយអនុញ្ញាត ឱ្យឪពុកកូនពួកគេបានជួបគ្នាម្ដងម្កាល តាមបំណង ទោះមិនបានចិញ្ចឹមបីបាច់ដោយផ្ទាល់យ៉ាងណាក្ដី។

ពិធីករក្រមិចក្រមើមរូបនេះ បានឱ្យដឹងដែរថា ពេលដុំពពកខ្មៅនៃជីវិតរបស់គេបានរសាត់អស់ហើយ មានតែការរៀបចំជីវិតថ្មីប៉ុណ្ណោះ។ ប៉ុន្តែជាដំបូងរូបគេ ត្រូវរៀបចំសេដ្ឋកិច្ចជាមុនសិនទើបបាន ព្រោះបើមានលុយគ្រប់គ្រាន់ហើយនោះ ងាយស្រួលក្នុងការរៀបចំផែនការជីវិត៕