ទឹម រដ្ឋា សម្រុកស្ដារដើម

2015-01-19 16:44:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយសម្រេចដើរចេញពីប្រុសស្នេហ៍ប៉ាគីស្ថាន លោក Zak Ky មក ទឹម រដ្ឋា បាននិយាយប្រាប់ Sabay ថា ចាប់ពីពេលនេះទៅ នាងសម្រុកការងារសិល្បៈឡើងវិញ ត្បិតអីកន្លងមកការងារសិល្បៈហាក់ធ្លាក់ចុះជាខ្លាំង។

កាលនៅទំនាក់ទំនងជាមួយ លោក Zak Ky ទឹម រដ្ឋា មិនសូវមានមុខសម្ដែង និង ការច្រៀងឡើយ ព្រោះតែនាងបំពេញចិត្តសង្សារ សញ្ជាតិប៉ាគីស្ថាន ដែលមិនចង់ឲ្យប្រុសផ្សេង មកប៉ះសាច់ ទឹម រដ្ឋា។ កាលណោះ ទឹម រដ្ឋា ទទួលតែការដើរម៉ូដ ហើយក៏មិនសូវមានច្រើនដែរ រាល់ការទៅណាមកណា សង្សារនាងទៅតាមជាប់ជានិច្ច។ ដោយសារតែហេតុផល ប្រចណ្ឌជ្រុល ទើបតារាស្រីម្នាក់នេះសម្រេចដើរចេញ។

ទឹម រដ្ឋា បានលើកឡើងថា រាប់ពីថ្ងៃនេះទៅ នាងលែងខ្វល់រឿងស្នេហាទៀតហើយ អ្វីដែលនាងត្រូវគិត គឺ សម្រុកការងារសិល្បៈឡើងវិញ។ ទាំងការងារតូច ឬ ធំ ទទួលទាំងអស់ ហើយនាងត្រូវប្រើពេលវេលានៅជាមួយសិល្បៈឲ្យបានច្រើនដូចមុន លែងបដិសេធទៀតហើយ។

បច្ចុប្បន្ន នៅមិនទាន់មានស្ថានីយទូរទស្សន៍ ឬ ផលិតកម្មហៅថតច្រើនទេ ព្រោះអ្នកដឹកនាំសិល្បៈមួយចំនួន មិនទាន់ដឹងថា នាងនឹងសម្រុកការងារសិល្បៈឡើងវិញ ដោយកន្លងមកតារាស្រីសិចស៊ីរូបនេះ តែងតែប្រកែកទទួលការងារ។

ចំពោះសំណួរថា តើការចាប់ផ្ដើមសម្រុកការងារសិល្បៈវិញ និង ការរំពឹងថា ទទួលបានការគាំទ្រដូចដើម ឬ យ៉ាងណា? ទឹម រដ្ឋា បានលើកឡើងថា មិនទាន់ហ៊ានសន្និដ្ឋានបានយ៉ាងណានៅឡើយ តែនាង និង ព្យាយាមឲ្យបានសម្រេចតាមបំណង ដែលអាចធ្វើទៅបាន ៕

សូមចុចអាន៖ ពីរសន្លឹកបង្ហាញអារម្មណ៍មិនស្ថិតក្នុងខ្លួន ទឹម រដ្ឋា ក្រោយបាក់បែកស្នេហ៍បុរស ប៉ាគីស្ថាន!

សូមចុចអាន៖ ទឹម រដ្ឋា បញ្ជាក់បន្ថែមរឿងចែកផ្លូវជាមួយប្រុសស្នេហ៍ប៉ាគីស្ថាន

អត្ថបទ៖ ខុត សីហា