ព្រហ្ម ម៉ាញ និងយាយ យ៉យ ធ្វើឲ្យផ្អើលអ្នករតនគិរីថ្ងៃពិព័រណ៍កសិកម្មជនជាតិដើម

2015-01-27 12:20:51
ចំនួនមតិ 0 | ចំនួនចែករំលែក 0

ចន្លោះមិនឃើញ

វត្តមានរបស់អ្នកអាយ៉ៃជើងចាស់លោក ព្រហ្ម ម៉ាញ និងអ្នកស្រី នួន សារី ហៅយាយ យ៉យ បានធ្វើឲ្យការតាំងពិព័រណ៍ផលិតផលជនជាតិដើមភាគតិចនៃខេត្តរតនគិរី រៀបចំដោយគម្រោង អាណាឌីយ៉ា នៃអង្គការCEDAC ហាក់កាន់តែមានភាពអ៊ូអរសប្បាយរីករាយ ដោយមនុស្សម្នាគ្រប់វ័យបានចូលទស្សនាយ៉ាងច្រើនកុះករនាចុងសប្ដាហ៍មុន។

លោក ព្រហ្ម ម៉ាញ បង្ហាញនូវការសប្បាយរីករាយចំពោះឱកាសនៃការសម្ដែងលើទឹកដីភូមិភាគឦសានមួយនេះ។ ជាពិសេសបានឃើញការរីកចំរើន របស់ជនជាតិដើមភាគតិច ដែលមានការរស់នៅកាន់តែប្រសើរជាងមុន ពាក់ព័ន្ធទៅនឹងផ្នែកសេដ្ឋកិច្ចគ្រួសារ អនាម័យរស់នៅជាដើមបន្ទាប់ពីការចូលរួមរបស់អង្គការក្រៅរាជរដ្ឋាភិបាលមួយចំនួន ដែលតែងយកចិត្តទុកដាក់ចំពោះជនជាតិដើមភាគតិច។

លោកប្រាប់Sabayថា៖" ខ្ញុំបានមកច្រៀងអាយ៉ៃរាល់ឆ្នាំ ដូច្នេះអាចកត់សម្គាល់ដឹងថា បងប្អូនមានការប្រសើរជាងពីមុន ជាពិសេសវិស័យកសិកម្មរបស់ពូកគាត់"។

អ្នកអាយ៉ៃជើងចាស់រូបនេះចាប់អារម្មណ៍ថា ប្រសិនបើជនជាតិដើមមិនធ្វើកសិកម្មទេ គឺមិនអាចមានអ្វីផ្សេងក្រៅពីនេះបានទេ។ ហើយប្រសិនបើគ្មានការអភិវឌ្ឍន៍លើសម្រាប់វិស័យកសិកម្មចំពោះពូកគាត់ក៏មិនអាចសម្រួលដល់ជីវភាពរបស់ពូកគាត់បានដែរ ព្រោះមនុស្សចេះតែមានការកើនឡើងដូច្នេះ។

ប៉ុន្តែយ៉ាងណាអ្នកលេងសំដីរូបនេះ បន្ថែមថា ការចូលរួមឆ្នាំនេះមានលក្ខណៈច្រើនជាងឆ្នាំមុនទាំងអ្នកមកតាំងពិព័រណ៍ និងអ្នកមកទស្សនា។ លោកថា៖" ការសប្បាយរបស់ប្រជាពលរដ្ឋនៅទីនេះ ក៏ជាការសប្បាយរីករាយរបស់ខ្ញុំដូចគ្នាដែរ យើងមិនដែលមានការរើសអើង"។

ការតាំងពិព័រណ៍បញ្ចប់ទៅនៅថ្ងៃនេះ ដោយចាប់ផ្ដើមតាំងពីថ្ងៃទី១៣កន្លងទៅ។ គេសង្កេតឃើញមានផលិតផលកសិកម្មរបស់ជនជាតិដើមភាគតិច ត្រូវបានដាក់តាំងបង្ហាញ រួមផ្សំទាំងវប្បធម៌ជនជាតិដើមទាំងនោះផងដែរ៕