ទង្វើសប្បុរសជនធ្វើឲ្យ នូ ស៊ឹប រំជួលចិត្ត

2015-02-05 15:35:03
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងជើងចាស់ នូ ស៊ឹប បានសម្ដែងអារម្មណ៍រំជួលចិត្ត ហើយរៀបរាប់ទាំងអួលដើមក ពេលបានទទួលប្រាក់ឧបត្ថម្ភមួយចំនួន ពីសប្បុរសជន និងសិល្បករជំនាន់ក្រោយ។

លោក នូ ស៊ឹប និយាយថា៖ "យ៉ាងហោចណាស់ ខ្ញុំអាចដោះស្រាយជីវភាពបានមួយរយៈដែរ ស្របពេលដែលយើងឈឺមិនដឹងរកអីបាន"។ តារាចម្រៀងរូបនេះបន្តទៀតថា នេះជាកាយវិការមួយ ដែលមិនអាចបំភ្លេចបានក្នុងនាមជាសិល្បករជើងចាស់ម្នាក់។

ជាមួយគ្នានោះលោកបានបញ្ជាក់មកកាន់Sabay ពេលនេះស្ថានភាពរបួសកាន់តែប្រសើរហើយដែរ ប៉ុន្តែនៅមិនទាន់កម្រើក ឬលើកដៃខាងឆ្វេងបាននៅឡើយទេ ព្រោះកាលជួបគ្រោះថ្នាក់ចរាចរណ៍ មានការប៉ះទង្គិចខ្លាំងជាងគេ ហើយដាច់រលាត់ទៀតផង។ លោកបន្តថា មនុស្សចាស់ប្រសិនបើមានការប៉ះពាល់កន្លែងណាហើយ មិនងាយដូចដើមនោះទេ។

ប៉ុន្តែទោះបីជាយ៉ាងណា តារាចម្រៀងជើងចាស់ នូ ស៊ឹប សង្ឃឹមថា នឹងអាចជាសះស្បើយក្នុងពេលឆាប់ៗ ដើម្បីត្រឡប់ទៅកាន់ឆាកតន្ត្រីនៃភោជនីយដ្ឋាន Lucky Bright ដែលជាកន្លែងរកកម្រៃចិញ្ចឹមជីវិតជាប្រចាំរបស់លោក មុនពេលជួបគ្រោះថ្នាក់។ ចុងក្រោយលោក នូ ស៊ឹប និយាយថា៖ "សូមអរគុណ ដល់សប្បុរសជន និងកូនក្មួយសិល្បករជំនាន់ក្រោយ ដែលបានជួយខ្ញុំនៅក្នុងគ្រាលំបាកនេះ"៕