អេមហួស...ជា លាងឈែ ចាប់ផ្ដើមភ្លាម ប៉ះឈុតក្ដៅសាច់ភ្លែត !

2015-02-04 17:51:38
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ជា លាងឈែ ដែលទើបនឹងចាប់ផ្ដើមជីវិតសម្ដែងភាពយន្តដំបូងបំផុតតាមរយៈ រឿង "អូនជាការចងចាំបង" ឬ "You're My Memory” នោះ ប្រាប់ថា ជួបការលំបាកយ៉ាងខ្លាំង ពេលចាប់អាជីពសម្ដែងភ្លាម ប្រទះឈុតក្ដៅសាច់ដូច្នេះ។

“សម្រាប់ខ្ញុំ ឈុតដែលពិបាកបំផុតក្នុងរឿងនេះ គឺជាឈុតក្ដៅសាច់(សើច)"។ លោក ជា លាងឈែ ឆ្លើយតបនឹងសំណួររបស់អ្នកសារព័ត៌មានក្នុងថ្ងៃសន្និសីទបើកសម្ពោធខ្សែភាពយន្តស្នេហាយុវវ័យដ៏រ៉ូមែនទិកខាងលើនៅរោងភាពយន្ត Platinum Cineplex។

នៅក្នុងរឿង "អូនជាការចងចាំបង" លោក លាងឈែ ដែលដើរតួឈ្មោះ "មករា" គឺជាគូស្នេហ៍របស់កញ្ញា យូប៊ីន សម្ដែងជាតួឈ្មោះ "លក្ខណ៍"។ លោក ត្រូវជនមួយក្រុមដែលស្រឡាញ់ស្រី លក្ខណ៍តាមព្យាបាទ ដោយបង្ខំឲ្យលេខាដាក់ថ្នាំបង្កើនចំណង់ផ្លូវភេទក្នុងកែវកាហ្វេរបស់លោក លាងឈែ ឬ មករា។

ក្រោមអំណាចថ្នាំ លោកបានរួមស្នេហាយ៉ាងវក់វីក្ដៅសាច់ ក្ដៅខ្លួនជាមួយនារីម្នាក់ ដែលជនមួយក្រុមនោះជួលមកសម្រាប់ល្បែងនេះ ដើម្បីបង្កើតការយល់ច្រឡំរវាងស្រីលក្ខណ៍ និងមករា ពោលគឺបំបែកពួកគេ។ "ពិបាកមែនទែនឈុតហ្នឹង ទី១ដោយសារការសម្ដែងដំបូង ទី២ឈុតនេះ ថតប្រើកាមេរ៉ាតែមួយ អត់អាចកាត់តបានទេ គឺថតយកតាំងពីដើមរហូតដល់ចប់តែម្ដង ប៉ុន្តែជាក់ស្ដែងពិបាកដាក់អារម្មណ៍ មិនមែនតែពីរនាក់ឯណា មានបងៗអ្នកថតច្រើនទៀត"។ លាងឈែ ថ្លែង។

ទម្រាំថតឈុតនេះយកជាការបានប្រើពេលអស់រាប់ម៉ោងឯណោះ។ បេក្ខភាពក្នុងកម្មវិធីប្រុសស្អាតរូបនេះ ថ្លែងថា។ "និយាយទៅ ច្រើនដងណាស់ទម្រាំតែត្រូវ គឺដូចជា៦-៧ដងឯណោះ ហើយខ្ញុំក៏ត្រូវកំផ្លៀងរបស់តួស្រីក៏ច្រើនដែរបង(សើច)!"។

លោក លាងឈែ បញ្ជាក់ថា លោកត្រូវកំផ្លៀងរបស់តួស្រី មិនមែនដោយសារលោកសម្ដែងជ្រុលជ្រួសហួសលើគេទេ តែឈុតនេះគេតម្រូវឲ្យត្រូវកំផ្លៀងអីចឹងតែម្ដង ព្រោះតាមសាច់រឿងពេលពួកលោកកំពុងនៅលើគ្រែជាមួយនារីម្នាក់នោះ គូស្នេហ៍របស់លោក ស្រីលក្ខណ៍ សម្ដែងដោយកញ្ញា យូប៊ីន បានចូលមកឃើញ។

ជា លាងឈែ គឺជាអតីតបេក្ខភាពប្រឡងក្នុងកម្មវិធី "Freshies Boy & Girl” ឆ្នាំ ២០១១។ លោក មិនបានជាប់ចំណាត់ថ្នាក់ទេ គឺបានត្រឹមវគ្គពាក់កណ្ដាលផ្ដាច់ព្រ័ត្រប៉ុណ្ណោះ។ យ៉ាងក្រោយត្រូវជម្រុះចេញ លោកបានទៅរៀនដើរម៉ូដក្នុងក្រុមបង្ហាញម៉ូដ Sun Super Model។ បន្តមក លោក លាងឈែ បានចេញដើរម៉ូដក្នុងកម្មវិធីធំៗជាច្រើន ប៉ុន្តែមិនដែលបានសម្ដែងភាពយន្តទេ។

លោក ថា "អូនជាការចងចាំបង" ឬ "You're My Memory” ភាពយន្តស្នេហាយុវវ័យដ៏រ៉ូមែនទិក គឺជាស្នាដៃទី១របស់លោក។ ចំណងដៃសម្រាប់ថ្ងៃនៃសេចក្ដីស្រឡាញ់ដែលនឹងមកដល់ខាងមុខនេះ នឹងមានចាក់បញ្ចាំងនៅរោងភាពយន្ត Major Cineplex By Cellcard, Platinum Cineplex និង Legend គ្រប់សាខា ចាប់ពីថ្ងៃទី ០៦ កុម្ភៈនេះតទៅ...៕