តារាសម្ដែង នៅ ណាវីន ក្រឡាប់ឡាន ម្សិលមិញ

2015-02-13 16:20:09
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅម៉ោងជិត ១ រសៀល ម្សិលមិញ តារាសម្ដែងសិចស៊ី កញ្ញា នៅ ណាវីន បានជួបគ្រោះថ្នាក់ចរាចរណ៍ក្រឡាប់រថយន្តក្នុងទឹកដី ខេត្ត ព្រះវិហារ គ្រាដែលនាង និង ក្រុមគ្រួសារ ធ្វើដំណើរកម្សាន្ត និង មើលកន្លែងរកស៊ីនៅទីនោះ។ នេះតាមការប្រាប់ឲ្យដឹង ពីកញ្ញា នៅ ណាវីន។

តាមការរៀបរាប់ពី កញ្ញា នៅ ណាវីន បានប្រាប់ Sabay តាមទូរសព្ទព្រឹកនេះថា កាលពីម្សិលមិញនាង និង ក្រុមគ្រួសារមានគ្នាទាំងអស់ ៧ នាក់ បានធ្វើដំណើរទៅខេត្ត ព្រះវិហារ ដើម្បីដើរលេងក៏ដូចជាទៅមើលកន្លែងរកស៊ីនៅទីនោះ។ ពេលដែលកំពុងធ្វើដំណើរតាមផ្លូវរថយន្ដរបស់នាងបានបែកកង់ក្រោយ នៅចំណុចហួសផ្សារព្រះប្រណាក់បន្ដិច ស្ថិតក្នុងសង្កាត់ កំពង់ប្រណាក់ ក្នុងក្រុងព្រះវិហារ នៅវេលាម៉ោង ជិត ១ រសៀលម្សិលមិញ។ នៅក្នុងហេតុការណ៍នេះ ណាវីន គឺជា អ្នកកាន់ចង្កូត រថយន្ដ LEXUS RX 300 ពាក់ស្លាកលេខ សៀមរាប 2A-5347។

ណាវីន និយាយបន្ដថា ភ្លាមៗនេះ រថយន្តបានទាញចង្កូត ធ្លាក់ផ្លូវ ហើយក្រឡាប់ជាច្រើនត្រឡប់ ប៉ុន្តែ ជាសំណាងល្អមនុស្សទាំង ៧ នាក់ ដែលនៅក្នុងរថយន្តនេះ មិនមានគ្រោះថ្នាក់ធ្ងន់ធ្ងរឡើយ ដោយគ្រាន់តែរលាត់ដៃជើងបន្តិចបន្តួចតែប៉ុណ្ណោះ។ អ្វីដែលសំណាងជាងគេនោះ ក្មួយរបស់នាងដែលទើបតែសម្រាលកូនបាន ១ ខែ ជាង ក៏មិនមានគ្រោះថ្នាក់ដែរ ។

រថយន្ត LEXUS RX300 ដែលនាងបានទិញ ក្នុងតម្លៃ ១១៨០០ ដុល្លារនោះ ខួចខាតស្ទើរតែទាំងស្រុង។ កញ្ញា នៅ ណាវីន បានប្រាប់ថា ការបើកបររបស់នាង មិនជាអ្នកលឿនខ្លាំងហួសហេតុឡើយ ប៉ុន្តែ ហេតុការណ៍អាក្រក់នេះបានកើតឡើង។ បច្ចុប្បន្នរថយន្ត LEXUS RX300 របស់នាង បានដឹកយកទៅជួសជុលនៅ ខេត្ត សៀមរាម ចំណែកនាង និង ក្រុមគ្រួសារ ដោយមិនមានគ្រោះថ្នាក់ធ្ងន់ធ្ងរ កំពុងតែសម្រាកព្យាបាលនៅផ្ទះ៕