ទាំងរដ្ឋមន្ត្រី ទាំងអ្នកសិល្បៈ រួមគ្នាជួយ អ៊ុំ គន្ធា
- 2015-02-14 00:16:29
- ចំនួនមតិ 0 | ចំនួនចែករំលែក 0
ទាំងរដ្ឋមន្ត្រី ទាំងអ្នកសិល្បៈ រួមគ្នាជួយ អ៊ុំ គន្ធា
ចន្លោះមិនឃើញ
ឯកឧត្ដម ខៀវ កញ្ញារីទ្ធ រដ្ឋមន្ត្រីក្រសួងព័ត៌មាន និង សិល្បករ សិល្បៈការិនី ទាំងក្មេង-ចាស់ ជាច្រើននាក់ បានឧបត្ថម្ភប្រាក់ និងសម្ភារៈមួយចំនួន ដល់អ្នកនាង អ៊ុំ គន្ធា អតីតតារាចម្រៀង ដែលបានរស់នៅជាមួយមេរោគអេដស៍ជាច្រើនឆ្នាំមកហើយ។ កម្មវិធីនេះធ្វើឡើងនៅភោជនីយដ្ឋានអូប៉េរ៉ា កាលពីព្រឹកមិញ នៅតាមបណ្ដោយផ្លូវ ២០០៤ ក្រោមការផ្ដួចផ្ដើម របស់តារាសម្ដែង និង ជាពិធីករ លោក អ៊ឹម ជីវ៉ា។ សិល្បករ សិល្បការិនី ទាំងក្មេង និង ចាស់ដែលបានចូលរួមក្នុងកម្មវិធីនេះ មានជិត ១០០ នាក់។
លោក អ៊ឹម ជីវ៉ា ដែលជាអ្នកផ្ដួចផ្ដើមកម្មវិធីបានលើកឡើងថា កម្មវិធីនេះ មិនមែនធ្វើឡើង ដើម្បីសម្រាប់តែអ្នកនាង អ៊ុំ គន្ធា ម្នាក់ទេ ពោលការធ្វើនេះ ដើម្បីឲ្យអ្នកសិល្បៈទាំងអស់គ្នា ចេះជួយ និង សាមគ្គីគ្នា គ្រាដែលមានអ្នកណាម្នាក់ជួបការលំបាក។
លោកបានបន្តថា ដោយសារតែបានមើលឃើញសិល្បករ សិល្បការិនីមួយចំនួនជួបការលំបាក និង មួយចំនួនទៀតមិនចេះសាមគ្គីគ្នា ទើបលោកស្នើសុំទៅ ឯកឧត្ដម ខៀវ កញ្ញារីទ្ធ ជួយឧបត្ថម្ភក្នុងកម្មវិធីនេះឡើង ដើម្បីរៀបចំឲ្យមានការជួបជុំសំណេះសំណាលគ្នា និង ពិសាអាហារជាមួយគ្នាមួយពេល។ កម្មវិធីទាំងមូល ត្រូវបាន ឯកឧត្ដម ខៀវ កញ្ញារីទ្ធ រដ្ឋមន្ត្រីក្រសួងព័ត៌មាន ឧបត្ថម្ភទាំងស្រុង។
ឯកឧត្ដម ខៀវ កញ្ញារីទ្ធ បានលើកទឹកចិត្តដល់អ្នកនាង អ៊ុំ គន្ធា សូមកុំអស់សង្ឃឹម ឬ បាក់ទឹកចិត្ត ព្រោះមេរោគអេដស៍មិនមែនជា មេរោគ ដែលគួរឲ្យខ្លាចដូចមុនឡើយ ដោយសារតែបច្ចុប្បន្ននេះ មានថ្នាំល្បីៗពន្យារមេរោគច្រើនមុខណាស់។ ជាមួយគ្នានោះឯកឧត្ដម ខៀវ កញ្ញារីទ្ធ ក៏បានឧបត្ថម្ភ សម្ភារៈ និង ប្រាក់មួយចំនួនដល់អ្នកនាង អុំ គន្ធា ។ អ្វីដែលពិសេសជាងនេះ កូនប្រុសទាំង ២ របស់តារាស្រីម្នាក់នេះ ក៏ត្រូវបាន ឯកឧត្ដម សន្យាថា នឹងជួយទំនុកបម្រុងលើ ការរៀនសូត្រផងដែរ។
ក្រៅពី ឯកឧត្ដម ខៀវ កញ្ញារីទ្ធ ក៏មានសប្បុរសជន និង សិល្បករ-សិល្បការិនីជាច្រើននាក់ បានចូលរួមជាថវិកាជួយ អុំ គន្ធា ផងដែរ។
អុំ គន្ធា បានសម្ដែងអារម្មណ៍ក្ដុកក្ដួលជាខ្លាំង នៅពេលឃើញ ឯកឧត្ដម ខៀវ កញ្ញារីទ្ធ សប្បុរសជន និង សិល្បករសិល្បការិនី ដែលមិនបានរើសអើងនាង ហើយថែមទាំងជួយឧបត្ថម្ភជាថវិកា ក៏ដូច សម្ភារៈដល់ក្រុមគ្រួសារនាង។ គន្ធា បានសុំទោសដល់ទស្សនិកជននៅទង្វើខុសឆ្គងរបស់នាងកន្លងមក ហើយនាងស្នើឲ្យ សិល្បករ-សិល្បការិនីទាំងអស់ ដាច់ខាតកុំយកគំរូតាមនាងឲ្យសោះ។
អ្នកនាង អុំ គន្ធា ជាអតីតភរិយា តារាចម្រៀង លោក ផាន សុផាត។ តាមការរៀបរាប់របស់តារាស្រីម្នាក់នេះ នាងបានរស់នៅ និង លាក់រឿង នាងមានផ្ទុកមេរោគអេដស៍ជាង ១៣ ឆ្នាំ មកហើយ បច្ចុប្បន្ននាងកំពុងតែទទួលការព្យាបាលពីអង្គការមួយ។ ក្នុងនោះដែរ នាងក៏ជាបុគ្គលិកក្នុងអង្គការមួយដែរ ដោយបច្ចុប្បន្ននាងទទួលបន្ទុកខាងបើកថ្នាំឲ្យអ្នក ផ្ទុកមេរោគអេដស៍ នៅមន្ទីរពេទ្យរុស្សី៕
អានអត្ថបទ៖ មើលតារាល្បីៗក្នុងពិធីបើកសម្ពោធជាផ្លូវការ Domino’s Pizza យប់មិញ អានអត្ថបទ៖ តារាសម្ដែង នៅ ណាវីន ក្រឡាប់ឡាន ម្សិលមិញ អត្ថបទ៖ ខុត សីហា