៨ មីនា ឆ្នាំនេះក្រសួងកិច្ចការនារីធ្វើអ្វីសម្រាប់សមភាពយេនឌ័រ?

2015-02-27 21:23:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីចូលរួមយុទ្ធនាការទិវានារីអន្តរជាតិ៨ មីនា ក្រសួងកិច្ចការនារីបានសហការជាមួយស្ថាប័នពាក់ព័ន្ធរៀបចំនូវសកម្មភាពនានាក្នុងការលើកម្ពស់សមភាពរវាងយេនឌ័ររវាងបុរសនិងស្ត្រី។

ឆ្នាំនេះក្រសួងកិច្ចការនារីនិងគណៈកម្មាធិការបានរៀបចំជ្រើសរើសប្រធានបទ "ដំណើរឆ្ពោះទៅមុខស្ត្រីកម្ពុជាក្រោយសន្និសីទស្ត្រីពិភពលោកឆ្នាំ១៩៩៥" ដើម្បីរំលឹកពីការតស៊ូរបស់នារីពលករទូទាំងសាកលលោកក្នុងការទាម ទារសិទ្ធិសេរីភាព ប្រជាធិបតេយ្យ និងការអនុវត្តសិទ្ធស្មើភាពរវាងបុរសស្ត្រីក៏ដូចជាពិនិត្យឡើង វិញ សមិទ្ធផលនានាដែលកើតមានក្នុងរយៈពេល២០ឆ្នាំ ក្រោយពីសន្និសីទស្ត្រីពិភពលោកឆ្នាំ១៩៩៥ និងធ្វើការបំផុសនិងកៀរគរប្រជាពលរដ្ឋកម្ពុជា ឲ្យធ្វើការរួមគ្នាដើម្បីឈានទៅសម្រេចបាននូវសមភាពដ៏ពិតប្រាកដ រវាងបុរសនិងស្ត្រី។

លោកជំទាវ វេជ្ជបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី

ក្នុងកម្មវិធីយុវជនជជែកពិភាក្សានេះដែលធ្វើឡើងនៅស្ថានីយទូរទស្សន៍ជាតិកម្ពុជា លោកជំទាវ វេជ្ជបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារីមានប្រសាសន៍ថា៖ "ប្រធានបទដែលនឹងលើកយកកពិភាក្សាក្នុងឱកាសនេះ គឺជាវិភាគទានថ្មីៗដែលជួយលើកកម្ពស់ការយល់ដឹងនិងមានអត្ថន័យសំខាន់ក្នុងការផ្ដល់សារជូនចំពោះទស្សនិកជននិងសាធារណជនដើម្បីជំរុញកែលំអ ផ្នត់គំនិតរវាងបុរសនិងស្ត្រីឲ្យកាន់តែទទួលបាននូវភាពដូចគ្នា ដែលចូលរួមចំណែកកិច្ចពន្លឿនអភិវឌ្ឍន៍ជាតិ ដែលប្រៀបធៀបស្ត្រីជាឆ្អឹងខ្នងសង្គមនិងសេដ្ឋកិច្ចជាតិ"។

កម្មវិធីនេះបានរៀបចំជារៀងរាល់ឆ្នាំ ហើយនេះជាលើកទី៥ដែលឆ្នាំមុនក្រសួងកិច្ចការនារីបានជ្រើសប្រធានបទធំគឺ "សមភាពនៃការអប់រំមានសារៈសំខាន់ក្នុងកិច្ចអភិវឌ្ឍសង្គម" ។ សម្រាប់ឆ្នាំនេះមានសាកលវិទ្យាល័យចូលរួមដូចជា សាកលវិទ្យាល័យប៊ែលធីអន្តរជាតិ សាកលវិទ្យាល័យបញ្ញាសាស្ត្រកម្ពុជា សាកលវិទ្យាល័យភូមិន្ទកសិកម្ម សាកលវិទ្យាល័យភូមិន្ទភ្នំពេញ សាកលវិទ្យាល័យមេគង្គកម្ពុជា សាកលវិទ្យាល័យភ្នំពេញអន្តរជាតិ សាកលវិទ្យាល័យកម្ពុជា និងវិទ្យាស្ថានវ៉ាន់ដាគណនេយ្យ ដែលត្រូវធ្វើការជជែកពិភាក្សាគ្នាជុំវិញប្រធានបទទាក់ទងនឹងសមភាពយេនឌ័រ៕

សូមអាន៖ ប្រព័ន្ធបច្ចេកវិទ្យាកំពុងដើរតួនាទីសំខាន់ ក្នុងការទប់ស្កាត់អំពើហិង្សាលើស្ត្រី

អត្ថបទ៖ លឹម សុនា