លក្ខខ័ណ្ឌកែប្រែស្ទើរតែទាំងស្រុង មហោស្រពតន្ត្រី និង ចម្រៀងសម័យថ្នាក់ជាតិ ២០១៥

2015-03-03 21:30:08
ចំនួនមតិ 0 | ចំនួនចែករំលែក 0

ចន្លោះមិនឃើញ

មហោស្រពតន្ត្រី និង ចម្រៀងសម័យថ្នាក់ជាតិឆ្នាំ ២០១៥ បានកែប្រែលក្ខខ័ណ្ឌប្រកួតស្ទើរតែទាំងស្រុង បន្ទាប់ពីការរៀបចំពីរឆ្នាំកន្លងមក។

រដ្ឋលេខាធិការ ក្រសួងព័ត៌មាន និង ជាអនុប្រធានអចិន្ត្រៃយ៍គណៈកម្មការរៀបចំមហោស្រពតន្ត្រី និង ចម្រៀងសម័យថ្នាក់ជាតិឆ្នាំ២០១៥ ឯកឧត្ដម ជា ច័ន្ទបរិបូរណ៍ និយាយថា ការរៀបចំកន្លងមកមានចំណុចខ្វះខាតច្រើនតម្រូវឱ្យមានការកែប្រែនីតិវិធីមួយចំនួនដើម្បីឱ្យកម្មវិធីកាន់តែមានសុក្រឹតភាព។

ឯកឧត្ដម ខៀវ កាញារីទ្ធ រដ្ឋមន្ត្រី ក្រសួងព័ត៌មាន ក្នុងសន្និសីទសារព៍ត៌មានព្រឹកមិញ

ឯកឧត្ដមបញ្ជាក់ដូច្នេះថា៖ "យើងបានវាយតម្លៃហើយ កន្លងមកយើងនៅមានចំណុចខ្វះខាតការបង្កើតគំនិតតែងនិពន្ធបទភ្លេង និងទំនុកច្រៀងថ្មីនៅឡើយ។ អីចឹងហើយទើបក្រសួងត្រូវតែកែប្រែលក្ខន្តិកមួយចំនួនដើម្បីឱ្យកម្មវិធីកាន់តែល្អឡើង"។

លក្ខន្តិកត្រូវកែប្រែដើម្បីឱ្យកម្មវិធី មហោស្រពតន្ត្រី និង ចម្រៀងសម័យថ្នាក់ឆ្នាំ ២០១៥ កាន់តែប្រសើរត្រូវ ឯកឧត្ដម ជា ច័ន្ទបរិបូរណ៍ ប្រាប់ថា៖

១ បេក្ខជន និង បេក្ខនារីត្រូវនិពន្ធបទភ្លេង និង ទំនុកច្រៀងថ្មីដោយមិនចម្លងពីនរណានោះទេ និង តម្រូវឱ្យមានតែពីរបទប៉ុណ្ណោះ ខុសប្លែកពីឆ្នាំមុនៗ មានទៅដល់បួនបទ។

២ បេក្ខជន បេក្ខនារីអាចច្រៀងទោល ឬឆ្លងឆ្លើយ ហើយក្រុមតន្ត្រីនីមួយៗត្រូវមានសមាជិកមិនលើសពី ១០ រូប ខុសប្លែកពីការរៀបចំឆ្នាំមុនៗ គឺមិនកំណត់សមាជិកក្រុមឡើយ។

៣ ពានគឺមានតែមួយប៉ុណ្ណោះសម្រាប់ក្រុមលេខ១ ហើយក្រុមលេខ២ និងលេខបីមិនទទួលបានពានទេ គឺទទួលត្រឹមតែ ប្រកាសនីយបត្រ ខុសប្លែកពីឆ្នាំមុនៗកន្លងទៅគឺជយលាភីទទួលពានគ្រាប់គ្នា។

៤ បេក្ខជន ឬក្រុមដែលមានពិន្ទុខ្ពស់ជាងគេនៅតាមសប្ដាហ៍នីមួយៗ នឹងរង់ចាំនៅវគ្គផ្ដាច់ព្រ័ត្រតែម្ដង មិនមានវគ្គពាក់កណ្ដាលផ្ដាច់ព្រ័ត្រ ដូចឆ្នាំមុនៗទេ។

ដោយឡែកនិយាយពីលក្ខន្តិកក្នុងការផ្ដល់ពិន្ទុវិញ ឯកឧត្ដម លើកឡើងថា មានកម្រិតបទដ្ឋាន ៥ ត្រូវផ្ដល់ពិន្ទុឱ្យ បេក្ខជន បេក្ខនារីដូចជា បទភ្លេង ២០ ពិន្ទុ ទំនុកច្រៀង ២០ ពិន្ទុ សម្រួលតន្ត្រី ២៥ សំឡេង ២៥ ពិន្ទុ និងទេពកោសល្យសម្ដែង ១០ពិន្ទុ។

អនុប្រធានអចិន្ត្រៃយ៍ខាងលើជឿជាក់ថា ការកែប្រែលក្ខខ័ណ្ឌស្ទើរតែទាំងស្រុងនឹងជួយឱ្យកម្មវិធី មហោស្រពតន្ត្រី និង ចម្រៀងថ្នាក់ជាតិឆ្នាំ២០១៥ ទទួលការចាប់អារម្មណ៍ច្រើនពីមហាជន។ ជាពិសេសបេក្ខជន និងបេក្ខនារីដាក់ពាក្យអស់ចិត្តចំពោះការផ្ដល់ពិន្ទុរបស់គណៈកម្មការ។

ទាក់ទិននឹងបញ្ហានេះ រដ្ឋមន្ត្រីក្រសួងព័ត៌មាន ឯកឧត្ដម ខៀវ កាញារីទ្ធ បញ្ជាក់ថា មហោស្រពតន្ត្រី និង ចម្រៀងសម័យថ្នាក់ជាតិឆ្នាំ២០១៥ គឺជា កម្មវិធីរៀបចំឡើងក្នុងស្មារតីរួមគ្នាឈានទៅដល់ការកាត់បន្ថយការចម្លងស្នាដៃពីបរទេសឱ្យនៅកម្រិតទាប និង រួមគ្នាបង្កើតស្នាដៃតែងនិពន្ធបទចម្រៀង និងទំនុកភ្លេងថ្មីដោយខ្លួនឯង។

ឯកឧត្ដមមានប្រសាសន៍ដូច្នេះថា៖ "យើងចង់ឃើញអ្នកនិពន្ធរបស់យើងប្រើគំនិតថ្មីដោយមិនចម្លងពីនរណាម្នាក់ ហើយឆ្នាំនេះយើងក៏ឃើញអ្នកនិពន្ធគាត់ប្រើស្ទីលថ្មីក្នុងការនិពន្ធ ចៀសវាងការស្ទីលដដែលដូចឆ្នាំ សុះ ម៉ាត់, ស៊ីន ស៊ីសាមុត ជាដើម ព្រោះនេះ សតវត្សទី ២១ ហើយ"។

រដ្ឋមន្ត្រីក្រសួងព័ត៌មានបន្តថា បេក្ខជន បេក្ខនារីទាំងក្នុង និង ក្រៅប្រទេសអាចដាក់ពាក្យប្រឡងក្នុងកម្មវិធីខាងលើបាន ដោយមិនប្រកាន់បក្សពួក ឬក៏ នយោបាយ។

និយាយពីជយលាភី មហោស្រពតន្ត្រី និង ចម្រៀងសម័យថ្នាក់ជាតិឆ្នាំ ២០១៥ ឯកឧត្ដម ខៀវ កាញារីទ្ធ ប្រាប់ថា លេខ ១ ទទួលបានទឹកប្រាក់ ៤ ពាន់ដុល្លារ និង ពានមួយ លេខ ២ ទទួលបានទឹកប្រាក់ ៣ ពាន់ដុល្លារ និង ប្រកាសនីយបត្រ ហើយលេខ ៣ ទទួលបានទឹកប្រាក់ ២ពាន់ដុល្លារ និងប្រកាសនីយបត្រដូចគ្នា។

ជាលើកទី ៣ ហើយ ដែលក្រសួងព័ត៌មានរៀបចំកម្មវិធី មហោស្រពតន្ត្រី និង ចម្រៀងសម័យថ្នាក់ជាតិនេះឡើយ។ កម្មវិធីចាប់ផ្ដើមទទួលពាក្យបេក្ខជន បេក្ខនារី ប្រឡងពីគ្រប់បណ្ដាខេត្ត និង ក្រៅប្រទេស ចាប់ពីថ្ងៃទី ៣ ខែមីនា ឆ្នាំ ២០១៥ តទៅ នៅក្រសួងព័ត៌មាន ហើយនឹងចាប់ផ្ដើមប្រកួតប្រជែងនៅដើមខែកក្កដា និង បញ្ចប់នៅខែ សីហា ឆ្នាំ ២០១៥ ខាងមុខ៕

អានអត្ថបទបន្ត៖ ចាប៉ីដងវែងនឹងត្រូវស្នើបញ្ចូលជាសម្បត្តិបេតិកភណ្ឌពិភពលោក

អានអត្ថបទបន្ត៖ សើចសប្បាយៗ ឡូរ៉ា ម៉ម និយាយពីរឿងស្នេហា

អានអត្ថបទបន្ត៖ ទំនុកភ្លេង និងទំនុកច្រៀងថ្មីពីកូនខ្មែរនៅ កូរ៉េ មិនចាញ់អ្នកក្នុងស្រុកទេ

អត្ថបទ៖អ៊ីង សុឡា