ក្លិបសិល្បៈ DT ក្នុង ១ ឆ្នាំ មានសិស្សចូលរៀនជាង ១០០០ នាក់

2015-03-04 22:16:49
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក កុយ ស៊ីឌឿន ប្រធានក្លិបសិល្បៈ DT បាននិយាយថា ក្លិបសិល្បៈរបស់លោក មានសិស្សចូលរៀន និង ប្រលងមិនតិចជាង ១០០០ នាក់ឡើយ ក្នុងមួយឆ្នាំៗ។

ជួបជាមួយ Sabay គ្រាដែលលោកបានយកអំណោយមួយចំនួនទៅចែក ដល់បុគ្គលិកវិទ្យុជាតិដើម្បីអបអរ ទិវាសិទ្ធិនារី ជាទីដែលធ្លាប់បម្រើការងារ លោក កុយ ស៊ីឌឿន បានឲ្យដឹងថា ក្លិបសិល្បៈ DT បង្កើតបាន ៣ ឆ្នាំ មកហើយ គឺមានបង្រៀនច្រៀង និង សម្ដែង ជាដើម។

មូលហេតុដែលនាំឲ្យ អ្នកជំនួញល្បីខាងផលិតផលកែសម្ផស្ស រូបនេះ បង្កើតក្លិបសិល្បៈឡើង ត្រូវបាន លោក ស៊ីឌឿន បញ្ជាក់ប្រាប់ថា មិនមែនដើម្បីរកប្រាក់ចំណេញនោះទេ គោលដៅចម្បងលើកស្ទួយ និង អភិរក្ស វិស័យសិល្បៈ ខ្មែរ កុំឲ្យបាត់បង់។

ប្រធានក្រុមសិល្បៈ រូបនេះ បានលើកឡើងទៀតថា ជារៀងរាល់ខែក្លឹបសិល្បៈ DT តែងតែជ្រើសរើសសិស្សចូលរៀន ក៏ដូចជា រៀបចំឲ្យមាន ប្រលងចម្រៀងប្រចាំខែ។ លោកបានរៀបរាប់ឲ្យដឹងថា ក្នុង ១ ខែ ក្លឹបបានរៀបចំឲ្យមានការប្រលងចម្រៀង ១ វគ្គ ហើយ ១ វគ្គ អ្នកចូលរួម គឺមានពី ១០០ ទៅ ២០០ នាក់ ប៉ុន្តែ ក្លឹបបានចម្រាញ់ តែ ៤ នាក់ ប៉ុណ្ណោះ ដើម្បីទៅប្រលងវគ្គបន្ត។

លោក កុយ ស៊ីឌឿន និយាយថា ក្លិបសិល្បៈ DT តែងតែធ្វើកម្មវិធីប្រលងចម្រៀងបែបនេះ ជារៀងរាល់ឆ្នាំ ។ សម្រាប់ឆ្នាំ ២០១៥ វគ្គផ្ដាច់ព្រ័ត្រ គ្រោងធ្វើនៅ ចុងខែ មីនា ខាងមុខ អ្នកជាប់លេខមួយទទួលបានម៉ូតូ ១ គ្រឿង អ្នកលេខ ២ ទទួលបាន iPhone 6 ១ គ្រឿង លេខ ៣ ទទួលបានទូរទស្សន៍ និង ប្រាក់មួយចំនួន។ ចំពោះ សិស្សដែលមានសមត្ថភាពខ្លាំង ក្រោយពីរៀនចប់ លោកបានឲ្យធ្វើការងារជាមួយ ដូចជា ការងារវិទ្យុ ឬ គ្រូបង្រៀនសិល្បៈជាដើម៕