Diamond Music៖ ខាត់ សុឃីមជាសិល្បករពហុជំនាញម្នាក់កម្ររក

2015-03-04 17:25:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ការអញ្ជើញ ខាត់ សុឃីម ទៅច្រៀងក្នុងផលិតកម្ម Diamond Music ដោយសារមើលឃើញថា សិល្បការិនីពហុជំនាញរូបនេះ នៅតែមានប្រជាប្រិយភាពក្នុងស្រទាប់មហាជនទូទៅ។ នេះជាការអះអាងរបស់លោក មុំ មុនីរិទ្ធ អ្នកគ្រប់គ្រងសិល្បករក្នុងផលិតកម្ម។

ផលិតករដដែលថា"គាត់នៅតែមានទីផ្សារល្អ សមត្ថភាពក៏ល្អ ពីមួយឆ្នាំទៅមួយឆ្នាំ។ យ៉ាងណាមិញ គាត់ជាសិល្បករពហុជំនាញម្នាក់កម្ររក"។

មុនីរិទ្ធ បន្តទៀតថា នេះក៏ជាការឆ្លើយតបមួយចំពោះសំណួរជាច្រើន ដែលបានសាកសួរមកកាន់ផលិតកម្មបន្ទាប់ពីមានការចុះផ្សាយកន្លងមកផងដែរ។ ផលិតកររូបនេះបន្តទៀតថា ហេតុផលនាំឲ្យភាគីទាំងពីរបានសហការគ្នាឡើងនេះ គឺជាការងារថ្មីជាមួយគ្នា និងជាលើកដំបូង ដើម្បីអបអរក្នុងឱកាសបុណ្យចូលឆ្នាំខ្មែរខាងមុខនេះ ហើយក៏ជាការរាប់អានគ្នារវាងក្រុមហ៊ុន ជាមួយ ខាត់ សុឃីម ផងដែរ។

អ្នកនិពន្ធរូបនេះ បានបន្តទៀតថា វត្តមានរបស់តារាចម្រៀងស្រី និងជាគណៈកម្មការកម្មវិធី Cambodian's Got Talent គឺគ្មានប៉ះពាល់ ឬមានបញ្ហាជាមួយផលិតកម្មហង្សមាសឡើយ។

ក្នុងនាមផលិតកម្ម មុំ មុនីរិទ្ធ អះអាងថា បានសម្រិតសម្រាំងបទចម្រៀងល្អៗសម្រាប់រៀមច្បងត្រកូល"ខាត់"រូបនេះហើយ។ ប៉ុន្តែនៃការគាំទ្រយ៉ាងណានោះ អាស្រ័យលើប្រិយមិត្តប៉ុណ្ណោះ ព្រោះអ្នកនិពន្ធមិនអាចអារកាត់បានទេ។ ជាមួយគ្នានេះដែរ អ្នកនិពន្ធ មុំ មុនីរិទ្ធ បន្ថែមថា នឹងមានបទចម្រៀងសម្រាប់ ខាត់ សុឃីម បន្តបន្ទាប់ទៀតនៅក្នុងឆ្នាំក្រោយ ឬអាល់ប៊ុមផ្សេងៗទៀតទៅតាមរដូវកាលប្រពៃណីទំនៀមទម្លាប់របស់ខ្មែរយើង៕

តោះ! បោះឆ្នោតឲ្យតារាខ្មែរយើងជាប់ពាន Mister Global 2015

អានអត្ថបទ៖ ចាប៉ីដងវែងនឹងត្រូវស្នើបញ្ចូលជាសម្បត្តិបេតិកភណ្ឌពិភពលោក

អត្ថបទ៖ សំ ជំនាញ រូបថត៖ Diamond Music