អតីតកីឡាករខ្មែរដ៏ល្បី ប៉ែន ផាត ដកខ្លួនចេញពីក្លិបវេស្ទើន

2015-03-05 21:03:51
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ប៉ែន ផាត អតីតកីឡាករបាល់ទាត់ដ៏ល្បីរបស់កម្ពុជា និងមានរហស្សនាម«ពស់កេងកង»បានសម្រេចដកខ្លួនចេញពីក្លិបបាល់ទាត់វេស្ទើនហើយ បន្ទាប់ពីលោកបានសិក្សាស្វែងយល់ទៅឃើញថា ក្លិបមួយនេះមិនបានធ្វើអ្វីឲ្យប្រាកដប្រជាដែលអាចឲ្យលោកចូលខ្លួនមកដឹកនាំសម្រាប់លីកកំពូលកម្ពុជារដូវកាលឆ្នាំ២០១៥។

កាលពីចុងឆ្នាំ២០១៤ក្លិបបាល់ទាត់សាកលវិទ្យាល័យវេស្ទើនដែលបានប្តូរឈ្មោះជា Sparta Cambodia United បានប្រកាសថា លោក ប៉ែន ផាត នឹងចូលខ្លួនមកដឹកនាំក្លិបរបស់ខ្លួនសម្រាប់ពានរង្វាន់បាល់ទាត់ Hun Sen Cup និងបាល់ទាត់លីកកំពូលកម្ពុជាសម្រាប់រដូវកាលឆ្នាំ២០១៥ ប៉ុន្តែពេលនេះលោកមិនបានដឹកនាំក្លិបវេស្ទើនឡើយ។

ប្រាប់ Sabay តាមទូរសព្ទពីប្រទេសបារាំងកាលពីវេលាម៉ោង១២ថ្ងៃត្រង់នេះ លោក ប៉ែន ផាតបានរៀបរាប់ថា ក្លិបវេស្ទើនមិនបានធ្វើអ្វីឲ្យប្រាកដប្រជាដើម្បីឲ្យរូបលោកចូលខ្លួនមកដឹកនាំបានឡើយ។ កាលពីដើមឡើយ លោក ឡៃ សុធា អ្នកចាត់ការក្លិបវេស្ទើនពិតជាទាក់ទង និងពិភាក្សាជាមួយលោកមែន ប៉ុន្តែមិនមានលក្ខន្តិកៈច្បាស់លាស់នៅឡើយទេ។

លោកមានប្រសាសន៍ថា ៖«វេស្ទើនអត់មានធ្វើកុងត្រា ឬនិយាយពីប្រាក់កម្រៃឲ្យច្បាស់លាស់ទេ អីចឹងខ្ញុំអត់អាចដឹកនាំបានឡើយ។ យើងត្រូវធ្វើឲ្យប្រាកដដូចក្លិបផ្សេងដូចជាក្លិបភ្នំពេញក្រោន បឹងកេត ឬស្វាយរៀងជាដើម កីឡាករគេមានកុងត្រា គ្រូគេក៏មាន ហើយចំណូលច្បាស់លាស់»។

រហូតដល់ពេលនេះលោកមិនទាន់ដឹកនាំក្លិបណាមួយនៅឡើយទេ និងមិនចង់ដឹកនាំក្លិបធំៗដែរ។ លោកថា តាមពិតលោកអត់ចង់ដឹកនាំក្លិបធំៗទេ ពីព្រោះពេលឈ្នះពានអ្វីមួយ ឬស្នាដៃណាមួយ វាមិនល្អសម្រាប់រូបលោកទេគឺហាក់ដូចជាសល់ពីអ្នកចាស់។ ផ្ទុយទៅវិញលោកចង់ដឹកនាំក្លិបតូចៗដែលសាងស្នាដៃពីចំណុចតូចរហូតឈ្នះពានធំៗទើបបានជាសមត្ថភាពដឹកនាំពិតប្រាកដរបស់លោក។

នៅថ្ងៃទី៩ ខែមីនាខាងមុខនេះលោកនឹងធ្វើដំណើរពីប្រទេសបារាំងមកប្រទេសកម្ពុជាដើម្បីជួបនឹងលោក សៅ សុខា ប្រធានសហព័ន្ធកីឡាបាល់ទាត់កម្ពុជា។ ការជួបនឹងលោកប្រធានសហព័ន្ធ លោកទំនងជាពិភាក្សាជុំវិញការដឹកនាំយុវជនជម្រើសជាតិអាយុក្រោម១៧ឬ១៩ឆ្នាំ។ ប្រសិនបើលោកពិភាក្សាត្រូវជាមួយលោក សៅ សុខា លោកនឹងវិលត្រឡប់ទៅប្រទេសបារាំងវិញ ហើយប្រមូលឥវ៉ាន់មករស់នៅស្រុកខ្មែរតែម្តង។

ពាក់ព័ន្ធនឹងចំណុចនេះ លោកឡៃ សុធា អ្នកចាត់ការទូទៅរបស់ក្លិបវេស្ទើនបានប្រាប់ដែរថា លោក ប៉ែន ផាត ពិតជាមិនអាចដឹកនាំក្លិបវេស្ទើនមែន ពីព្រោះអ្វីដែលវេស្ទើនបានផ្តល់ឲ្យ លោក ប៉ែន ផាតមិនអាចទទួលយកបាន ដូច្នេះលោកកំពុងស្វែងរកគ្រូបង្វឹកថ្មី៕

អត្ថបទ៖ ជាន ចាន់រ៉ា