ផលប៉ះពាល់សុខភាពដ៏ធ្ងន់ធ្ងរអ្នកប្រើ Smartphone ប្រើរាល់ថ្ងៃបែរមិនចាប់អារម្មណ៍

2015-03-13 20:34:48
ចំនួនមតិ 0 | ចំនួនចែករំលែក 0

ចន្លោះមិនឃើញ

Smartphone គឺជាឧបករណ៍បច្ចេកវិទ្យាដ៏ពេញនិយមមួយប្រភេទ ដែលទទួលការពេញនិយមប្រើជាច្រើន។ Smartphone បានផ្ដល់ផលប្រយោជន៍យ៉ាងសន្ធឹកសន្ធាប់ទៅដល់អ្នកប្រើប្រាស់ ទាំងការទំនាក់ទំនង ស្រាវជា្រវ និង កម្សាន្ត។ ប៉ុន្តែក៏មានរឿងមួយចំនួនដែលវាបានបង្កជាបញ្ហាដល់សុខភាព ដល់អ្នកប្រើប្រាស់ដោយមិនដឹងខ្លួនដែរ។ ដូច្នេះខាងក្រោមនេះគឺជាផលប៉ះពាល់ប្រាំយ៉ាងដែលបង្កដោយការប្រើប្រាស់ Smartphone មិនបានសមស្រប។

ត្រចៀក (ថ្លង់)

ការស្ដាប់សម្លេងខ្លាំងចេញពីទូរសព្ទ Smartphone ជាពិសេសគឺប្រើកាសគឺជាបញ្ហាធ្ងន់ធ្ងរមួយ ដែលធ្វើឲ្យសមត្ថភាពការស្ដាប់ធ្លាក់ចុះឬមានជំងឺថ្លង់។ តាមរបាយការណ៍របស់វិទ្យាស្ថានជាតិសុខភាព NIH របស់អាមេរិកបានបង្ហាញឲ្យដឹងថា ប្រជាជនអាមេរិកប្រមាណ ២៦ លាននាក់ជួបបញ្ហាត្រចៀកស្ដាប់មិនសូវបាន (ថ្លង់) ដែលទទួលរងការប៉ះពាល់ដោយសារសំឡេង។ ទូរសព្ទក៏ជាផ្នែកមួយបង្កឲ្យមានជំងឺថ្លង់ដែរ ដោយអ្នកប្រើប្រាស់មួយចំនួនបានស្ដាប់ដោយបើកសំឡេងខ្លាំងហួស មួយវិញទៀតនោះគឺការប្រើកាសដែលគ្មានគុណភាព។ ដូច្នេះគួរតែកំណត់សំឡេងល្មម និង ប្រើប្រាស់កាសដែលមានគុណភាពល្អថ្វីត្បិតតែវាថ្លៃបន្តិចមែន។

ទម្ងន់

តាមការសិក្សាក្នុងឆ្នាំ២០១២ដោយវិទ្យាស្ថាន Milken Institute បានឲ្យដឹងថា បច្ចុប្បន្ននេះមនុស្សភាគច្រើនបានចំណាយច្រើនម៉ោងធ្វើការជាមួយកុំព្យូទ័រ មើលទូរទស្សន៍ លេងវីដេអូហ្គេម និង ទូរសព្ទ Smartphone។ ការសិក្សានេះក៏បានរកឃើញដែរថាបណ្ដាប្រទេសដែលមានការរីកចម្រើនខាងបច្ចេកវិទ្យា ប្រជាជនប្រទេសនោះក៏ឡើងទម្ងន់(ធាត់)ដែរ។ ជាក់ស្ដែងនៅ អាមេរិកគឺស្ថិតនៅលើគេ ដោយប្រជាជនវ័យជំទង់ ៣៣,៨ ភាគរយគឺធាត់លើសទម្ងន់។ វេជ្ជបណ្ឌិត Abraham-Pratt បានឲ្យដឹងថា អាហារគឺមានសារៈសំខាន់សម្រាប់ការលូតលាស់សម្រាប់រាងកាយ ប៉ុន្តែការមិនយកចិត្តទុកដាក់ក្នុងញាំដូចជាខណៈពេលកំពុងមើលទូរទស្សន៍ លេងហ្គេមជាដើម អាចធ្វើឲ្យពួកគេមិនសូវយកចិត្តទុកដាក់ក្នុងការញាំ និង ញាំច្រើនហួសកំណត់ដែលធ្វើឲ្យពួកគេឡើងទម្ងន់និងធាត់ហួស។

ភ្នែក

ការសំឡឹងមើលទៅលើអេក្រង់របស់ Smartphone ឬ Tablet យូរពេកវានឹងបង្កឲ្យមានផលប៉ះពាល់ដល់ភ្នែក។ តាមការសិក្សារស្រាវជ្រាវដោយ Independent Optitians ឆ្នាំ ២០១៤ បានរកឃើញថារលកពន្លឺដែលបញ្ចេញដោយ Smartphone និង Tablet ផ្ដល់ផលប៉ះពាល់ធ្ងន់ធ្ងរដល់សាច់ដុំភ្នែក។ ដូច្នេះអ្នកប្រើប្រាស់មិនត្រូវសម្លឹងមើលយូរពេក ឬ បើកពន្លឺភ្លឺហួសពេកនោះទេ។ ម្យ៉ាងទៀតនោះគួរតែអនុវត្តវិធានការណ៍ ២០/២០ មានន័យថារាល់ ២០ នាទីម្ដង់បន្ទាប់ពីសម្លឹមមើល អេក្រង់ទូរសព្ទ ត្រូវសម្រាក ២០ វិនាទី និង សម្លឹងមើលអ្វីផ្សេងទៀតក្នុងរយៈចម្ងាយ ២០ Feet (៦ ម៉ែត្រ)។

ដំណេក

ពន្លឺដែលចេញពីអេក្រង់ទូរសព្ទ Smartphone ឬ Tablet ជាពិសេសពន្លឺព័ណ៌ខៀវមិនត្រឹមតែបង្កបញ្ហាដល់ភ្នែកនោះទេ វាថែមទាំងបង្កផលប៉ះពាល់ដល់លំនាំនៃការដេកផងដែរ។ វេជ្ជបណ្ឌិត Michael Breus ដែលមានជំនាញផ្នែកនេះបាននិយាយឲ្យដឹងថា នៅពេលដែលយើងសម្លឹង និង ដាក់អេក្រង់ Smartphone ឬ Tablet កាន់តែកៀកទៅនឹងផ្ទៃមុខ នោះវានឹងប្រាប់ទៅកាន់រាងកាយឲ្យឈប់ផលិតអរម៉ូនម៉េឡានីនដែលនឹងធ្វើឲ្យយើងមិនមានអារម្មណ៍ថាងងុយដេក។ ដូច្នេះយើងគួរតែកាត់បន្ថយការប្រើប្រាស់ Smartphone ឬ Tablet ច្រើនហួសមុនពេលចូលគេង។

សុខភាពផ្លូវចិត្ត

មិនត្រឹមតែប៉ុណ្ណោះទេមានអ្នកប្រើប្រាស់ជាច្រើនបានទទួលផលប៉ះពាល់ទាក់ទងនឹងសុខភាពផ្លូវចិត្តដែរ។ តាមការសិក្សារបស់សាកលវិទ្យាល័យ Sussexរបស់ចក្រភពអង់គ្លេស និង របាយការណ៍របស់ទស្សនាវដ្ដី Forbs បានបង្ហាញថាមានអ្នកប្រើប្រាស់មួយចំនួនដែលនិយមប្រើ និង មានការងារច្រើនជាមួយ Smartphone ដូចជាការលេងកម្មវិធីបណ្ដាញសង្គមជាដើមគឺទទួលរងនូវបញ្ហាសុខភាពផ្លូវចិត្តដូចជាជំងឺថប់អារម្មណ៍ និងជំងឺធ្លាក់ទឹកចិត្តជាដើម៕

អានបន្ត៖ ផលប៉ះពាល់នៃវិទ្យុសកម្ម មិនអាចមើលរំលង ការពារដោយរបៀបណា?

ប្រែសម្រួល៖ សំនៀង ប្រភព៖ techlicious