ជនជាតិ​អាមេរិក និង​ជា​អ្នក​បង្កើត​វិបសាយ​សិច​ ឈ្មោះ Kevin Bollaert ត្រូវ​បាន​តុលាការ​អាមេរិក​ កាត់​ទោស​ឱ្យ​ជាប់​គុក១៨​ឆ្នាំ កាល​ពី​ថ្ងៃ​សុក្រសប្ដាហ៍​មុន ក្រោយ​ជាប់​​ចោទពី​បទ​ឧក្រិដ្ឋ​ចំនួន​២៧​ករណី។

ប្រភព​បាន​ឱ្យ​ដឹង​ថា មុន​ឈាន​ដល់​ការ​កាត់​ទោស​នេះ លោក Bollaert បាន​ប្រឈម​នឹង​បណ្ដឹង​ជិត​១ឆ្នាំ​​ហើយ ដែល​ពេល​នោះ​លោក​ត្រូវ​គេ​ចោទ ពី​បទ​បង្ហោះ​រូប​អាសអាភាស ដោយ​គ្មាន​ការ​អនុញ្ញាត​ពី​ម្ចាស់​ដើម និង​ជួយ​ឱ្យ​ជន​ខិល​ខូច​រួច​ពី​ទោស​កំហុស។

បើ​យោង​តាម​ព័ត៌មាន​ពី​តុលាការ ជនល្មើស​វ័យ​២៨​ឆ្នាំ បាន​បើក​គេហទំព័រ "UgotPosted" ដែល​​អាច​ឱ្យ​ជន​បែកបាក់​ស្នេហា (ex-lovers) ផ្ដល់​រូប​អាសអាភាស​ដៃ​គូ​របស់ពួកគេ រួម​ទាំង​លេខ​ទាក់ទង និង​​​ភ្ជាប់ Link ទៅ​កាន់​បណ្ដាញ​សង្គម​ផ្សេងៗ លើ​គេហទំព័រ​នេះ។ មិនតែ​ប៉ុណ្ណោះ Bollaert ក៏​ត្រូវ​ជាប់​ចោទ​ពី​បទ​ឧក្រិដ្ឋ​ដែរ កាល​ពី​ខែ​មករាកន្លង​ទៅ ព្រោះតែ​លោក​បាន​បើក​វិបសាយ​​មួយ​ទៀត ឈ្មោះ​ថា "changemyreputation.com" ។ វិបសាយ​នេះ លោក​តម្រូវ​ឱ្យ​ជនរងគ្រោះ​បង់​ប្រាក់​ពី​៣០០​ដុល្លារ ទៅ​៣៥០​ដុល្លារ ដើម្បី​ជា​ថ្នូរ​លុប​រូបភាព​ឬ​វីដេអូ​ផ្សេងៗ​​ចេញ។ ​

ជនរងគ្រោះ​ជា​ស្ត្រី​៨​នាក់ បាន​ចូល​ខ្លួន​ធ្វើ​ជា​សាក្សី​ប្រឆាំង​នឹង Bollaert នៅ​តុលាការ​ក្រុង San Diego រដ្ឋ​កាលីហ្វញ៉ា បន្ទាប់​រូប​អាសអាភាស​របស់​ពួកគេ​ជាច្រើន​ ត្រូវ​គេ​ចែករំលែក​លើ​គេហទំព័រ​នោះ។ ការ​បង្ហោះ​រូប​ទាំងអស់​នោះ ធ្វើ​ឱ្យ​ជនរងគ្រោះខ្លះ​ បាត់​បង់​ការ​ងារ ផ្ទះ​សម្បែង​ និង​គ្រួសារ។ នៅ​ក្នុង​តុលាការ ស្ត្រី​ម្នាក់​និយាយ​ថា" វា​បាន​បំផ្លាញ​ជីវិត​ខ្ញុំ តែ​ខ្ញុំ​នៅ​តែប្រឹង​ប្រឈម​នឹង​បញ្ហា​នេះ។ ខ្ញុំ​បាត់បង់​គ្រួសារ ព្រោះ​ពួកគេ​គិត​ថា ខ្ញុំ​ធ្វើ​ឱ្យ​ពួកគេ​អាប់ឱន។ កេរ្តិ៍​ឈ្មោះ​របស់​ខ្ញុំ ត្រូវ​បាន​បំផ្លាញ​អស់​ហើយ"។

រូប​ភាព​អាសអាភាស​ជិត​១០ ០០០សន្លឹក​ ត្រូវ​បាន​គេ​បង្ហោះ​លើ​វិបសាយ​ខាងលើ នៅ​ចន្លោះ​​ខែ​ធ្នូ ឆ្នាំ​២០១២ ដល់​ខែ​កញ្ញា​ឆ្នាំ​២០១៣។

ចំណែក​មេធាវី​​ចុងចោទ អ្នកស្រី Emily Rose-Weber បាន​ព្យាយាម​ការពារ​កូនក្ដីរបស់​ខ្លួន និង​បាន​​និយាយ Bollaert ​ថា បាន​ប្រកប​អាជីព​អសីលធម៌​មែន តែ​​មិន​ខុស​ច្បាប់​ទេ ដែលលោក​អនុញ្ញាត​ឱ្យ​អ្នកផ្សេង​ បង្ហោះ​រូប​អាសអាភាស​ លើ​វិបសាយ​របស់​ខ្លួន​នោះ "វា​មិន​សម វា​ជា​ការប្រមាថមួយ តែ​វា​មិន​ខុសច្បាប់​ឡើយ"។

​

ទោះជាយ៉ាង​នេះ​ក្ដី មេធាវី​រដ្ឋ​កាលីហ្វញ៉ា លោក Kamala Harris បាន​ច្រានចោល​ការ​ការពារ​ក្ដី​នេះ។ ជុំវិញ​ក្ដី​នេះ ក្រៅ​ពី​ជាប់​ពន្ធនាគារ​១៨​ឆ្នាំ ជនល្មើស​​នឹង​ត្រូវ​សង​ប្រាក់​ជំងឺចិត្ត ១៥ ០០០ដុល្លារ ​ទៅ​ជន​រងគ្រោះ ថែម​ទាំង​ប្រាក់​ពិន័យ​១០ ០០០ដុល្លារ​ផ្សេងទៀតផងដែរ៕ ​​​

ភ្លេច​ចាប់​អារម្មណ៍​ សំបក​កង់​រាល់​ថ្ងៃ​ធ្វើ​ឲ្យ​កង់​អ្នក​ជិះ​យឺត!

ប្រែ​សម្រួល៖ អ៊ុំ សុភក្តិ ប្រភព៖ Neowin