ម៉ៅ សុចាន់ធី ជិះយន្តហោះរាប់ពាន់គីឡូម៉ែត្រមកមើលមុខគូដណ្តឹង

2015-04-13 16:19:24
ចំនួនមតិ 0 | ចំនួនចែករំលែក 0

ចន្លោះមិនឃើញ

"គោលបំណងរបស់បងមកស្រុកខ្មែរលើកនេះមានបីគឺ ទី១ដើម្បីបានជួបមុខគូដណ្ដឹង ទី២មកចូលរួមអាពាហ៍ពិពាហ៍របស់បងស្រី និងទី៣ដើរកម្សាន្តបុណ្យចូលឆ្នាំខ្មែរដែរ"។អតីតតារាសម្ដែងជើងចាស់ ម៉ៅ សុចាន់ធី ថ្លែងប្រាប់ Sabay ដោយផ្ទាល់។

ម៉ៅ សុចាន់ធី តារាសម្ដែងជើងចាស់

ម៉ៅ សុចាន់ធី ដែលបានចាកចេញពីសិល្បៈ១០ឆ្នាំជាងនោះ បានប្រាប់បន្ថែមថា អ្នកនាង និងលោក សៀង តារ៉ាសម្ផស្ស ដែលត្រៀមនឹងភ្ជាប់ពាក្យជាមួយគ្នាឆាប់ៗនេះ បានភ្ជាប់ទំនាក់ទំនងគ្នាជាង១ឆ្នាំមកហើយ តាមរយៈបណ្ដាញសង្គមហ្វេសប៊ុក និងប្រព័ន្ធផ្សេងៗដូចជា Skype,Tangoផ្សេងៗជាដើមនោះ មិនដែលបានជួបមុខគ្នាទេ។ ដូច្នេះហើយ ដំណើរចុះមកនេះ គឺអ្នកនាងចង់ស្គាល់គ្នាឲ្យច្បាស់។

ម៉ៅ សុចាន់ធី មកដល់មាតុប្រទេសនៅថ្ងៃទី០២ខែមេសាឆ្នាំ២០១៥បានពោលបន្តទៀតថា ជាការពិត មានបុរសតាមស្រលាញ់អ្នកនាងច្រើន ទាំងនៅអាមេរិក និងស្រុកខ្មែរក្នុងនោះរួមទាំងមានគូដណ្ដឹងសព្វថ្ងៃនេះផងដែរ។ ពីដំបូងឡើយអ្នកនាង ក៏មិនទាន់បដិសេធភ្លាមៗជាមួយបុរសទាំងអស់នោះទេគ្រាន់តែចាំគាត់មកដល់ស្រុកខ្មែរសិន។

យ៉ាងណាមិញពេលដល់ស្រុកខ្មែរភ្លាម អ្នកនាងច្បាស់ក្នុងចិត្តហើយថានរណាជាគូជីវិតរបស់អ្នកនាង ដែលបុរសនោះ គឺលោក សៀង តារ៉ាសម្ផស្ស កើតក្នុងឆ្នាំ ១៩៧៥ ដែលជាតារាចម្រៀង និងសម្ដែងជើងចាស់មួយរូបផងដែរ។

ម៉ៅ សុចាន់ធី និងលោក សៀង តារ៉ាសម្ផស្ស អនាគតគូដណ្ដឹង

ម៉ៅ សុចាន់ធី ថ្លែងថា "អាចថានិស្ស័យក៏ថាបានអូន ហើយពេលដែលបងឃើញគូដណ្ដឹងក៏ចាប់ចិត្តស្រលាញ់តែម្ដងណាមួយឃើញគាត់មាននិស្ស័យស្លូតបូតចេះគោរពចាស់ទុំចេះធ្វើបុណ្យធ្វើទានផង"។ ជាមួយគ្នានេះ តួស្រីដែលគេស្គាល់ច្បាស់ក្នុងរឿង "ម៉ាកភូយុងកែវ" រូបនេះ សូមផ្ដាំទៅបុរសៗដែលតាមស្រលាញ់អ្នកនាងថា សូមដកចិត្ត ព្រោះពេលនេះ អ្នកនាងរកបានមនុស្សដែលខ្លួនស្រលាញ់ហើយ។

ងាកមក លោក សៀង តារ៉ាសម្ផស្ស ក៏បានឲ្យដឹងថា តាមពិតលោកបានលួចស្រឡាញ់ ម៉ៅ សុចាន់ធី ជាយូរមកហើយ តាំងពីតារាសម្ដែងរូបនេះរស់នៅស្រុកខ្មែរម៉្លេះ។ "ខ្ញុំលួចស្រលាញ់គាត់យូរហើយតាំងពីនៅស្រុកខ្មែរប៉ុន្តែពេលនោះខ្ញុំហាក់ដូចជាស្ទាក់ស្ទើរក្នុងការនិយាយជាមួយគាត់ព្រោះពេលនោះការសម្ដែងរបស់គាត់ដូចជាខ្ពស់ជាងខ្ញុំ ហើយចិត្តដែលលួចស្រលាញ់នេះចេះតែងំក្នុងចិត្តរហូតដល់ឥលូវ ដល់ថ្នាក់ថាឲ្យតែខ្ញុំបានស្គាល់ ម៉ៅសុចាន់ធីឬក៏បានគាត់មកធ្វើជាប្រពន្ធទោះបីទៅជាតិក្រោយខ្ញុំទៅជាយ៉ាងម៉េចក៏សុខចិត្តដែរ"

ក្រោយបើកបេះដូងទទួលយកគ្នាទៅវិញទៅមក ម៉ៅ សុចាន់ធី និង សៀង តារ៉ាសម្ផស្ស គ្រោងនឹងភ្ជាប់ពាក្យនៅដើមខែក្រោយ មុននឹងរៀបការនៅខែចុងឆ្នាំ២០១៥នេះ។ អ្នកនាង ចាន់ធី បញ្ជាក់ថា បន្ទាប់ពីរៀបការរួច អ្នកនាងនឹងធានាស្វាមីរបស់ទៅនៅសហរដ្ឋអាមេរិកជាមួយគ្នា។

ម៉ៅ សុចាន់ធី បានចាកចេញទៅរស់នៅសហរដ្ឋអាមេរិកក្នុងឆ្នាំ ២០០៥ នៅ Washington Stateក្រោយរៀបអាពាហ៍ពិពាហ៍ជាមួយអាណិកជនខ្មែររស់នៅសហរដ្ឋអាមេរិក។ ប៉ុន្តែពេលដល់ទីនោះរស់នៅជាមួយគ្នាបានតែ៣ឆ្នាំ បង្កើតបានកូនស្រីម្នាក់ ក៏បានចែកផ្លូវគ្នាវិញ ដោយសារការរស់នៅមិនចុះសម្រុងនឹងគ្នា។

មុនពេលចាកចេញទៅ តារាស្រីកើតក្នុងឆ្នាំ ១៩៧២ រូបនេះ ធ្លាប់បានសម្ដែងក្នុងរឿងជាច្រើនដូចជា "ផ្ការាំទឹករាំ" "អ្នកនាងបម្រើ" "ស្នេហ៍២ជាតិ" "បក្សីចាំក្រុង" "ក្ដាមស្រែ" "ស្តេចដំរីស" និង"ម៉ាក់ភូយ៉ុងកែវ" ជាដើម៕