ពិតអត់!ការងារក្រៅម៉ោងអាចរកចំណូលបានពី ១០០$ ដល់៥០០$?

2015-04-21 23:39:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ការងារក្រៅម៉ោងទទួលបានចំណូលខ្ពស់ ដោយគ្រាន់តែចំណាយពេលពីរទៅបីម៉ោងក្នុងមួយថ្ងៃលើប្រព័ន្ធអ៊ីនធឺណិតកំពុងតែទាក់ទាញយុវវ័យមួយចំនួនឱ្យលង់ជឿ។ ការងារដែលមិនតម្រូវឱ្យមានសញ្ញាបត្រ និងបទពិសោធន៍នេះ កំពុងផ្សព្វផ្សាយតាមបណ្តាញសង្គមយ៉ាងផុលផុស។ តើការងារស្រួលម្ល៉ឹងៗ ពិតជាអាចរកចំណូលបានខ្ពស់មែនឬ?

កញ្ញាឈួ លីនី ជានិស្សិតឆ្នាំទីមួយនៃសាកលវិទ្យាល័យកម្ពុជាបានប្រាប់ Sabay ថា កញ្ញាធ្លាប់ចុះឈ្មោះតាម Link ដែលមានដាក់ក្នុងរូបដែលគេបង្ហោះតាមអ៊ីនធឺណិត។ ក្រោយមកក្រុមហ៊ុនក៏ទូរសព្ទមកកញ្ញា ឱ្យទៅស្ដាប់ការណែនាំពីវាគ្មិន។ ស្ដាប់ការណែនាំរួច ក្រុមហ៊ុនបានឱ្យចុះឈ្មោះបង់ប្រាក់១២$ និងត្រូវចំណាយ១០០$ទៀតដើម្បីទិញទំនិញក្នុងក្រុមហ៊ុន។

លីនី រៀបរាប់ទៀតថា ក្រុមហ៊ុនឱ្យណែនាំបន្តទៅមិត្តភ័ក្ដិឬអ្នកដែលស្គាល់គ្នាឱ្យធ្វើដូចលីនីដែរ។ ឆ្លើយតបនឹងសំណួរហេតុអ្វីក៏ លីនី ឈប់ពីការងារនេះទៅវិញ? និស្សិតជំនាញធនាគារនិងហិរញ្ញវត្ថុរូបនេះបានឱ្យដឹងថា «ពេលហ្នឹងមានអារម្មណ៍ថា ដូចខ្លួនឯងហ្នឹងត្រូវទៅបោកមិត្តភ័ក្ដិឱ្យបង់លុយដូចយើងអញ្ចឹង! ហើយក៏ឈប់ទៅ! បើការងារហ្នឹងល្អមែន មិនមែនមានអ្នកខ្លះសុខចិត្តទៅអង្គុយធ្វើការម៉ាង៉ៃវាស់ល្ងាចយកលុយមួយខែមួយរយជាងទេ! គេទៅធ្វើហ្នឹងអស់ហើយ! ណាមួយបងធ្លាប់ប្រាប់ថាលុយដែលគេវេរឱ្យយើងតាមធនាគារហ្នឹងមានតែតួលេខតែដកអត់បានផង»។

លោក ខាត់ ចាន់ម៉ារ៉ាឌី និស្សិតនៃសាកលវិទ្យាល័យមេគង្គកម្ពុជាបានប្រាប់ Sabay ថា លោកក៏ធ្លាប់ចុះឈ្មោះធ្វើការងារក្រៅម៉ោងនេះដែរ។ក្រោយមកក្រុមហ៊ុនក៏ទូរស័ព្ទឱ្យទៅជួប ប៉ុន្តែ ម៉ារ៉ាឌី ក៏រំសាយវិញ។ និស្សិតអក្សរសាស្ត្រជប៉ុនរូបនេះបន្តថា «ពេលគេតេមកឱ្យទៅជួបហ្នឹង ម៉ាក់អត់ឱ្យទៅទេ ព្រោះខ្លាចចាញ់បោកគេ! គាត់ថាវាមិនដែលធ្វើការប៉ុន្មានម៉ោងបានដល់ទៅបួន ប្រាំរយដុល្លារទេ!»។

ឆ្លើយតបទៅនឹងការលើកឡើងថាលើ លោក ផុនបូរិន្ទ ជាទីប្រឹក្សាពាណិជ្ជកម្មនៃក្រុមហ៊ុន AimStar ដែលជាក្រុមហ៊ុនផ្ដល់ឱកាសការងារក្រៅម៉ោងដល់យុវវ័យនិយមចែករំលែកព័ត៌មានតៗគ្នាបានប្រាប់Sabay ថា មានក្រុមហ៊ុនមួយចំនួន គ្មានច្បាប់ត្រឹមត្រូវឆ្លៀតឱកាសបោកប្រាស់ប្រជាពលរដ្ឋធ្វើឱ្យប៉ះពាល់ដល់ក្រុមហ៊ុនដែលត្រឹមត្រូវ។ លោកថា ក្រុមហ៊ុន AimStar ជាក្រុមហ៊ុនដែលមានអាជ្ញាប័ណ្ណត្រឹមត្រូវពីក្រសួងពាណិជ្ជកម្ម និងអគ្គនាយកដ្ឋានពន្ធដារ។

លោកបានបន្ថែមថា ក្រុមហ៊ុន AimStar មានបួនផ្នែកធំៗ តែផ្នែក Business Owner គឺជាផ្នែកដែលក្រុមហ៊ុនផ្ដោតសំខាន់។ ផ្នែកនេះហើយជាការងារអ៊ីនធឺណិតដែលយុវវ័យគិតថា ជាការងារបោកប្រាស់។ ការងារនេះគឺក្រុមហ៊ុនតម្រូវឱ្យអតិថិជនដាក់ទុនជាមួយក្រុមហ៊ុន។ ប៉ុន្តែមុននឹងចុះឈ្មោះក្រុមហ៊ុននឹងណែនាំពីប្រព័ន្ធការងារទាំងនោះឱ្យបេក្ខជនចុះឈ្មោះបានយល់។ «ពួកគាត់មិនអាចប្រើពាក្យថាបង់លុយឬបោកលុយបានទេ! សួរថាតើបង់ហ្នឹងបង់យ៉ាងម៉េច? បង់ឱ្យក្រុមហ៊ុនហើយអត់បានអីសោះ? បើបោកតើក្រុមហ៊ុនយកលុយហើយរត់? ការពិតក្រុមហ៊ុនខ្ញុំមានរោងចក្រផលិតផលិតផលប្រើប្រាស់ប្រចាំថ្ងៃ ហើយអ្នកដែលចង់ដាក់ទុនជាមួយក្រុមហ៊ុនត្រូវចំណាយ១០០$ តែប្ដូរមកវិញជារបស់ប្រើប្រាស់ដែលពួកគាត់ចាំបាច់ប្រើប្រាស់ប្រចាំថ្ងៃដូចជាសាប៊ូកក់សក់ ថ្នាំដុសធ្មេញជាដើម វាចំណេញជាជាងពួកគាត់ទៅទិញរបស់ខាងក្រៅ ហើយអត់បានអីសោះ! ប៉ុន្តែជាមួយ AimStar ពួកគាត់បានរបស់ប្រើ ហើយបានចំណេញលុយទៀតព្រោះក្រុមហ៊ុននឹងចែកប្រាក់ចំណេញ៦០% ទៅឱ្យគាត់! ម្យ៉ាងទៀតបើគាត់មិនពេញចិត្តនឹងផលិតផលទាំងនោះគាត់អាចប្ដូរយកលុយពី ក្រុមហ៊ុនដោយគ្មានលក្ខខណ្ឌ!»។

កញ្ញា សេន គីមវែង និស្សិតនៃសាកលវិទ្យាល័យអាស៊ីអឺរ៉ុបប្រាប់ Sabay ថា កញ្ញាបានចុះឈ្មោះដែរ ប៉ុន្តែកញ្ញាមិនគិតថាក្រុមហ៊ុននោះបោកប្រាស់ទេ។ «ក្រុមហ៊ុននឹងអត់បោកទេ តែក្រុមហ៊ុនហ្នឹងឆ្លាតជ្រុល! ឆ្លាតត្រង់ថា មានផលិតមកមិនបាច់ភ័យខ្លាចអត់ទីផ្សារ ខ្លាចអត់អ្នកប្រើ! មិនបាច់ប្រកួតប្រជែង! មិនបាច់អស់លុយផ្សាយពាណិជ្ជកម្ម! ខ្ញុំមិនបង់លុយចុះឈ្មោះព្រោះអីខ្ញុំគិតថាខ្ញុំមានលុយដែរ ហេតុអីក៏មិនអាចទៅទិញរបស់ដែលខ្ញុំចង់ទិញបាន? ហើយមួយទៀតបងជាអ្នកវាគ្មិនហ្នឹងដូចជា គ្មានឃើញពាក់មាសពាក់ពេជ្រ ឬក៏មានរបស់ប្រើថ្លៃៗ សមនឹងប្រាក់ចំណូលរាប់ពាន់ដុល្លារផង! តែគាត់ប្រាប់ថាគាត់ជោគជ័យក្នុងការងារហ្នឹង! សរុបទៅកាលហ្នឹងខ្ញុំខាតថ្លៃសាំងជិះទៅ! និងខាតពេលពីរម៉ោងអង្គុយស្ដាប់គេ! ស្ដាប់គេអូសក្រឡាឡើងវិលមុខ! (សើច)»។ គីមវែង បន្ថែម។

លោកកាយ ឫទ្ធីជាសាស្ត្រាចារ្យនៃសាកលវិទ្យាល័យមេគង្គកម្ពុជាបានឱ្យដឹងថា ជារឿងល្អប្រសើរដែលការងារបែបនេះផ្ដល់ប្រាក់ចំណូលដល់យុវជន ហើយយុវជនក៏អាចឆក់យកឱកាសការងារ និងស្វែងរកបទពិសោធន៍បាន។ ប៉ុន្តែក្រុមហ៊ុនខ្លះអូសទាញឱ្យបង់លុយ ខណៈបំណងពិតអ្នករកការងារ ចង់ទទួលបានប្រាក់ចំណូលតាមរយៈការបញ្ចេញកម្លាំងកាយ និងបញ្ញាផ្ទាល់ខ្លួន។ «ខ្ញុំមិនថាទាំងអស់ទេ តែមានក្រុមហ៊ុនមួយចំនួនបានអូសទាញយុវជនឱ្យបង់ប្រាក់ នេះជាការបោកប្រាស់ហើយ! យើងនិយាយថាផ្ដល់ការងារឱ្យគេតែបែរជាយកលុយគេឱ្យចូលហ៊ុនម៉េចត្រូវ! ព្រោះថាទាំងយើងទាំងគេគឺចង់ចូលធ្វើការដែលមិនចាំបាច់ត្រូវចំណាយលុយឡើយ យើងចង់បានចំណូលមកវិញដោយការប្រើកម្លាំងកាយនិងបញ្ញារបស់យើង!»។

ដោយឡែកលោកបណ្ឌិត សុខ ទូច សកលវិទ្យាធិការនៃសាកលវិទ្យាល័យខេមរៈបានបញ្ចេញទស្សនៈថា នេះជាចរិតរបស់យុវវ័យខ្មែរមួយចំនួនដែលចង់ធ្វើការតិចបានលុយច្រើន រៀនតិចចេះច្រើន។ តើត្រឹមត្រូវទេ ដែលយុវវ័យត្រូវតែចំណាយប្រាក់ជាមុន ដើម្បីប្ដូរជាផលិតផលប្រើប្រាស់និងណែនាំតៗគ្នាដើម្បីបានប្រាក់កុំមីស្យុង? លោកសុខ ទូចបានលើកឡើងថា យុវជនអាចនឹងប្រឈមការខាតបង់ខ្ពស់ និងមិនបានអ្វីជាប្រយោជន៍ត្រឡប់មកវិញ។

លោកសាស្ត្រាចារ្យបានផ្ដាំផ្ញើដល់យុវវ័យនូវបីចំណុចសំខាន់ៗជុំវិញបញ្ហាខាងលើ ទីមួយគឺ សូមធ្វើការស្រាវជ្រាវពីការងារឱ្យបានពេញលេញ! ទីពីរ គ្មានអ្វីដែលងាយស្រួលទេ ការងារណាក៏ត្រូវការឱ្យយើងប្រើកម្លាំងកាយ បញ្ញាបូកនឹងក្រមសីលធម៌របស់យើងដែរ! ទីបីអ្វីដែលងាយស្រួលពេកមិនអាចកើតមានទេលើកលែងតែយើងកើតក្នុងត្រកូលអ្នកមាន ដែលអាចរកលុយបានស្រួលធ្វើការបានស្រួល! តែបើយើងកើតមកក្នុងត្រកូលអ្នកធម្មតាគឺទាមទារពេលវេលានិងចំណេះដឹង!»៕

អានអត្ថបទ៖ វីដេអូ បីថ្ងៃកកកុញរាំផ្អើលនៅ Pub Street សៀមរាប

អត្ថបទ៖គង់ ច័ន្ទវ៉ាន់ណេង