ក្រុមហ៊ុន​ Google បាន​ដាក់​ដំណើរការ​គម្រោង​ពីរ​ទាក់ទង​ប្រទេស​កម្ពុជា​គឺ Google Street View ជា​សេវា​បង្ហាញ​រូបភាព​ក្នុង​ប្រព័ន្ធ​ផែន​ទី Google Map និង Google Translate ដែល​បាន​ដាក់​បញ្ចូល​ភាសា​ខ្មែរ​សម្រាប់​សេវា​បកប្រែ​លើ​បណ្ដាញ​អ៊ីនធឺណិត។

​ការ​បង្កើត​គម្រោង​របស់ Google បាន​ធ្វើ​ឲ្យ​​​​​​កម្ពុជា​លេច​មុខមាត់​លើ​ឆាក​អន្តរជាតិ ក៏​ដូចជា​បាន​​ជួយ​ដល់​ការអភិវឌ្ឍ​វិស័យ​ទេសចរ​ដែល​អាចទាក់ទាញ​ភ្ញៀវ​ទេសចរ​អន្តរជាតិ​កាន់តែ​ច្រើន​ចូល​មក​ទស្សនា​ប្រទេស​កម្ពុជា។

លោក បេ ចន្រ្តា ប្រធាន​ដឹកនាំ​កម្មវិធី​បារខែម​បាន​ឲ្យ​ដឹង​ថា ការ​បង្កើត​គម្រោង​​ពី​ប្រទេស​កម្ពុជា​របស់ Google បាន​​ជួយ​លើក​មុខមាត់​ប្រទេស​កម្ពុជា​ឲ្យ​លេច​​ត្រដែត​នៅ​លើ​ឆាក​អន្តរជាតិ ពីព្រោះ​ Google ជា​ក្រុមហ៊ុន​បច្ចេកវិទ្យា​ដ៏​ធំ​ដែល​មាន​កេរ្តិ៍ឈ្មោះ​និង​​ទទួល​ស្គាល់​ពី​​អ្នក​ប្រើប្រាស់​​ជុំវិញ​ពិភពលោក។

កន្លង​ទៅ​ប្រទេស​កម្ពុជា​ ត្រូវ​គេ​មើល​ឃើញ​ថា​ជា​ប្រទេស​ដែល​អន់ថយ​ទាំង​ធនធាន​មនុស្ស និង​ការ​អភិវឌ្ឍ។ ដូច្នេះ​​​​​ការ​បង្កើត​គម្រោង​របស់ Google ពី​ប្រទេស​កម្ពុជា ​​នឹង​​ធ្វើ​ឲ្យ​កម្ពុជា​​កាន់​តែ​ទទួល​បាន​ការ​ចាប់​អារម្មណ៍​ពី​ពិភពលោក​ខាង​ក្រៅ ដែល​នឹង​អាច​ចូលរួម​​ចំណែក​ទាក់ទាញ​​​ភ្ញៀវ​ទេសចរ​​មក​ទស្សនា​កម្សាន្ត​ ដើម្បី​ជួយ​បង្កើន​ចំណូល​ថវិកា​ជាតិ។

លោក​បន្ត​ថា ការ​ចាប់​អារម្មណ៍​របស់ Google ពី​ប្រទេស​កម្ពុជា ក៏​ដោយសារ​ពួកគេ​មើល​ឃើញ​ពលរដ្ឋ​ខ្មែរ​ជា​ច្រើន ​កំពុង​តែ​ប្រើប្រាស់​ផលិតផល​បច្ចេកវិទ្យា​របស់ Google យ៉ាង​ច្រើន​។ ម្យ៉ាង​វិញ​ទៀត​​ពលរដ្ឋ​កម្ពជា​ក៏​​បាន​ជួយ​ជ្រោមជ្រែង​យ៉ាង​សកម្ម​បំផុត​លើ​ការ​អភិវឌ្ឍ​ផលិតផល​បច្ចេកវិទ្យា​របស់ Google ដែល​នាំ​ឲ្យ​​ផលិតផល​របស់ Google ទទួល​បាន​ការ​គាំទ្រ និង​ប្រើប្រាស់​យ៉ាង​ទូលំទូលាយ​ដូច​បច្ចុប្បន្ន​នេះ។

ក្រុម​ហ៊ុន Google បាន​ចាប់​ផ្ដើម​គម្រោង​ពីរ​ពី​ប្រទេស​កម្ពុជា​គឺ​គម្រោង​កម្មវិធី​​​ប្រមូល​រូប​ភាព​តាម​ដង​វិថី Street View និង Google Translate។ Google Street view ក្រុមហ៊ុន Google ​ផ្តោត​លើ​ខេត្ត​គោលដៅ​មាន​​រាជ​ធានី​ភ្នំពេញ សៀមរាប និង​ខេត្ត​ជាង​១០​ទៀត​ ដោយ​អនុញ្ញាត​ឲ្យ​អ្នក​ប្រើ​ប្រាស់​អាច​ស្វែង​រក​រូប​ភាព​​កម្រិត ​៣៦០​ដឺក្រេ​នៃ​ដងវិថី និង​​ទីតាំង​ប្រវត្តិសាស្ត្រ​នានា​នៅ​ក្នុង​ទីក្រុង​ និង​ខេត្ត​ទាំង​នេះ​​។ ចំណែក Google Translate ក្រុមហ៊ុន Google បាន​ដាក់​បញ្ចូល​ភាសា​ខ្មែរ​សម្រាប់​សេវា​បកប្រែ​ជាមួយ​ភាសា ៩០ ទៀត នៅ​លើ​បណ្ដាញ​អ៊ីនធឺណិត។

លោក បូវី ឈុនឡេង សមាជិក​ក្រុម CAUG ជា​ក្រុម​ដែល​គាំទ្រ​និង​ប្រើប្រាស់​ប្រព័ន្ធ Android នៅ​កម្ពុជា ក៏​បាន​បង្ហាញ​ការ​ចាប់​អារម្មណ៍​សម្រាប់​គម្រោង Google ពី​ប្រទេស​កម្ពុជា ដោយ​លោក​គិត​ថា​គម្រោង​នេះ ក្រៅ​ពី​អាច​ជួយ​លើក​មុខមាត់​ប្រទេស​កម្ពុជា​នៅ​លើ​ឆាក​អន្តរជាតិ ក៏​បាន​ជួយ​ជំរុញ​ដល់​ភ្ញៀវ​ទេសចរ​មក​ទស្សនា​ប្រទេស​កម្ពុជា ដើម្បី​អាច​នាំ​ចំណូល​ចូល​ជាតិ​បាន​យ៉ាង​ក្រាស់ក្រែល។

បន្ត​អាន៖ ក្រុមហ៊ុន​ទូរសព្ទ​ធំ ៣ ដណ្តើម​កាន់កាប់​ទីផ្សារ​ស្ទើរ​ទាំង​ស្រុង

បន្ត​អាន៖ ការ​​​ប្រើប្រាស់​អ៊ីនធឺណិត​នៅ​កម្ពុជា​កើន​ឡើង​ និង​សម្រួល​ជីវភាព​​រស់នៅ​ប្រជាជន

អត្ថបទ៖ ប៊ុណ្ណារ៉ា