ស្រីស្អាត វិទីនី អត់សង្ឃឹមខ្ពស់ តែលោកអគ្គលេខាធិការសង្ឃឹមដល់ផ្តាច់ព្រ័ត្រនៅស៊ីហ្គេម

2015-04-28 16:27:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកអគ្គលេខាធិការ ហែម គីរី និង កីឡាការិនីជម្រើសជាតិកម្ពុជា ហែមថុន វិទីនី បានបង្ហាញទំនុកចិត្តខុសគ្នាសម្រាប់ការចូលរួមប្រកួតក្នុងព្រឹត្តិការណ៍កីឡា ស៊ីហ្គេម នៅប្រទេសសិង្ហបុរីនាពេលខាងមុខនេះ។

លោក ហែម គីរី កំពុងបង្ហាត់ក្រុមជម្រើសជាតិ

កីឡាការិនីស្រស់សោភា ហែមថុន វិទីនី ដែលទើបឈ្នះមេដាយមាសហែលទឹកថ្នាក់ជាតិ៥វិញ្ញាសាខុសគ្នាកាលពីពេលថ្មីៗនេះបាននិយាយថា កញ្ញាមិនរំពឹងខ្ពស់ថានឹងអាចឈ្នះមេដាយពីព្រឹត្តិការណ៍កីឡាស៊ីហ្គេមឆ្នាំនេះទេ ពីព្រោះប្រទេសគេផ្សេងសុទ្ធតែខ្លាំង ប៉ុន្តែកញ្ញានឹងខំប្រឹងប្រែងឲ្យអស់ពីសមត្ថភាព។ សម្រាប់ការត្រៀមខ្លួនឆ្នាំនេះ កញ្ញាបានហ្វឹកហាត់ជារៀងរាល់ថ្ងៃទាំងបច្ចេកទេស និងល្បឿនដើម្បីឲ្យការហែលរបស់នាងកាន់តែលឿនជាងមុន។

ចំពោះលោក ហែម គីរី អគ្គលេខាធិការសហព័ន្ធកីឡាហែលទឹកកម្ពុជា និងជាគ្រូបង្វឹកបាននិយាយថា កីឡាករ កីឡាការិនី ជម្រើសជាតិបានបង្កើនការហ្វឹកហាត់ចាប់តាំងពីខែមករាមកដើម្បីត្រៀមក្នុងការប្រកួតព្រឹត្តិការណ៍ ស៊ីហ្គេម។ ចំណុចដែលត្រូវបង្កើនតាំងពីចាប់ផ្ដើមហ្វឹកហាត់មក គឺកម្លាំងនិងបច្ចេកទេស ពីព្រោះលោកយល់ថា ពួកគេនៅមានកម្រិតមិនទាន់ល្អទាំងស្រុង។

លោកបានបន្ថែមថា ក្នុងចំណោមកីឡាករ កីឡាការិនីទាំងអស់មិនរំពឹងទទួលបានមេដាយទេ ប៉ុន្តែលោកមានជំនឿខ្ពស់លើកីឡាការិនី ហែមថុន វិទីនី ពិតជាអាចឈានដល់វគ្គផ្ដាច់ព្រ័ត្រ។ ហែមថុន វិទីនី កំពុងហ្វឹកហាត់ និងហែលប្រដេញគ្នាជាមួយកីឡាករជម្រើសជាតិហែលទឹកកម្ពុជាដើម្បីបង្កើនកម្លាំង។

អគ្គលេខាធិការរូបនេះប្រាប់ទៀតថា ទោះបីជា ហែមថុន វិទីនី ជាកីឡាការិនី ប៉ុន្តែកីឡាករជម្រើសជាតិកម្ពុជាមួយចំនួនមិនអាចហែលឈ្នះនាងឡើយ។

កីឡារិនីជម្រើសជាតិកម្ពុជា ហែមថុន វិទីនី ធ្លាប់បានចូលរូមប្រកួតក្នុងព្រឹត្តិការណ៍កីឡាស៊ីហ្គេមជាច្រើនលើកមកហើយ ប៉ុន្តែមិនទាន់ធ្លាប់ឈ្នះបានមេដាយណាមួយឡើយ។ ក្តីស្រមៃរបស់នាងគឺឈ្នះមេដាយឲ្យបានពីកីឡាស៊ីហ្គេមនេះ មុនពេលនាងកំណត់ទិសដៅខាងមុខទៀត។ ចាំមើលថា កីឡាការិនីម្នាក់នេះអាចបំបែកកំណត់ត្រាមិនធ្លាប់ឈ្នះមេដាយទេ?