តារាជើងចាស់ ប៉ែន សុផានី ចាក់សាក់បញ្ជាក់ក្តីស្រលាញ់ចំពោះ...

2015-05-07 17:23:29
ចំនួនមតិ 0 | ចំនួនចែករំលែក 0

ចន្លោះមិនឃើញ

"បងគ្មានអីដើម្បីបញ្ជាក់នូវក្តីស្រលាញ់ចំពោះពួកគាត់ទេ អីចឹងបងមានតែសម្រេចចិត្តសាក់ជាឃ្លាអក្សរខ្មែរថា ប៉ាម៉ាក់ជាកែវភ្នែករបស់កូនស្ថិតនៅក្នុងបេះដូងកូនជាអមតៈ"។ ប៉ែន សុផានី ថ្លែង។

តារាសម្ដែងជើងចាស់រូបនេះ ថ្លែងដូច្នេះ បន្ទាប់ពីនាងបានបង្ហាញឲ្យឃើញស្នាមសាក់លើកញ្ចឹងកររបស់អ្នកនាង។ អ្នកនាង ប៉ែន សុផានី ថ្លែងថា កាលពីថ្ងៃនៃក្តីស្រលាញ់១៤កុម្ភៈ ម្តាយរបស់អ្នកនាង ស្រក់ទឹកភ្នែកនៅមុខអ្នកនាង ព្រោះតែរំជួលចិត្តចំពោះការសាក់បញ្ជាក់នូវការស្រលាញ់ចំពោះរូបគាត់ជាម្តាយ។

"ថ្ងៃនៃក្តីស្រលាញ់ហ្នឹងបង បាននាំម្តាយរបស់បងទៅពិសាបាយហើយពេលនោះបងបានបង្ហាញនូវឃ្លាដែលបងបានសាក់ឲ្យគាត់បានឃើញដល់ថ្នាក់ម្តាយបងហូរទឹកភ្នែកផងណាអូន"។

ក្នុងនោះ ចាន់ សុផានី បានបន្ថែមទៀតថា៖"ការហូរទឹកភ្នែករបស់ម្តាយបងក៏ព្រោះតែគាត់មានការអាណិតហើយគិតថារូបបងជាតារាពេលសាក់អីចឹងទៅធ្វើឲ្យមិនស្អាតមិនល្អអីចឹងណា!"។ សុផានី បន្ថែម។

ប៉ែន សុផានី ក្នុងថ្ងៃភ្ជាប់ពាក្យ ម៉ៅ សុចាន់ធី

និយាយពីរឿងសាក់នេះ អ្នកនាង សុផានី ឲ្យដឹងទៀតថា មានមនុស្សមួយចំនួនបានយល់ច្រលំទៅលើការសាក់របស់អ្នកនាង ថាក្នុងន័យខូចចិត្តចំពោះមនុស្សប្រុសទៅវិញ។ "អឺ...បងដូចជាហួសចិត្តដែរមានអ្នកកាសែតមួយចំនួនចុះថាបងខូចចិត្តដោយសារមនុស្សប្រុសទើបទៅសាក់អីចឹងៗដោយគ្មានសួរបងអីម៉ាម៉ាត់ ប៉ុន្តែតាមការពិតបងគ្មានខូចចិត្តដោយសារនរណាទេបងសាក់ហ្នឹងក៏ព្រោះតែចង់បញ្ជាក់ក្តីស្រលាញ់ចំពោះឪពុកម្តាយបងតែប៉ុណ្ណឹងគ្មានក្នុងន័យអីផ្សេងនោះទេអូន"។

មកដល់សព្វថ្ងៃ អ្នកនាង ប៉ែន សុផានី នៅសល់តែម្ដាយប៉ុណ្ណោះ ក្រោយពីលោកឪពុករបស់អ្នកនាង បានស្លាប់ជាង៣ឆ្នាំហើយ។ ដោយសារតែបែបនេះ ទើបអ្នកនាងសម្រេចចាក់សាក់មួយឃ្លានេះឡើង។ "បងចង់ឲ្យក្តីស្រលាញ់មួយនេះស្ថិតនៅក្នុងដួងចិត្តបងជានិច្ចទោះនៅពេលបងស្លាប់ទៅក៏ដោយ"។