ប៉េង ចាន់ថុល៖ "ទោះបរទេសប្រាក់ខែច្រើន តែខ្ញុំចង់សម្រេចក្ដីប្រាថ្នានៅស្រុកខ្មែរ"

2015-05-25 20:41:02
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សម្នាក់ៗមានទស្សនៈខុសគ្នា។ អ្នកខ្លះខំប្រឹងប្រលងអាហារូបករណ៍ ដើម្បីសិក្សានិងធ្វើការនៅស្រុកក្រៅ ប៉ុន្តែកញ្ញា ប៉េង ចាន់ថុល ដែលក្ដាប់បានអាហារូបករណ៍ ថ្នាក់អនុបណ្ឌិតរបស់សហគមន៍អឺរ៉ុបលើមុខជំនាញ "គ្រប់គ្រងគុណភាពចំណីអាហារ" បានប្ដេជ្ញាថា ក្រោយបញ្ចប់ការសិក្សា កញ្ញានឹងវិលត្រឡប់មកកម្ពុជាវិញ បើទោះបីនៅបរទេសមានប្រាក់ខែច្រើនក្ដី ព្រោះថាកញ្ញាមានគោលដៅជីវិតច្បាស់លាស់ និងចង់សម្រេចក្ដីប្រាថ្នារបស់ខ្លួននៅលើទឹកដីកំណើត។

អតីតនិស្សិតថ្នាក់វិស្វករ នៃវិទ្យាស្ថានបច្ចេកវិទ្យាកម្ពុជា ចាន់ថុល ដែលបច្ចុប្បន្នកំពុងចុះកម្មសិក្សានៅប្រទេសព័រទុយហ្គាល់ បានប្រាប់ Sabay ក្នុងសម្ដីមួយៗនិងច្បាស់ថា បើសិនជាគិតលើប្រាក់បៀវត្សរ៍ អ្នកណាក៏ចង់នៅ និងធ្វើការនៅស្រុកគេដែរ។ មនុស្សម្នាក់ៗមានការយល់ឃើញខុសគ្នា ប៉ុន្តែកញ្ញាផ្ទាល់ចង់ធ្វើការនៅស្រុកខ្មែរវិញ។

ចាន់ថុល បានប្រាប់យ៉ាងម៉ឺងម៉ាត់ថា "ធ្វើការនៅស្រុកខ្មែរ បំពេញក្ដីស្រម៉ៃ និងរស់នៅក្បែរក្រុមគ្រួសារ ទើបជាសេចក្ដីសុខពិតប្រាកដរបស់ខ្ញុំ"។

យុវនារីមានស្រុកកំណើត នៅភូមិចំការសំរោងមួយ ឃុំចំការសំរោង ស្រុកបាត់ដំបង ខេត្តបាត់ដំបង បញ្ជាក់យ៉ាងដូច្នេះថា កញ្ញាចង់ក្លាយជាគ្រូបង្រៀនមួយរូប ដែលជួយបណ្ដុះបណ្ដាលធនធានមនុស្ស លើមុខជំនាញ "គ្រប់គ្រងគុណភាពអាហារ" និងចង់ធ្វើជាអ្នកប្រឹក្សាយោបល់ ដល់អ្នកលក់ អ្នកផលិតសិប្បកម្មអាហារ និងជាអ្នករៀបចំប្រព័ន្ធសុវត្ថិភាពចំណីអាហារ ឱ្យមានគុណភាព សុវត្ថិភាព ជាប្រយោជន៍ដល់ប្រជាជនខ្មែរ។ សព្វថ្ងៃចាន់ថុលមើលឃើញថា គុណភាព និងបរិមាណអាហារនៅកម្ពុជា មានកម្រិតនៅឡើយ ដែលជាគុណវិបត្តិ ក្នុងការនាំចេញ និងប៉ះពាល់ដល់សុខភាពអ្នកប្រើប្រាស់។

អតីតសិស្សវិទ្យាល័យ ព្រះមុន្នីវង្ស ខេត្តបាត់ដំបង ទទួលបានជំនួយអាហារូបករណ៍ថ្នាក់អនុបណ្ឌិតជំនាញ "គ្រប់គ្រងចំណីអាហារ ឬ Erasmus Mundus-Edamus, "Sustainable Management of Food Quality” ពីសហគមន៍អឺរ៉ុប (European Union) និងគ្រប់គ្រងសម្របសម្រួលដោយ សាកលវិទ្យាល័យម៉ុងពឺលីយ៉េ (Montpellier) នៃប្រទេសប្រទេសបារាំង រួមសហការជាមួយសាកលវិទ្យាល័យផ្សេងៗទៀតជាដៃគូ រយៈពេល២ឆ្នាំ។

កញ្ញាបានរៀបរាប់ថា កម្មវិធីសិក្សាខាងលើ មានគោលបំណងអប់រំនិស្សិតអន្តរជាតិ ឱ្យក្លាយជាអ្នកជំនាញគ្រប់គ្រងគុណភាព និងសុវត្ថិភាពចំណីអាហារ ដើម្បីកុំឱ្យប៉ះពាល់ដល់សុខភាពអ្នកបរិភោគ។

បើតាមការបរិយាយរបស់ ចាន់ថុល មុខជំនាញដែលកញ្ញារៀននេះ គឺយ៉ាងហោចណាស់ និស្សិតអាចជ្រើសរើសប្រទេសចំនួនពីរ ដើម្បីទៅសិក្សាលើមុខជំនាញដែលខ្លួនពេញចិត្ត ក៏ប៉ុន្តែនៅឆមាសទី១និស្សិតទាំងអស់ ត្រូវតម្រូវឱ្យសិក្សានៅសាកលវិទ្យាល័យ ម៉ុងពឺលីយ៉េ ជាចាំបាច់ដើម្បីសិក្សាលើមុខវិជ្ជាគ្រឹះដូចជា មុខវិជ្ជាសារធាតុចិញ្ចឹមសម្រាប់សុខភាពនៅក្នុងអាហារ មុខវិជ្ជាគុណភាពអាហារ និង មុខវិជ្ជាច្បាប់គ្រប់គ្រងគុណភាពសុវត្ថិភាពអាហារ។

បន្ទាប់មកនៅឆមាសទីពីរនិងទីបី និស្សិតអាចជ្រើសរើសប្រទេសពីរ ដែលក្នុងជម្រើសនេះ ត្រូវតែមានប្រទេសមួយជាចាំបាច់ គឺអ៊ីតាលី (សិក្សាលើមុខវិជ្ជា បច្ចេកវិទ្យាកសិកម្ម) ឬអេស្ប៉ាញ (សិក្សាលើមុខវិជ្ជា គ្រប់គ្រងទីផ្សារផលិតផល ចំណីអាហារ)។ ក្រៅពីនេះនិស្សិតអាចរើសយកប្រទេសដៃគូផ្សេងទៀត ដើម្បីសិក្សាលើមុខវិជ្ជាផ្សេងៗទៀត ដែលខ្លួនពេញចិត្តផងដែរតួយ៉ាង ក្រិក ព័រទុយហ្គាល់ កាណាដា អាល់ហ្សេរី និងជប៉ុន។

ក្រោយសិក្សានៅបារាំងមួយឆមាសកន្លះ និស្សិតរូបនេះបានសម្រេចចិត្តទៅសិក្សា នៅប្រទេសអេស្ប៉ាញមួយឆមាស និងព័រទុយហ្គាល់មួយឆមាសកន្លះ ព្រោះតែសាកលវិទ្យាល័យក្នុងប្រទេសទាំងពីរនេះ ផ្ដល់នូវមុខវិជ្ជាដែលកញ្ញាពេញចិត្តនិងត្រូវជំនាញ។ ចាន់ថុល បញ្ជាក់។

មករៀននៅបារាំង ចាន់ថុល ជួបការលំបាកច្រើន ទាំងការរៀនសូត្រ ការស្ដាប់និងនិយាយភាសា និងការរស់នៅទៀតសោត មិនខុសពីនិស្សិតខ្មែរផ្សេងប៉ុន្មានទេ ព្រោះអ្វីៗជាចំណុចចាប់ផ្ដើម។ កញ្ញាថា " ដើម្បីទាន់គេ ខ្ញុំត្រូវរៀនច្រើនម៉ោង ហត់ខ្លាំងពេលខ្លះ មានតែពេលមួយម៉ោងប៉ុណ្ណោះ ញ៉ាំអាហារពេលថ្ងៃ។ ខ្ញុំស្ត្រេសខ្លាំង ខ្ញុំស្រណោះខ្លួនឯង ហើយនឹកផ្ទះ"។

និស្សិតជាប់អាហារូបករណ៍ថ្នាក់វិស្វកររយៈពេល៥ឆ្នាំ នៃវិទ្យាស្ថានបច្ចេកវិទ្យាកម្ពុជាក្នុងឆ្នាំ២០០៨រូបនេះ រៀបរាប់ទាំងជឿជាក់ថា ទោះត្រូវប្រឈមការលំបាកក្ដី កញ្ញានៅតែប្រឹងខំមាត់សង្កត់ចិត្ត ដើម្បីជម្នះភាពទន់ជ្រាយ ហើយលើកទឹកចិត្តខ្លួនឯងជានិច្ចថា គ្មានអ្វីដែលស្រួលនោះទេ សំខាន់ការតស៊ូ។ បន្ថែមពីការជំរុញខ្លួនឯង ចាន់ថុល ក៏ទទួលការលើកទឹកពីក្រុមគ្រួសារ មិត្តភ័ក្ដិ និងរៀមច្បងផងដែរ ដែលធ្វើឱ្យនាងជោគជ័យដល់ថ្ងៃនេះ។

នៅពេលសួរថា តើទទួលបានដឹងអ្វីខ្លះពីជំនាញនេះ? យុវតីវ័យ២៥ឆ្នាំថ្លែងថា កញ្ញាដឹងពីជំនាញរៀបចំប្រព័ន្ធគ្រប់គ្រងសុវត្ថិភាពអាហារពីវត្ថុធាតុដើម ដល់ផលិតផលសម្រេច។ ចេះស្រាវជ្រាវនិងអភិវឌ្ឍ ការផលិតអាហារ ការកែច្នៃអាហារ ការថែរក្សាអាហារឱ្យបានយូរប្រកបដោយគុណភាព សុវត្ថិភាព និងចេះជំនាញទីផ្សារចំណីអាហារ។ មិនផ្ដោតចំណេះដឹងលើជំនាញ ចាន់ថុល ទទួលបានបទពិសោធន៍ និងចំណោះដឹងផ្សេងៗក្នុងការរស់នៅ ទំនាក់ទំនង និងវប្បធម៌ជាដើម។

បើងាកមកនិយាយពីអាហារូបករណ៍ថ្នាក់អនុបណ្ឌិតជំនាញ គ្រប់គ្រងគុណភាពអាហារ អតីតនិស្សិតអក្សរសាស្ត្រអង់គ្លេស នៃសាកលវិទ្យាល័យអាស៊ីអឺរ៉ុបរូបនេះបានឱ្យដឹងថា កញ្ញាជាប់អាហារូបករណ៍ក្នុងឆ្នាំ២០១៣ ដោយគ្មានការប្រឡងទេ គឺគ្រាន់តែបំពេញពាក្យសុំអាហារូបករណ៍តាមអ៊ីនធឺណិត ដើម្បីឱ្យគេជ្រើសរើស។ ពាក្យសុំនោះ មើលលើកំណត់ត្រាពិន្ទុចាប់ពីឆ្នាំទី៣ដល់ទី៥ នៅវិទ្យាស្ថានបច្ចេកវិទ្យាកម្ពុជា លិខិតអនុសាសន៍ពីលោកគ្រូអ្នកគ្រូ (Recommendation letter) និងបទពិសោធន៍ការងារ ឬកិច្ចការស្រាវជ្រាវទាក់ទងនឹងជំនាញ ដែលដាក់ពាក្យសុំជាដើម។ ក្រោយមើលឯកសារ ពាក់ព័ន្ធផ្សេងៗដែលត្រូវតាមការចង់បានហើយ យើងត្រូវធ្វើបទសម្ភាសន៍ជាភាសាអង់គ្លេស និងបារាំង។

នេះមិនមែនជាលើកទី១ទេ អតីតដែលអាហារូបករណ៍ថ្នាក់វិស្វករ នៅវិទ្យាស្ថានបច្ចេកវិទ្យាកម្ពុជាបានចេញទៅក្រៅប្រទេស។ ក្នុងឆ្នាំ២០១២ ចាន់ថុល បានទៅទស្សនកិច្ចប្រទេសជប៉ុន រយៈពេល២សប្ដាហ៍។ បច្ចុប្បន្នកញ្ញាកំពុងចុះកម្មសិក្សា ដើម្បីបញ្ចប់ថ្នាក់អនុបណ្ឌិត នៅមជ្ឈមណ្ឌលស្រាវជ្រាវ នៃសាកលវិទ្យាល័យមួយ នៅព័រទុយហ្គាល់ លើប្រធានប "សារធាតុសរីរាង្គ ដែលរក្សាអាហារ និងផលិតអាហារឱ្យទុកបានយូរ ដោយមិនប៉ះពាល់សុខភាពអ្នកបរិភោគ"។

ក្រោយបញ្ចប់អតីតសមាជិកក្រុមជយលាភីលេខ៣ និងទទួលបានមេដាយសំរឹទ្ធ លើគំនិតអាជីវកម្ម "សេវាផ្ដល់យោបល់លើបច្ចេកទេសចំណីអាហារ" ក្នុងឆ្នាំ២០១៣ដដែល នឹងត្រឡប់មកកម្ពុជាវិញ ដើម្បីដាក់ពាក្យបម្រើការងារជាបង្រៀន ក្នុងគោលបំណងផ្ទេរចំណេះ និងបណ្ដុះបណ្ដាលធនធានមនុស្សលើជំនាញនេះ ហើយគោលបំណងមួយទៀតនោះ កញ្ញានឹងស្វែងរកអាហារូបករណ៍ថ្នាក់បណ្ឌិតមួយកម្រិតទៀត៕