ខ្ញុំពិតជាខ្លាច ខ្លាចថាពេលវេលាបេះដូងខ្ញុំទ្រាំចាំ បានវិញត្រឹមសន្យាខ្យល់

2015-06-01 14:00:55
ចំនួនមតិ 0 | ចំនួនចែករំលែក 0

ចន្លោះមិនឃើញ

សួស្តីបង Sabay និងប្រិយមិត្តរបស់គេហទំព័រ Sabay ទាំងអស់។ មានរឿងមួយដែលខ្ញុំ បានលាក់ទុកក្នុងចិត្ត ដែលមិនដឹងថាគួរចែករំលែកជាមួយអ្នកណា ទើបថ្ងៃនេះខ្ញុំសម្រេច ចិត្តវាយអត្ថបទនេះរួចផ្ញើមកបងសប្បាយ។

មុនដំបូងខ្ញុំសូមរៀបរាប់ពីនាងខ្ញុំជាមុនសិននាងខ្ញុំឈ្មោះកន្និកា។ ឆ្នាំនេះខ្ញុំមានអាយុ ២៨ឆ្នាំ ខ្ញុំមានការងារល្អ និងមានប្រាក់ខែច្រើនគួរ សមនៅក្រុមហ៊ុនឯកជនមួយក្នុងទីក្រុងភ្នំពេញ ដែលជាស្រុកកំណើតរបស់ខ្ញុំស្រាប់។ បើ និយាយពីរូបសម្បត្តិវិញខ្ញុំអាចចាត់ទុកថាខ្លួនឯងមានសម្រស់គ្រាន់បើ ហើយមានមនុស្សមិនតិចទេដែលតាមស្រលាញ់ខ្ញុំ មិនមែនថាខ្ញុំមិនធ្លាប់មានសង្សារនោះទេ។ ខ្ញុំក៏ធ្លាប់មានបីនាក់ដែរ តែខ្ញុំបានបែកគ្នាហើយ ខ្ញុំហាក់មិនជោគជ័យក្នុងរឿងស្នេហាសោះ បន្ទាប់ពីបែកគ្នាពីអ្នកទី បីនោះខ្ញុំលែងគិតពីបញ្ហាស្នេហាហើយគឺយកចិត្តទុកដាក់តែពីរឿងការងារប៉ុណ្ណោះ ខ្ញុំត្រូវ ខិតខំរកលុយសម្រាប់ចំណាយប្រចាំថ្ងៃខ្លួនឯង ព្រោះខ្ញុំមិនមែនជាកូនអ្នកមានទេ។

ប៉ាម៉ាក់ខ្ញុំ មិនមែនជាអ្នកមានមុខមាត់ខ្ពង់ខ្ពស់ក្នុងសង្គមដែរ អាចនិយាយបានថាមានជីវភាពសមរម្យ តែមិនមានអ្វីជាបញ្ហាទេព្រោះខ្ញុំពេញចិត្តនិងអ្វីដែលខ្ញុំមានសព្វថ្ងៃ គឺសុភមង្គលក្នុងគ្រួសារ។ គ្រួសារខ្ញុំមានសេចក្តីសុខណាស់ដោយសារម្នាក់ៗចេះអធ្យាស្រ័យ និងយោគយល់គ្នាទាំង នេះជាអ្វីដែលប៉ាម៉ាក់បានបង្រៀនខ្ញុំ គឺធ្វើអ្វីកុំឲ្យប៉ះពាល់អ្នកដទៃ ត្រូវចេះសន្សំតែសុខ។ ខ្ញុំ យល់ថាខ្លួនឯងមានគំនិតចាស់ទុំណាស់ពេលនេះព្រោះអាយុក៏កាន់តែចាស់ដែរ។ ប៉ាម៉ាក់ក៏ ចេះតែសួរខ្ញុំពីរឿងគូស្រករតែខ្ញុំចេះតែធ្វើហីហី។

លុះថ្ងៃមួយខ្ញុំបានជួបបុរសម្នាក់ គាត់ជាមិត្ត ភ័ក្តិបងជីដូនមួយរបស់ខ្ញុំ។ ថ្ងៃដំបូងដែលខ្ញុំបានជួបគាត់គឺនៅផ្ទះរបស់បងជីដូនមួយខ្ញុំនោះ តែម្តង គាត់បានណែនាំឲ្យខ្ញុំបានស្គាល់គ្នា យើងមិនបាននិយាយគ្នាអ្វីច្រើនទេព្រោះខ្ញុំជា មនុស្សមិនសូវចូលចិត្តនិយាយច្រើនស្រាប់ តែគាត់ហាក់ចង់និយាយលេងសើចច្រើន ជាមួយខ្ញុំ។ ក្រោយពីនោះមកខ្ញុំបានជួបគាត់ពីរ បីដងទៀតដែរពេលមានពិធីជប់លៀង ជាមួយបងជីដូនមួយខ្ញុំ។ ក្រោយមកខ្ញុំក៏បានឃើញគាត់ add ខ្ញុំក្នុង Facebook ខ្ញុំមិនបានគិតច្រើនទេក៏ accept ភ្លាមៗដែរ។ ចាប់តាំងពីថ្ងៃនោះមកគាត់តែងផ្ញើសារមកខ្ញុំមិនដែលដាច់ទេ។ ខ្ញុំក៏ឆ្លើយតបវិញធម្មតាតាមសុជីវធម៌មនុស្សស្គាល់គ្នា មានថ្ងៃមួយគាត់បានសុំតេមក និយាយម្តងជំនួសការផ្ញើសារ។ មួយថ្ងៃទៅមួយថ្ងៃការនិយាយជាមួយគ្នាជាហូរហែរ។

ពួក យើងហាក់និយាយត្រូវគ្នានិងចុះសម្រុងគ្នាណាស់។ គាត់តែងតែសួរពីចំណង់ចំណូលចិត្តនិង បង្រៀនខ្ញុំពីអ្វីៗជាច្រើននៅក្នុងសង្គម គាត់មានអាយុមិនចាស់ជាងខ្ញុំប៉ុន្មានទេ។ គាត់មាន អាយុចាស់ជាងខ្ញុំបួនឆ្នាំ តែពេលខ្លះគាត់មើលទៅដូចជាចាស់ទុំណាស់ហើយក៏មានពេល ខ្លះគាត់ដូចជាកូនក្មេងចឹងតែងនិយាយឲ្យខ្ញុំសើចជានិច្ច។ ម៉្យាងទៀតគាត់តែងនិយាយថាខ្ញុំ ចេះធ្វើខ្លួនគួរឲ្យស្រលាញ់ ខ្ញុំចាប់ផ្តើមមានអារម្មណ៍ថាគាត់មានចិត្តលើខ្ញុំហើយ។ មិនយូរប៉ុន្មានគាត់បានសារភាពប្រាប់ខ្ញុំមែន តែខ្ញុំមិនបានឆ្លើយថាយល់ព្រមទេ ព្រោះយើងទើបតែ បានស្គាល់និងជួបគ្នាបានបីដងប៉ុណ្ណោះ ខ្ញុំមិនអាចជួបគាត់ច្រើនទេព្រោះគាត់រស់នៅ ប្រទេសកាណាដាឯណោះ តែម៉ាក់ប៉ាបងប្អូនគាត់រស់នៅភ្នំពេញ គាត់មានហាងផ្ទាល់ខ្លួននៅទីនោះចឹងហើយគាត់មកលេងទីនេះយូរៗម្តងទេ។ ចាប់តាំងពីថ្ងៃដែលគាត់សារភាព ប្រាប់ថាស្រលាញ់ខ្ញុំ។ ខ្ញុំហាក់ចង់ធ្វើខ្លួនឲ្យឆ្ងាយពីគាត់ ខ្ញុំសារភាពថាខ្ញុំចូលចិត្តអត្តចរិតរបស់គាត់។ គាត់មានរូបសម្បត្តិសមរម្យ និងមានចំណេះដឹងខ្ពស់ ។គាត់គួរតែមិនខ្វះអ្នកដែលស្រលាញ់គាត់ទេ។ គាត់ច្បាស់ជាដឹងខ្លួនថាខ្ញុំបានកម្រិតគម្លាតពីគាត់ តែគាត់នៅតែនិយាយល្អ ជាមួយខ្ញុំធម្មតា។ ថ្ងៃមួយខ្ញុំហាក់មិនមានអារម្មណ៍ល្អសោះដែលធ្វើបែបនេះដាក់គាត់ គាត់ជា មនុស្សល្អមិនគួរចំណាយពេលបែបនេះជាមួយខ្ញុំទេ។ ខ្ញុំក៏បានទម្លាយការពិតប្រាប់គាត់ថាខ្ញុំ មិនមែនស្អប់គាត់ទេ។

ខ្ញុំក៏ចូលចិត្តគាត់ដែរ គ្រាន់តែមានរឿងខ្លះខ្ញុំពិតជាមិនដឹងថាគួរ និយាយយ៉ាងម៉េចឲ្យសម។ អ្នកទាំងអស់គ្នាច្បាស់ជាធ្លាប់ឮពីរឿងប្រកាន់វណ្ណះហើយនៅក្នុង សង្គមបច្ចុប្បន្នជាពិសេសនៅក្នុងខ្សែភាពយន្តក៏មាននិយាយពីបញ្ហានេះដែរ។ គ្រួសារគាត់ កាត់ចិន មានមុខរបរច្រើននៅទីនេះ ថែមទាំងមានមុខមាត់ក្នុងសង្គមទៀតផង។ ខ្ញុំមិនដែល ប្រាថ្នាចង់បានគ្រួសារអ្នកមានអីនោះទេ។ ខ្ញុំជឿថាច្បាស់ជាមិនមានសេចក្តីសុខឡើយ ខ្ញុំពិត ជាខ្វល់ខ្វាយមិនដឹងប្រាប់គាត់យ៉ាងណា តែខ្ញុំនៅតែតាំងចិត្តប្រាប់គាត់ឲ្យបានដឹងកុំទុកយូរ នាំតែសៅហ្មងទាំងគាត់និងខ្ញុំ។

ខ្ញុំបានប្រាប់គាត់ថាខ្ញុំមិនសក្ត័សមនឹងគាត់ទេ បើនិយាយពី វណ្ណះពួកយើងហាក់ដូចជាខុសគ្នាឆ្ងាយបន្តិចហើយ តែគាត់មិនពេញចិត្តនិងហេតុផល របស់ខ្ញុំទេ។ ខ្ញុំដឹងគាត់រស់នៅស្រុកគេ គាត់ច្បាស់ជាមិនគិតពីរឿងនេះទេ តែវាជាហេតុផល តែមួយគត់ក្នុងចិត្តខ្ញុំដែលខ្ញុំចង់ឲ្យគាត់ដឹង។ ទីបំផុតគាត់មិនត្រឹមតែមិនទទួលយកហេតុ ផលរបស់ខ្ញុំទេ ថែមទាំងប្រាប់ខ្ញុំថាទោះមានរឿងនោះកើតឡើងមែនគាត់និងជម្នះវប្បធម៌ ប្រកាន់វណ្ណៈឲ្យបាន។ សម្តីគាត់បានធ្វើឲ្យខ្ញុំមានអារម្មណ៍ថាទុកចិត្តនិងកក់ក្តៅណាស់។ ចាប់តាំងពីថ្ងៃនោះមកខ្ញុំនិងគាត់ចាប់ផ្តើមស្រលាញ់គ្នា។ ទោះបីគាត់នៅឆ្ងាយសែនឆ្ងាយតែក្តីស្រលាញ់ដែលពួកយើងឲ្យគ្នាមិនចាញ់អ្នកដែលនៅក្បែរគ្នានោះទេ។ ពាក្យផ្អែមល្ហែមក្តីបារម្ភ ក្តីនឹករលឹក។ ពេលវេលាទាំងនេះអាចជាការពិសោធន៍ចិត្តរៀងៗ តែស្នេហារបស់យើងមិន មានការប្រែប្រួលឡើយ។

រយៈពេលមួយឆ្នាំបានកន្លងផុតទៅ វាមិនយូរទេតែសម្រាប់អ្នក ដែលរង់ចាំគឺវាយូរសែនយូរ។ ទោះជាយ៉ាងណាវាក៏បានមកដល់ហើយ ជាពេលវេលាដែលខ្ញុំ និងគាត់បានជួបគ្នាម្តងទៀត។ ថ្ងៃណាត់ទីមួយគឺការញ្ញ៉ាំអាហារពេលល្ងាចដ៏រ៉ូមេនទិចជាមួយ នឹងបាច់ផ្កាដ៏ស្រស់ស្អាត ខ្ញុំពិតជារំភើបខ្លាំងណាស់ ជាពិសេសគឺការយកចិត្តទុកដាក់របស់ គាត់ មិនយូរប៉ុន្មានគាត់បានសុំខ្ញុំរៀបការ។ ខ្ញុំដូចជាស្រលាំងកាំងព្រោះវាហាក់ដូចជាលឿន បន្តិចហើយ។ ខ្ញុំបានសុំគាត់ឲ្យទុកពេលឲ្យខ្ញុំគិតមួយរយះទៀត គាត់ក៏យល់ព្រម។

បន្ទាប់មក ទៀតរឿងរបស់ខ្ញុំនិងគាត់ក៏បានដឹងឮដល់ចាស់ៗទាំងសងខាង។ ខ្ញុំបានប្រាប់រឿងរ៉ាវរបស់ខ្ញុំ ទាំងអស់ដល់អ្នកផ្ទះខ្ញុំ ពួកគាត់មិនជំទាស់ទេឲ្យតែពួកខ្ញុំចេះស្រលាញ់គ្នា។ រឿងដែលខ្ញុំបាន គិតនិងខ្លាចនោះពិតជាបានមកដល់មែនហើយ ប៉ាម៉ាក់គាត់បានប្រាប់តាមបងជីដូនមួយខ្ញុំ ថា ខ្ញុំនិងកូនប្រុសគាត់ខុសខែឆ្នាំ ។ តើនេះជាលេសនៃការមិនពេញចិត្តខ្ញុំមែនទេ? ខ្ញុំយល់ ច្បាស់ពីសង្គមមួយនេះ ហើយប៉ាម៉ាក់ខ្ញុំមានការខឹងសម្បារយ៉ាងខ្លាំងចំពោះរឿងនេះ ថែម ទាំងមិនឲ្យខ្ញុំចេញទៅជួបគាត់ទៀតទេ ហើយគាត់ក៏ហាក់ដូចជាមិនសូវខ្វល់ពីខ្ញុំដូចមុន ឬក៏ គាត់បានតាមចិត្តប៉ាម៉ាក់គាត់ហើយ? មើលទៅគាត់ដូចជាស្រលាញ់អ្នកផ្ទះគាត់ណាស់។ ខ្ញុំបានគេងយំរហូត តូចចិត្តណាស់ ឯណាទៅពាក្យដែលគាត់ថាជម្នះរាល់បញ្ហាឲ្យតែបានរស់ នៅជាមួយខ្ញុំ? ឬក៏គាត់បានភ្លេចអស់ហើយ?

ប្រុសសោះ ថាម៉ែឪបង្ខំឲ្យការ ឬគ្រាន់ជាលេសគាត់ទាំងមិនអាសូរបេះដូងខ្ញុំដែលរង់ចាំគាត់រាប់ឆ្នាំ?

រូបតំណាាង

ថ្ងៃមួយមុនគាត់ចេញទៅកាណាដាវិញមួយថ្ងៃ គាត់បានផ្ញើសារមកខ្ញុំហើយបានប្រាប់ខ្ញុំថាគាត់បាននិយាយជាមួយម៉ាក់គាត់ ហើយ ចុងឆ្នាំ នេះគាត់នឹងឲ្យប៉ាម៉ាក់គាត់ចូលស្តីដណ្តឹងខ្ញុំ។ តើខ្ញុំគួរតែចាំគាត់ទេ? គាត់ថាគាត់និងមករស់ នៅទីនេះវិញដើម្បីបាននៅក្បែរខ្ញុំ ខ្ញុំនៅតែគិតថាការមកវិញរបស់គាត់គឺជាការដោះដូរនឹង ពាក់ពន្ធ័ជាមួយខ្ញុំព្រោះខ្ញុំនៅចាំបានថា ប៉ាម៉ាក់គាត់ចង់ឲ្យគាត់មករស់នៅទីនេះវិញណាស់ តែគាត់និងមិនមកវិញទេ។ គាត់ទម្លាប់រស់នៅទីនោះច្រើនឆ្នាំហើយ។ ឬនេះជាវិធីដែលគាត់ ត្រូវធ្វើដើម្បីបានរៀបការជាមួយខ្ញុំ?

បើចឹងមែននោះ ខ្ញុំមិនអាចសូម្បីតែគិតពីការបែកគ្នា ជាមួយគាត់។ តែបើប៉ាម៉ាក់គាត់គ្រាន់តែនិយាយថាយល់ព្រមសិនដើម្បីឲ្យគាត់អស់ចិត្តសិន ក៏មិនដឹង ខ្ញុំនៅតែរង់ចាំគាត់បានជានិច្ច។ ប៉ុន្តែខ្ញុំខ្លាចតែប៉ាម៉ាក់ខ្ញុំទេដែលមិនអនុញ្ញាតឲ្យខ្ញុំរង់ចាំ គាត់ ខ្លាចខ្ញុំខាតពេលឥតប្រយោជន៍ជាមួយនឹងពាក្យសន្យាទាំងនោះ។ តើខ្ញុំគួរគិតបែបណា ទៅ?

សូមប្រិយមិត្តអ្នកអានជួយផ្តល់ជាមតិយោបល់ដល់ខ្ញុំផង។ អរគុណសម្រាប់ការ ចំណាយពេលអានរបស់អ្នកទាំងអស់គ្នា។ កន្និកា ស្រលាញ់អ្នកទាំងអស់គ្នា,,,

ប្រសិនបើមិត្តអ្នកអាន មានបទពិសោធន៍ ជីវិត ឬរឿងរ៉ាវស្នេហ៍ ចង់ចែករំលែក និងស្វែងរកមតិយោបល់ សូមផ្ញើអត្ថបទរឿងពិតរបស់អ្នកមកកាន់ meysoklim@cidc.com.kh។ Sabay នឹងចុះផ្សាយជូន៕

ពាក្យទាក់ទង

វិបត្តិស្នេហ៍

អត្ថបទពេញនិយម

Iced Latte with Noodle កាហ្វេ លាយមីឆា មីនុយភេសជ្ជៈថ្មី ល្បីនៅឥណ្ឌូនេស៊ី

តួអង្គ Spider-Man លោក Tom Holland និង គូស្នេហ៍ ចាប់ដៃគ្នាសម្តែងក្នុងខ្សែភាពយន្តខ្នាតធំ

ការសាកថ្មទូរស័ព្ទតាមរយៈមុខងារ Bypass ជួយឱ្យសុខភាពថ្ម នៅល្អ ប្រើប្រាស់បានយូរអង្វែងជាងមុន

Pep ការពារ Haaland ក្រោយ១២ប្រកួតចុងក្រោយរកបាន៣គ្រាប់ក្នុងនាមខ្សែប្រយុទ្ធប្រអប់

ជំនឿផ្សេងៗទាក់ទងរឿងញាក់ត្របកភ្នែកតាមម៉ោង

ដឹងទេ តើភាពយន្តខ្មែរណាដែលឈរឈ្មោះដណ្ដើមពានអូស្ការដំបូងគេក្នុងប្រវត្តិសាស្ត្រ?

អត្ថបទថ្មី

នាយករដ្ឋមន្រ្តីកម្ពុជា ជម្រុញបង្កើត Data Centre ដើម្បីរក្សាទុកស្នាដៃស្រាវជ្រាវ របស់ សិស្សនិស្សិត

តំណាងអគ្គនាយកដ្ឋានកីឡា៖ កីឡាករ កីឡាការិនីវូស៊ូទាំងអស់ទោះបញ្ចប់ការប្រកួតថ្នាក់ជាតិហើយក្ដី ត្រូវបន្តខំប្រឹងហ្វឹកហាត់ត្រៀមស៊ីហ្គេមនៅថៃទៀត

យប់មួយនៅ ហុងកុង ៖ មកស្គាល់ Bar ល្បីៗ ទាំង ៥ ផ្តល់នូវបរិយាកាស ពេលរាត្រីដែលមិនអាចបំភ្លេចបាន

Salah កំពុងតែវិលទៅរកកំណត់ត្រាឆ្នាំ២០២២ ដែលខ្លួនធ្លាប់ធ្វើបានជាមួយ Liverpool

ដើរឲ្យគេ Crush ពេញពិភពលោក ចុះនារីក្នុងចិត្តសមាជិក BTS ជាមនុស្សប្រភេទណាខ្លះវិញ?