​យប់​​នេះ​​ នឹង​មាន​​ការ​ប្រកួត​មិត្ត​ភាព​រវាង​ក្រុម​យក្ស​២​គូ​ គឺ​ ​​ប្រេស៊ីល​ប៉ះ​អាហ្សង់ទីន​ នៅ​ទី​ក្រុង​ប៉េកាំង​ប្រទេស​ចិន ​ម៉ោង៧:០៥នាទី​ ​និង​បារាំង​បើក​ទ្វា​ផ្ទះ​ស្វាគមន៍​ព័រទុយហ្គាល់​ ​ម៉ោង​១:៤៥​រំលង​អាធ្រាត្រ។

ជើង​កីឡាករ​ និង​ប្រវត្តិ​ជួប​គ្នា

ប្រេស៊ីល​ vs ​អាហ្សង់ទីន

ក្រុម​ទាំង​ពីរ​នេះ​ពេញ​ជើង​ល្អ​ណាស់​ក្នុង​ប្រកួត​មិត្តភាព​ដណ្ដើម​ពាន​រង្វាន់​ Superclascico de las Americas ​យប់​នេះ​ ហើយ​អ្វី​ដែល​ប្រិយមិត្ត​នឹង​ប្លែក​ភ្នែក​ក្នុង​ការ​ប្រកួត​នេះ​ គឺ​ប្រុស​ស្អាត​ Kaka ​នឹង​បង្ហាញ​ខ្លួន​ឱ្យ​ជម្រើស​ជាតិ​ប្រេស៊ីល​​វិញ​ហើយ​។

ជម្រើស​១១​នាក់​របស់​ប្រេស៊ីល​យប់​នេះ​អាច​ជា Cesar, Dodo, Dante, Alves, Luiz, Gustavo, Souza, Hulk, Kaka, Fred ​និង​ខ្សែ​ប្រយុទ្ធ​មិន​អាច​ខ្វះ​បាន​ Neymar ។ រីឯ​ខាង​អាហ្សង់ទីន​វិញ​អាច​មាន​ដូច​ជា​​ Romero, Garay, Demichelis, Fernandez, Zabaleta, Pastore, Mascherano, Messi, Di Maria, Higuain ​និង​ Aguero ។

កីឡាករ​ក្រុម​ប្រេស៊ីល (រូប​លើ) និង​អាហ្សង់ទីន ហ្វឹកហាត់​ត្រៀម​ប្រកួត

ក្រុម​មក​ពី​អាមេរិកឡាទីន​ទាំង​ពីរ​នេះ​គិត​ចាប់​ពី​ឆ្នាំ​២០០០​មក ​ធ្លាប់​ជួប​គ្នា​មិន​តិច​ជាង​១៥​ដង​ទេ ហើយ​៣​ប្រកួត​ចុង​ក្រោយ​របស់​ពួកគេ ​គឺ​អាហ្សង់ទីន​ឈ្នះ​២ ​ប្រេស៊ីល​ឈ្នះ​១។

អ្វី​ដែល​គួរ​ឱ្យ​កត់​សម្គាល់​ក្នុង​ការ​ប្រកួត​យប់​នេះ​ គឺ​នៅ​ក្នុង​ទីក្រុង​ប៉េកាំង​​ ​កំពុង​តែ​ចុះ​អ័ព្ទ​ជា​ខ្លាំង​សឹង​តែ​មើល​មុខ​គ្នា​លេង​ឃើញ​តាំង​ពី​ថ្ងៃ​ព្រហស្បតិ៍​មក​ម៉្លេះ​ ដែល​ធ្វើ​ឱ្យ​ពិបាក​សម្រាប់​ក្រុម​ទាំង​ពីរ​ក្នុង​ការ​ហ្វឹកហាត់​ជា​ខ្លាំង។ មិន​តែ​ប៉ុណ្ណោះ​ការ​ចុះ​អ័ព្ទ​​នេះ​ត្រូវ​បាន​គេ​រាយការណ៍​ថា​នឹង​ចុះ​ដល់​ថ្ងៃ​សៅរ៍​នេះ​ទៀត​ផង។

បារាំង​ Vs ​ព័រទុយហ្គាល់

មិន​ខុស​អី​ពី​គូ​ខាង​លើ​នោះ​ទេ ​ក្រុម​នៅ​អឺរ៉ុប​ទាំង​ពីរ​នេះ​ក៏​ពេញ​ជើង​ល្អ​ដែរ​យប់​នេះ​ ពោល​គឺ​ Cristiano Ronaldo ​របស់​ព័រទុយហ្គាល់​និង​ Karim Benzema ​របស់​បារាំង​អាច​ចូល​លេង​បាន​ដូច​គ្នា។

Ronaldo និង​មិត្ត​រួម​ក្រុម Tiago ហ្វឹកហាត់​ត្រៀម​ប៉ះ​បារាំង

ខ្សែ​ប្រយុទ្ធ​បារាំង Karim Benzema ក្នុង​ពេល​ហ្វឹកហាត់

ជម្រើស​១១​នាក់​របស់​បារាំង​អាច​ជា​ Lloris, Sagna, Varane, Mathieu, Digne, Sissoko, Pogba, Cabaye, Schneiderlin, Cabella ​និង​ Benzema ។ ចំណែក​ឯ​ខាង​ព័រទុយហ្គាល់​វិញ​១១​នាក់​របស់​គេ​មាន​ Rui Patricio, Pereira, Pepe, Costa, Coentrao, Moutinho, Carvalho, Gomes, Ronaldo, Eder ​និង​ Nani ។

​ប្រវត្តិ​ជួប​គ្នា​របស់​ក្រុម​ទាំង​ពីរ​គឺ​ ព័រទុយហ្គាល់​ប៉ះ​បារាំង​៥​ប្រកួត​ចុង​ក្រោយ​នេះ​មិន​ដែល​ស្គាល់​ជាតិ​ឈ្នះ​ម្ដង​ណា​ទេ។

ព្យាករណ៍​សម្រាប់​២​គូ​នេះ​គឺ ប្រេស៊ីល​ ១-៣​ អាហ្សង់ទីន ​និង​ បារាំង​ ២-១​ ព័រទុយហ្គាល់ ។

ចុច​ប្រិយមិត្ត​វិញ ទស្សន៍ទាយ​លទ្ធផល​២គូ​នេះ​យ៉ាង​ណា​ដែរ?

ប្រែ​សម្រួល​៖ មុន្នី រម្យ

​ប្រភព​៖ sportsmole, bbc