ម៉ម លីសា បង្ហាញស្នាដៃសិល្បៈផ្អើលដល់ក្រុមហ៊ុនធំពីររបស់អាមេរិក

2015-06-08 22:37:12
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា ម៉ម លីសា(Lisa Mam) ដែលជាអ្នករចនាគំនូរលើជញ្ជាំងដ៏មានប្រជាប្រិយភាពមួយរូបក្នុងប្រទេសកម្ពុជាបានធ្វើឲ្យមនុស្សជាច្រើនកោតស្ញប់ស្ញែងចំពោះទេពកោសល្យរបស់នាង ដោយសារតែមានក្រុមហ៊ុនធំៗពីររបស់អាមេរិកជ្រើសយកស្នាដៃសិល្បៈនោះទៅច្នៃលើម៉ូដស្បែកជើង និងនាឡិកា។

លីសា (Lisa)បានរៀបរាប់ប្រាប់ Sabay ថា "ក្រុមហ៊ុនធំពីររបស់អាមេរិកនោះមានដូចជា Bucket Feet គឺជាក្រុមហ៊ុនផលិតស្បែកជើង និង Modify Watches ជាក្រុមហ៊ុនផលិតនាឡិកាកីឡា។ ចំណែកឯស្បែកជើងត្រូវបានចេញលក់នៅប្រទេសអូស្ត្រាលី និង ចិនហើយដោយមានដាក់ឈ្មោះខ្ញុំជាអ្នកឌីហ្សាញថែមទៀតផង"។

នារីពេញដោយទេពកោសល្យរូបនេះបានបន្តទៀតថា "តាមពិតខ្ញុំចូលចិត្តគូររូបផ្សេងៗតាំងពីនៅតូចៗម្ល៉េះ ប៉ុន្តែទើបប្រហែលជាប្រាំឆ្នាំចុងក្រោយនេះទេ ខ្ញុំបានចាប់ផ្ដើមគូរគួបផ្សំជាមួយការស្រមើស្រមៃដោយមិនបានចូលរៀនសោះ ហើយក៏បានចាប់ជាការងារក្រៅម៉ោងតែម្ដង"។

"ចំពោះស្នាដៃរបស់បងវិញភាគច្រើននៅក្រៅប្រទេសគេទទួលស្គាល់ ជាពិសេសគឺប្រទេសថៃតែម្ដង ព្រោះបានទៅគូររូបនៅហាងធំៗទីនោះច្រើនណាស់។ ចំណែកឯថ្មីៗនេះបងទើបជាប់ក្នុងចំណោមអ្នកសិល្បៈ ២២ នាក់ សម្រាប់ឌីហ្សាញក្លិបឲ្យក្រុមហ៊ុន LV នៅប្រទេសថៃ តែនេះគ្រាន់តែជាផ្នែកតូចមួយរបស់ក្រុមហ៊ុននេះតែប៉ុណ្ណោះ"។

អ្វីដែលរឹតតែពិសេសនៅក្នុងស្នាដៃរបស់ទន្តបណ្ឌិតរូបនោះដែលបញ្ចេញឲ្យបរទេសស្ញប់ស្ញែង គឺគំនូរទាំងនោះភាគច្រើនបានបញ្ចូលនូវក្បាច់បុរាណខ្មែរដូចជា ក្បាច់ត្របកឈូក វល្លិ៍ និងក្បាច់ភ្ញីភ្លើងជាដើមតែច្នៃចេញជារូបរាងផ្សេងៗ។

ម៉ម លីសា (Lisa Mam) មិនត្រឹមតែជាអ្នករចនាគំនូរលើជញ្ជាំងប៉ុណ្ណោះទេ ថែមទាំងជាទន្តបណ្ឌិតធ្វើការនៅមន្ទីរពេទ្យអង្គឌួង និងមន្ទីរពេទ្យមិត្តភាពខ្មែរ សូវៀតថែមទៀតផង។

ពេទ្យធ្មេញស្រីរូបនោះក៏ធ្លាប់បានឈ្នះពាន Project Indochina ទៀតនៅវៀតណាមដែលមានការចូលរួមប្រកួតច្រើនប្រទេស និងបេក្ខជន១១០ នាក់ប្រកួតប្រជែងគ្នា ហើយធ្លាប់បានចេញទៅធ្វើការនៅបរទេសដូចជា បារាំង ថៃ និងវៀតណាមជាដើម៕