សាកលវិទ្យាល័យល្បីៗនៅអាមេរិកខាងបណ្ដុះបណ្ដាលជំនាញផលិតរថយន្ត

2015-06-10 13:01:17
ចំនួនមតិ 0 | ចំនួនចែករំលែក 0

ចន្លោះមិនឃើញ

មុខជំនាញវិស្វកម្មរថយន្តគឺពិបាកទាំងការរៀន និងការរកសាលាបណ្ដុះបណ្ដាលបច្ចេកទេសបែបនេះ។ សម្រាប់អ្នកដែលមានបំណងសិក្សាជំនាញនេះគឺមិនស្រួលទេប្រសិនបើវាគ្មាននៅក្នុងប្រទេសរបស់ពួកគេ ដោយសារតែជំនាញនេះភាគច្រើនមានតែនៅក្នុងបណ្ដាប្រទេសអភិវឌ្ឍន៍។ ខាងក្រោមនេះគឺសាលាល្បីៗនៅក្នុងសហរដ្ឋអាមេរិក ដែលផ្ដល់ជំនាញសិក្សាខាងផ្នែកវិស្វកម្មរថយន្ត៖

១. University of Michigan

មានទីតាំងនៅក្នុងទីក្រុង Ann Arbor, រដ្ឋ Michigan សហរដ្ឋអាមេរិក។ សាកលវិទ្យាល័យមួយនេះមានជំនាញសិក្សាច្បាស់លាស់ ហើយធ្លាប់បណ្ដុះបណ្ដាលបានវិស្វករផ្នែករថយន្តល្បីៗជាច្រើនផងដែរ។ អតីតនិស្សិតនៃសាកលវិទ្យាល័យមួយនេះភាគច្រើនគឺបានធ្វើការនៅក្នុងក្រុមហ៊ុនពាក់ព័ន្ធនឹងការផលិតរថយន្ត។

២. Indiana University-Purdue University Indianapolis (IUPUI) Purdue

IUPUI មានទីតាំងនៅក្នុងទីក្រុង Indianapolis រដ្ឋ Indiana សហរដ្ឋអាមេរិក។ IUPUI គឺជាសាកលវិទ្យាល័យមួយដែលមានប្រវត្តិផលិតចេញនូវវិស្វករកំពូលៗសម្រាប់ក្រុមហ៊ុន Detroit និងអ្នកផ្គត់ផ្គង់គ្រឿងរថយន្តផ្សេងទៀត។

៣.Cornell University

Cornell University មានទីតាំងនៅក្នុងទីក្រុង Ithaca រដ្ឋ New York សហរដ្ឋអាមេរិក។ Corenell University ផ្ដល់មុខជំនាញវិស្វកម្មរថយន្តជាច្រើនប្រភេទ។ ក្រៅពីនេះ ក្រុមនិស្សិតរបស់ Cornell ធ្លាប់បានទទួលជើងឯកដល់ទៅប្រាំបីដងនៃការប្រកួត Formula Society of Automotive Engineers (FSAE) ។

៤.Kettering University

គឺជាសាកលវិទ្យាល័យតូចមួយដែលមានសិស្សប្រហែលជា ៣ពាន់នាក់តែប៉ុណ្ណោះ ដែលមានទីតាំងនៅក្នុង Flint, រដ្ឋ Michigan។ មុខជំនាញវិស្វកម្មរថយន្តគឺមានសម្រាប់តែសញ្ញាប័ត្រអនុបណ្ឌិតតែប៉ុណ្ណោះ ហើយនិស្សិតអាចចុះឈ្មោះចូលរៀនបានលើជំនាញ Engine Design, Vehicle Performance និង Transmission Design ក៏ដូចជា Chassis Design។

៥. University of Texas at Austin

ស្ថិតក្នុងចំណាត់ថ្នាក់កំពូលខាងការអប់រំជំនាញវិស្វកម្មរថយន្ត University of Texas at Austin បានផ្ដល់ឱកាសសម្រាប់សិស្សានុសិស្សនូវបទពិសោធន៍ពិតប្រាកដ ទាំងការអនុវត្តផ្ទាល់និងទ្រឹស្ដី។ សព្វថ្ងៃនេះសាកលវិទ្យាល័យនេះមានសិស្សច្រើនជាង ៥ ម៉ឺននាក់។

៦. Virginia Polytechnic Institute and State University

Virginia Polytechnic Institute and State University ត្រូវបានគេស្គាល់ថាជាសាកលវិទ្យាល័យ Virginia Tech ដែលមានទីតាំងនៅក្នុងទីក្រុង Blacksburg រដ្ឋ Virginia សហរដ្ឋអាមេរិក។ Virginia Tech ជាទូទៅតែងតែបង្កើតក្រុមប្រកួតប្រជែង FSAE ហើយក្រុមរបស់ពួកគេក៏ធ្លាប់បានជាប់លេខបីកាលពីការប្រកួត 2007 DARPA ផងដែរ។

៧ . University of California, Davis

សាកលវិទ្យាល័យ California, Davis គឺជាសាកលវិទ្យាល័យស្រាវជ្រាវសាធារណៈមួយដែលមានទីតាំងនៅ Davis, California និងត្រូវបានបង្កើតឡើងនៅក្នុងឆ្នាំ ១៩០៥។ កម្រិតគុណភាពដែលសាកលវិទ្យាល័យមួយនេះត្រូវបានចាត់ថ្នាក់ គឺល្អ។ អ្នកជំនាញបាននិយាយថា និស្សិតនៅ Cal Davis គឺត្រូវបានបង្រៀនដោយផ្ដល់ជូននូវបទពិសោធន៍ជាក់ស្ដែងក្នុងការអនុវត្ត។ មិនត្រឹមតែប៉ុណ្ណោះសាកលវិទ្យាល័យមួយនេះគឺជាប់ចំណាត់ថ្នាក់លេខ៨ក្នុងចំណោមសាកលវិទ្យាល័យកំពូលផ្សេងទៀត។

៨. Clemson University

សាកលវិទ្យាល័យ Clemson គឺមានទីតាំងនៅក្នុងទីក្រង Clemson រដ្ឋSouth Carolina សហរដ្ឋអាមេរិក ហើយសាកលវិទ្យាល័យមួយនេះត្រូវបានបង្កើតឡើងនៅក្នុងឆ្នាំ១៨៨៩។ ចំពោះមហាវិទ្យាល័យវិស្វកម្មនៅក្នុងវិទ្យាល័យនេះគឺត្រូវបានរៀបចំឡើងដោយផ្ទាល់នៅក្នុង Clemson University តែម្ដង ហើយមុខជំនាញនេះគឺសង្កត់ធ្ងន់ទៅលើគ្រឿងរថយន្តដោយមានសភាពខុសពីសាកលវិទ្យាល័យផ្សេងទៀត។

៩. Georgia Institute of Technology 

Georgia Institute of Technology គឺជាសាកលវិទ្យាល័យស្រាវជ្រាវសាធារណៈមួយដែលមានទីតាំងនៅក្នុងទីក្រុង Atlanta រដ្ឋ Georgia សហរដ្ឋអាមេរិក។ Georgia Tech ក៏ធ្លាប់មានកេរ្តិ៍ឈ្មោះខាងជំនាញសិក្សាខាងផលិតរថយន្តផងដែរ ហើយក៏មានភាពល្បីល្បាញខាងឌីស្សាញទៀតផង។

១០. California Polytechnic State University, San Luis Obispo និង, Pomona

Cal Poly San Luis Obispo និង Cal Poly Pomona គឺសាកលវិទ្យាល័យដែលមានកម្មវិធីសិក្សាល្អ និងស័ក្ដសមមួយទៀតដែរសម្រាប់អ្នកដែលចង់មានជំនាញច្បាស់លាស់ខាងវិស្វកម្មរថយន្ត។ មិនត្រឹមតែប៉ុណ្ណោះ មហាវិទ្យាល័យវិស្វកម្មរបស់សាកលវិទ្យាល័យនេះធ្លាប់បានបង្កើតក្រុមនិស្សិតដែលទទួលជ័យជំនះក្នុងការប្រកួតប្រជែង Supermileage ថែមទៀតផង៕

អានបន្ត៖ ប្រទេសមហាអំណាចកំពុងតេស្ដបច្ចេកវិទ្យា ឡានរលត់ឯងបើអ្នកបើកបរស្រវឹង

ប្រែសម្រួល៖ សំនៀង ប្រភព៖ edmunds