រោងភាពយន្ត Platinum Cineplex បរិច្ចាគថវិកាជួយប្រជាជននេប៉ាល់

2015-06-18 00:08:15
ចំនួនមតិ 0 | ចំនួនចែករំលែក 0

ចន្លោះមិនឃើញ

នារសៀលនេះ រោងភាពយន្ត Platinum Cineplex បានប្រគល់ថវិកាប្រមាណជាង ១ ៧០០ ដុល្លារអាមេរិក ដល់អង្គការ Action Aid ដើម្បីជួយដល់ប្រជាជន នេប៉ាល់ ដែលទទួលរងគ្រោះដោយសារ រញ្ជួយដី កាលពីថ្ងៃទី ២៥ ខែមេសា ២០១៥ កន្លងទៅ។

លោក សៅ សុខនី អ្នកចាត់ការទូទៅរោងភាពយន្តខាងលើបានបញ្ជាក់ថា ថវិកាទាំងអស់បានពីការលក់សំបុត្រកុនចាប់ពីថ្ងៃទី ១២ ដល់ថ្ងៃទី ១៧ ខែ ឧសភា ២០១៥ ដោយកាត់ ០.២៥ ដុល្លារក្នុងសំបុត្រ១សន្លឹក ដើម្បីដាក់ចូលក្នុងមូលនិធិ។ លោកបន្តថា ជនរងគ្រោះរាប់ពាន់នាក់កំពុងត្រូវការជំនួយជាចាំបាច់ ដើម្បីសង្គ្រោះជីវិត ក្រោយពេលគ្រោះថ្នាក់រញ្ជួយដី២លើកជាប់គ្នា។

លោកបញ្ជាក់ថា៖ “កិច្ចការមនុស្សធម៌កន្លងមក យើងធ្វើតែក្នុងស្រុក។ ប៉ុន្តែពេលនេះ យើងធ្វើឆ្លងប្រទេសវិញម្ដង ដោយគិតថា នៅថ្ងៃណាមួយប្រទេសយើងជួបបញ្ហា គេជួយយើងម្ដង"។

អ្នកចាត់ការទូទៅរូបនេះបន្តថា លោកចង់ចែករំលែកទុក្ខលំបាក និងក្ដីអាណិតអាសូរ ដល់ប្រជាជន នេប៉ាល់ ដែលកំពុងតែត្រូវជំនួយសង្គ្រោះជាចាំបាច់។ កន្លងមករោងភាពយន្ត Platinum Cineplex បានចូលរួមនៅក្នុងសកម្មភាពសប្បុរសធម៌ និង សង្គមជាច្រើន ចាប់តាំងពីដំណើរការដំបូងរហូតមកដល់ពេលនេះ។

ប្រភពដដែលអះអាងថា លោកចង់ចូលរួមទទួលខុសត្រូវសង្គម ពិសេសក្នុងការអភិវឌ្ឍន៍វិស័យអប់រំ និង វិស័យសុខាភិបាល។ ក្នុងនោះបាននាំយកនូវថវិកាទទួលបានពីការលក់សំបុត្រ ទៅបរិច្ចាគដល់មណ្ឌលកុមារកំព្រាក្នុងខេត្តកំពង់ស្ពឺ និង សង់បណ្ណាល័យនៅខេត្តកណ្ដាល និង ចូលរួមសកម្មភាពជាច្រើនទៀត។ ដោយឡែកសម្រាប់គម្រោងផ្ដល់អាហារូបករណ៍ដល់និស្សិត ក៏កំពុងធ្វើការពិចារណា៕

អានអត្ថបទ៖ សាឡាត់ ស្រីឡាង ថាចូលសិល្បៈព្រោះស្មានតែងាយស្រួល

អានអត្ថបទ៖ មាស សុខសោភា ជិះឃើញភ្លាម ចុះចូលចែកអំណោយភ្លែត