អត្ថប្រយោជន៍ផ្កាសាគូរ៉ានៅជប៉ុនចំពោះសម្រស់

2015-06-27 15:00:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្កាម្យ៉ាងដែលប្រជាជនជប៉ុនហៅឈ្មោះថាសាគូរ៉ា(Sakura) និងមានពាក្យជាភាសាអង់គ្លេស Cherry Blossom ត្រូវប្រជាជនជប៉ុនចាត់ទុកជារុក្ខជាតិមានគុណប្រយោជន៍រាប់មិនអស់។ មិនត្រឹមតែលម្អទេសភាពឲ្យកាន់តែស្រស់ត្រកាល ផ្កាសាគូរ៉ាបានក្លាយជារុក្ខជាតិថែរក្សាសម្រស់នារីជាច្រើន រហូតដល់ក្រុមហ៊ុនមួយចំនួនច្នៃចេញជាផលិតផល ហើយឃើញពីប្រសិទ្ធភាពពិតៗ។

ផ្កាសាគូរ៉ា សម្បូរទៅដោយសារជាតិប្រឆាំងអុកស៊ីតកម្ម ព្រមទាំងជំនួយដល់ស្បែក និងសម្អាតជាតិកខ្វក់ទាំងឡាយនៅលើខ្លូន។ ជាងនេះទៅទៀត ផ្កាសាគូរ៉ាមានជាតិអាស៊ីដដ៏សំខាន់ម្យ៉ាងដែលអាចជួយជួសជុលកោសិកាខូចពីធម្មជាតិ និងនាំឲ្យស្បែកកាន់តែភ្លឺរលោង។

ផ្កាសាគូរ៉ា រឹតតែស័ក្ដិសមសម្រាប់មនុស្សវ័យចំណាស់ ព្រោះរុក្ខជាតិមួយប្រភេទនេះមានមុខងារប្រឆាំងនឹងភាពជ្រីវជ្រួញ ព្រមទាំងធ្វើឲ្យស្បែកស។ ផ្កាសាគូរ៉ា ក៏មានសារជាតិប្រឆាំងនឹងការរលាក និងជួយឲ្យស្បែកដែលស្រអាប់ដោយកម្ដៅថ្ងៃមានភាពស្រស់ថ្លាឡើងវិញ។ លើសពីនេះ វាអាចជួយសម្អាតជាតិពុលលើស្បែក បន្សល់ទុកមកវិញនូវស្បែកភ្លឺស្អាត មានសុខភាពល្អ។

ផ្កាសាគូរ៉ា ត្រូវគេចាត់ទុកជានិមិត្តរូបនៃសម្រស់របស់ជនជាតិជប៉ុន ដូចគ្នាទៅនឹងផ្កាកុលាបដែលជាតំណាងនៃសម្រស់នារីលោកខាងលិចដែរ។ ស្លឹកផ្កាសាគូរ៉ា ត្រូវបានប្រជាជនជប៉ុនប្រើប្រាស់ជា រុក្ខជាតិត្រាំខ្លួនពេលងូតទឹក ជាតែសម្រាប់ផឹកបង្កើនសុខភាព និងច្នៃជាផលិតផលកក់សក់ជម្រុះអង្គែ រួមទាំងគុណប្រយោជន៍ជាច្រើនទៀត។

ផ្កាសាគូរ៉ា មានដើមកំណើតដំបូងនៅជួរភ្នំហិមាល័យ ហើយបច្ចុប្បន្ននេះវាកំពុងដុះដាលនៅតាមបណ្ដាលប្រទេសដែលមានអាកាសធាតុអំណោយផល មិនក្ដៅពេក មិនត្រជាក់ពេក។ ប្រទេសទាំងនោះមានទាំងនៅតំបន់អឺរ៉ុប ស៊ីបេរីខាងលិច ចិន ឧបទ្វីបកូរ៉េ កាណាដា សហរដ្ឋអាមេរិក និងប្រទេសជប៉ុនដែលហៅឈ្មោះថាផ្កាសាគូរ៉ានេះតែម្ដង៕