កាហ្វេពេញនិយមខ្លាំង តើដឹងថាមានដើមកំណើតពីណាឬអត់?

2015-07-01 22:06:04
ចំនួនមតិ 0 | ចំនួនចែករំលែក 0

ចន្លោះមិនឃើញ

គេយកកាហ្វេទៅធ្វើជាភេសជ្ជៈ ដែលមនុស្សជាច្រើនទូទាំងពិភពលោកនិយមចូលចិត្ត ដោយសារក្លិនឈ្ងុយ និងរសជាតិឆ្ងាញ់របស់វា។ មនុស្សទាំងចាស់ទាំងក្មេងទទួលទានកាហ្វេដើម្បីកំដរការជជែកលេងកម្សាន្ត ឬបំបាត់ភាពងងុយគេង និងបង្កើនស្មារតីផងដែរ។ យ៉ាងណាមិញ ប្រិយមិត្តមួយចំនួនប្រហែលមិនទាន់ដឹងទេថាវាមានប្រភពពីណា និងមានប្រវត្តិបែបណា?

ដើមកាហ្វេ

កាហ្វេមានប្រភពមកពីប្រទេសអេត្យូពី តំបន់អាហ្រ្វិក

យោងតាមឯកសារជាច្រើនបានឲ្យដឹងថាកាហ្វេត្រូវបានគេរកឃើញនៅដើមសតវត្សទី៩ មានប្រភពដើមមកពីតំបន់ខ្ពង់រាបនៃប្រទេសអេត្យូពី ដែលស្ថិតក្នុងទ្វីបអាហ្វ្រិកភាគខាងកើត។ ដោយឡែកបើតាមរឿងព្រេងរបស់ជនជាតិអេត្យូពី គឺដំណាលពី បុរសគង្វាលពពែម្នាក់ឈ្មោះ Kaldi ដែលបានកត់សម្គាល់ឃើញថា ពពែរបស់គាត់មានសភាពចម្លែក ដោយពុំព្រមដេក និងងើបឈររេរាំ ក្រោយពីពពែទាំងនោះបានស៊ីគ្រាប់រុក្ខជាតិម្យ៉ាង។ បន្ទាប់មក Kaldi បានយករុក្ខជាតិទាំងនោះ ទៅផ្ញើអ្នកនៅវិហារ រួចពេលនោះទើបគេដឹងថាគ្រាប់រុក្ខជាតិ (កាហ្វេ) ដែលអាចជួយឲ្យពួកគេមានកម្លាំង ហើយអាចនៅបួងសួងក្នុងវិហារបានយូរ ក្រោយពីបានញ៉ាំវា។

កាហ្វេមកដល់ឧបទ្វីបអារ៉ាប់

មកដល់សតវត្សទី១៥កាហ្វេត្រូវបាននាំយកទៅដាំ និងជួញដូរនៅក្នុងឧបទ្វីបអារ៉ាប់ នៅក្នុងប្រទេសយេមែន និងក្រោយមកដល់សតវត្សទី១៦ ត្រូវបាននាំយកមកក្នុងចក្រភព Persia ប្រទេសអេហ្ស៊ីប សីរ៉ី ទួរគី និងអាហ្វ្រិកភាគខាងជើង។ នៅក្នុងឧបទ្វីបអារ៉ាប់នេះហើយដែលគ្រាប់កាហ្វេត្រូវបានគេយកមកដុត និងឆុងមកធ្វើជាភេសជ្ជៈ។

កាហ្វេទៅដល់ទ្វីបអឺរ៉ុប

ត្រឹមសតវត្សទី១៧ អ្នកដំណើរជនជាតិអឺរ៉ុបនៅប៉ែកខាងកើត បាននាំយកកាហ្វេមកកាន់ទ្វីបអឺរ៉ុប។មានមនុស្សមួយចំនួនមិនពេញចិត្តនឹងភេសជ្ជៈល្វីងមួយនេះ។ តែក្រោយមកភេសជ្ជៈកាហ្វេបានពេញនិយមទូទាំងបណ្ដាប្រទេសអឺរ៉ុប បន្ទាប់ពីសម្ដេចប៉ាបទីប្រាំបី (សម្ដេចសង្ឃកាតូលិក) បានភ្លក់និងបញ្ជាក់ថាភេសជ្ជៈនេះអាចទទួលយកបាន។ ក្រោយមកកាហ្វេត្រូវបានប្រជាជនអឺរ៉ុបគាំទ្រ និងពេញនិយមនៅតាមទីក្រុងប្រទេសមួយចំនួនដូចជានៅអង់គ្លេស អូទ្រីស បារាំង អាល្លឺម៉ង់ និងហុល្លង់ជាដើម។ នៅពាក់កណ្ដាលសតវត្សទី១៧ តៀមកាហ្វេ៣០០កន្លែងបានរីកព្រោងព្រាតក្នុងទីក្រុងឡុងដុង។

កាហ្វេទៅដល់ទ្វីបអាមេរិក

មកដល់ពាក់កណ្ដាលទសវត្សឆ្នាំ១៦០០ ចក្រភពអង់គ្លេសបាននាំយកកាហ្វេមកដល់ទ្វីបអាមេរិក។ ប៉ុន្តែរហូតដល់ឆ្នាំ១៧៧៣ ទើបវាចាប់ផ្ដើមពេញនិយមខ្លាំង នៅក្រោយពីស្ដេច George នៃចក្រភពអង់គ្លេសដែលដាក់លើអាមេរិកចាប់ផ្ដើមដំឡើងពន្ធតែ ដែលធ្វើឲ្យមានតម្លៃខ្ពស់ ដែលធ្វើឲ្យមនុស្សងាកមកញ៉ាំកាហ្វេជំនួសតែ។

ដំណាំកាហ្វេមានពាសពេញពិភពលោក

នៅពាក់កណ្ដាលសតវត្សទី១៧ កាហ្វេបានពេញនិយមខ្លាំងឡើងនៅតាមបណ្ដាប្រទេសជាច្រើន។ ពេលនោះប្រទេសមួយចំនួនក្នុងទ្វីបអឺរ៉ុបដែលបានមកគ្រប់គ្រងប្រទេសក្នុងតំបន់អាស៊ីតួយ៉ាងប្រទេសហុល្លង់បាននាំយកកាហ្វេមកដាំលើកោះជ្វា (សព្វថ្ងៃប្រទេសឥណ្ឌូណេស៊ី) បានយ៉ាងជោគជ័យ និងបន្តដាំនៅកោះមួយចំនួនទៀតក្នុងកោះសូម៉ាត្រា និងកោះCelebes ប្រទេសឥណ្ឌូណេស៊ីសព្វថ្ងៃ។ រីឯប្រទេសមួយចំនួនទៀតបានចាប់ផ្ដើមដាំដំណាំកាហ្វេច្រើនឡើងៗ។ រហូតមកដល់ចុងសតវត្សទី១៨ កាហ្វេបានក្លាយជាដំណាំនាំចេញដែលទទួលបានចំណេញច្រើន និងទទួលបានការពេញនិយមជាខ្លាំងដល់ពេលបច្ចុប្បន្ន៕