រកឃើញករណីជំងឺផ្លូវដង្ហើមទីពីរក្នុងប្រទេសហ្វីលីពីន

2015-07-06 21:28:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ករណីទីពីរនៃជំងឺផ្លូវដង្ហើមមជ្ឈិមបូព៌ា MERS ត្រូវបានរាយការណ៍ថារកឃើញក្នុងប្រទេសហ្វីលីពីននៅថ្ងៃចន្ទនេះ បន្ទាប់ពីជនបរទេសវ័យ ៣៦ឆ្នាំម្នាក់ ធ្វើដំណើរមកពីទីក្រុងឌូបៃ ប្រទេសអារ៉ាប់រួម។

ជនបរទេសដែលមានជំងឺជាប់ខ្លួន បានធ្វើដំណើរមកពីទីក្រុងឌូបៃ ប្រទេសអារ៉ាប់រួម ចូលដល់រដ្ឋធានីម៉ានីល ប្រទេសហ្វីលីពីន កាលពីថ្ងៃទី១៩ ខែឧសភាកន្លងទៅ។ រោគសញ្ញាបានកើតឡើងលើជនរងគ្រោះ រហូតធ្វើតេស្តបង្ហាញលទ្ធផលវិជ្ជមាន និងបញ្ជាក់ជាផ្លូវការណ៍នៅថ្ងៃចន្ទនេះ។

អ្នកនាំពាក្យក្រសួងសុខាភិបាលរបស់ប្រទេសហ្វីលីពីន លោក Lyndon Lee-suy បានបញ្ជាក់ថា ជនបរទេសដែលមានជំងឺ MERS ជាប់ខ្លួន ត្រូវបញ្ជូនចូលមន្ទីរពេទ្យរដ្ឋកាលពីថ្ងៃទី០៤ ខែកក្កដា និងដាក់ឲ្យស្ថិតក្រោមការឃ្លាំមើលយ៉ាងប្រុងប្រយ័ត្ន ដើម្បីទប់ស្កាត់ការរីករាលដាល។

អ្នកនាំពាក្យក៏បានបញ្ជាក់ផងដែរថា អ្នកជំងឺធ្លាប់ធ្វើដំណើរទៅប្រទេសអារ៉ាប៊ីសាអ៊ូឌីត ដែលជាតំបន់ធ្លាប់រងគ្រោះខ្លាំងក្លាជាងគេ។ ទោះយ៉ាងណា សុខភាពរបស់អ្នកជំងឺ កំពុងវិលទៅរកស្ថានភាពល្អប្រសើរឡើងវិញ ប៉ុន្តែគេនៅមិនទាន់ដឹងថាមានអ្នកផ្សេងឆ្លងបន្តឬយ៉ាងណានោះទេ។

ករណីឆ្លងជំងឺ MERS ដំបូងបំផុតក្នុងប្រទេសហ្វីលីពីន បានកើតឡើងលើគិលានុបដ្ឋាយិកាម្នាក់ដែលធ្វើការនៅប្រទេសអារ៉ាប៊ីសាអ៊ូឌីតកាលពីខែមករា ប៉ុន្តែបានជាសះស្បើយឡើងវិញ។ ចំណែកកូរ៉េខាងត្បូង ដែលរងការវាយប្រហារដោយជំងឺផ្លូវដង្ហើម MERS ខ្លាំងបំផុតនៅអាស៊ី មានអ្នកស្លាប់ ៣៣នាក់ និងឆ្លង ១៨៦ករណី៕