កែវ ស្រីនាង មួយជីវិតទើបភ្លក់រសជាតិទឹកស្រះទឹកស្រែម្ដង

2015-07-13 17:43:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈប្រិយមិត្តធ្លាប់មុជទឹកស្រះ ទឹកស្រែ និងទឹកស្ទឹងរាប់ភ្លេចដងម្នាក់ៗ កែវ ស្រីនាង ដែលធំធាត់នៅរាជធានីឯណេះ បញ្ជាក់ប្រាប់ថាតាំងពីដឹងក្ដី រហូតធំពេញរូបពេញរាងនាងទើបប្រទះបទពិសោធន៍មុជទឹកស្រែម្ដងគត់ក្នុងជិវិតពិត។

បទពិសោធន៍ប្រឡាក់ខ្លួនជាមួយទឹកស្រែធម្មជាតិនេះ កើតឡើងក្រោយនាងបានចូលរួមសម្ដែងក្នុងរឿង "ក្រមុំសៅកែ" ក្នុងនាមជាតួឯកស្រីថ្មីៗនេះ។ ម្ចាស់ភូមិគ្រឹះតម្លៃជាងកន្លះលានដុល្លារនៅលើភ្នំទល់មុខកែបរូបនេះ ថ្លែងថា "និយាយទៅបើនិយាយជីវិតពិត នេះគឺលើកទី១សម្រាប់នាងខ្ញុំ មុជទឹកស្រែអីចឹង តែបើនិយាយពីការសម្ដែងក្នុងរឿងវិញ គឺច្រើនដងមកហើយ"។

ស្រីនាង ត្រូវសាច់រឿងតម្រូវឲ្យហក់ទឹកប្រឡាយពីលើស្ពានក្នុងឈុតមួយក្នុងរឿង "ក្រមុំសៅកែ" ដែលត្រៀមយកទៅបញ្ចាំងនៅខេត្តសៀមរាបចុងសប្ដាហ៍នេះ។ តារាស្រីដែលមានស្វាមីជាជនជាតិអង់គ្លេសរូបនេះ ប្រាប់ថា ត្រង់ឈុតនោះ អ្នកដឹកនាំរឿង ចង់ដាក់តួជំនួស តែនាងបដិសេធន៍។

“គាត់គិតថាខ្ញុំខ្លាច គាត់ចង់ដាក់តួជំនួស តែខ្ញុំប្រាប់ថា មិនអីទេឈុតខ្ញុំអាចសម្ដែងខ្លួនឯងបាន អត់ខ្លាចអីទេ"។ ស្រីនាង ប្រាប់ថា មូលហេតុដែលនាងមិនខ្លាចទី១នាងចេះហែលទឹកស្ទាត់ជំនាញ ក្នុងនោះនាងបានហាត់រៀនហែលទឹក និងចេះហែលស្ទាត់ក្នុងវ័យប្រមាណជា ១៨-១៩ឆ្នាំនេះប៉ុណ្ណោះ។ ទី២ទៀត ទឹកប្រឡាយនោះត្រូវក្រុមការងារថតបានសម្អាតអំបែងកែវ របស់ដែលអាចឲ្យគ្រោះថ្នាក់នានារួចហើយ។

“មិនត្រឹមប៉ុណ្ណឹង...ក្រុមការងារថតបានដាក់កម្លាំងត្រៀមជួយទៀត ព្រោះឈុតហ្នឹង គេតម្រូវឲ្យយើងហក់ចុះទៅហើយ ត្រូវសម្ងំនៅក្នុងទឹកហ្នឹងមួយសន្ទុះទៀត សម្រាប់អ្នកអត់ចេះហែលទឹក គាត់ប្រាកដជាអត់អាចទេ គឺពេលហក់ទៅភ្លាម គាត់ប្រហែលជាងើបមកភ្លាម តែខ្ញុំអាចសម្ងំបាន ហើយអត់មានបញ្ហាអីទេ"។ កែវ ស្រីនាង បន្ថែម។

ស្រីនាង ក៏ត្រៀមនឹងថតភាពយន្តមួយរឿងទៀតដែរឲ្យផលិតកម្មមហាហង្ស ព្រោះការចរចាត្រូវគ្នាលើចំណុចមួយចំនួនរួចហើយ ហើយ "ក្រមុំសៅកែ" គឺជារឿងទី១របស់នាងសម្រាប់ឆ្នាំនេះ។ តាមអ្នកដឹកនាំរឿង ភាពយន្តបែបកំប្លែងស្ងួតមួយនេះ ត្រៀមនឹងចាក់បញ្ចាំងជូនបងប្អូនទស្សនិកជននៅខេត្តសៀមរាបបានទស្សនានៅចុងសប្ដាហ៍នេះ បន្ទាប់ពីមានការស្នើសុំជាច្រើន៕

កែវ ស្រីនាង សង់វីឡាតម្លៃកន្លះលានដុល្លារនៅលើភ្នំជាប់ឆ្នេរសមុទ្រ

សម្រស់តារាខ្មែរ ថៃ ថ្ងៃសម្ពោធទូរទស្សន៍ PNN ពិតជាស្រស់ស្អាតមែន

អត្ថបទ៖ ទារិកា