អាចថតរូបបេះដូងកំពុងលោតមកមើលខាងក្រៅ ក្នុងកម្រិត 4D ដំបូងពុំធ្លាប់មាន

2015-07-15 16:43:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមអ្នកស្រាវជ្រាវមកពីក្រុមហ៊ុនថែទាំសុខភាព GE Healthcare របស់អង់គ្លេសបានបង្កើតកម្មវិធី Software មួយដែលអាចស្គែន និងបង្កើតជារូបភាពនៃសរីរាង្គខាងក្នុងរាងកាយរបស់មនុស្សបាន និងអាចបង្ហាញបានយ៉ាងច្បាស់ជាលក្ខណៈ 'Extreme 4D'។ កម្មវិធីនោះមានឈ្មោះថា cSound។

ថ្មីៗនេះ កម្មវិធីមួយនេះគឺកំពុងតែត្រូវបានប្រើប្រាស់ដោយវេជ្ជបណ្ឌិតផ្នែកជំងឺបេះដូង Bijoy Khandheria ដែលជាអ្នកមានឯកទេសព្យាបាលជំងឺបេះដូងអស់រយៈពេលជាងបីទសវត្សរ៍មកហើយ។

វេជ្ជបណ្ឌិត Khandheria ឲ្យដឹងថា រូបភាពដែលបង្កើតដោយកម្មវិធីនេះគឺមានភាពច្បាស់ ដូចកំពុងហែកទ្រូងរបស់មនុស្សមើលបេះដូងរបស់ពួកគេអញ្ចឹងដែរ។

លោកបន្ថែមទៀតថា ទម្លាប់ធម្មតាការប្រើអេកូដើម្បីឆ្លុះមើលគឺបានឃើញត្រឹមតែបេះដូងតែប៉ុណ្ណោះប៉ុន្តែវាមិនបានបង្ហាញពីភាពលម្អិតនោះទេ។ ចំពោះកម្មវិធីនេះវិញ គឺត្រូវបានធ្វើការជាមួយនឹងម៉ាស៊ីនអេកូដែលបញ្ជូនរលកសញ្ញាមានកម្រិតប្រេកង់ខ្ពស់ចូលទៅក្នុងរាងកាយមនុស្ស និងចាប់យករូបរាងនៃសរីរាង្គខាងក្នុងនិងផ្ដិតយករូបភាពនៃស្រទាប់បេះដូង។ បន្ទាប់មកដាក់ផ្គុំគ្នានូវស្រទាប់បេះដូងទាំងនោះដើម្បីផលិតទៅរូបភាពបេះដូងទាំងមូល និងរក្សាទុកទៅក្នុងម៉េមូរី។

ចំពោះរូបភាពដែលបានផលិតដោយកម្មវិធីនោះគឺមានសភាពច្បាស់ដែលអាចឲ្យក្រុមគ្រូពេទ្យងាយស្រួលមើលដូចជាចលនាឈាមជុំវិញកំណកឈាមក្នុងសរសៃអាកទែរ។ ហើយថែមទាំងអាចប្រើដើម្បីវិភាគមើលពីការធ្លាយចេញឈាមជុំវិញសន្ទះបេះដូង និងវាយតម្លៃទៅលើការខូចខាតផងដែរ។

មិនត្រឹមតែអាចបង្កើតជារូបភាពបេះដូងនោះទេ កម្មវិធីនេះអាចប្រើដើម្បីស្គែនជំងឺសួត ជំងឺធាត់ ឬជំងឺដែលមានស្ថានភាពធ្ងន់ធ្ងរថែមទៀតផង៕