ឡូយ! គួច សុកុម្ភៈ ទៅជួបក្រុម Arsenal នៅសិង្ហបុរីជា Brand Ambassador របស់ Puma ដូចគ្នា

2015-07-16 19:12:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលដែលក្រុមកំពូលអង់គ្លេស Arsenal ធ្វើដំណើរមកប្រកួតពានមិត្តភាពនៅប្រទេសសិង្ហបុរី ប្រធានក្រុមជម្រើសជាតិកម្ពុជា និងជាសមាជិកក្លិបណាហ្គាវើល គួច សុកុម្ភៈ នឹងឡើងយន្តហោះទៅជួបពួកគេក្នុងនាមជាទូតសុឆន្ទៈរបស់ផលិតផលកីឡា Puma ដូចគ្នា។

សម្រាប់ការធ្វើដំណើរទៅជួបកីឡាកររបស់ក្រុមកាំភ្លើងធំនេះ គួច សុកុម្ភៈបានឲ្យដឹងថា នេះជាលើកទីមួយហើយដែលរូបគេនឹងបានជួបកីឡាករកំពូលលំដាប់ពិភពលោកដែលរូបលោកធ្លាប់តែឃើញតាមកញ្ចក់ទូរទស្សន៍។ លោកមានអារម្មណ៍រីករាយយ៉ាងខ្លាំងដែលមានឱកាសជួបនឹងកីឡាករល្អៗបែបនេះ។

លោកបន្ថែមថា នេះជាកត្តាមួយដ៏សំខាន់ដែលជំរុញទឹកចិត្តរបស់លោកឲ្យខិតខំប្រឹងប្រែងបន្ថែមទៀតសម្រាប់អាជីពបាល់ទាត់ ក៏ដូចជាកីឡាករផ្សេងៗឲ្យប្រឹងប្រែងហ្វឹកហាត់ដើម្បីក្លាយជាកីឡាករបាល់ទាត់អាជីព។ ទោះជាយ៉ាងណាលោកក៏មិនភ្លេចអរគុណដល់ក្រុមហ៊ុនផលិតផល Puma ប្រចាំនៅប្រទេសកម្ពុជា និងក្លិបណាហ្គាវើលដែលបានផ្តល់ឱកាសនេះដល់លោក។

លោក កុក កាន់រតនា ប្រធានក្រុមហ៊ុន Meta Sport ដែលជាអ្នកនាំចូលផលិតផល Puma ផ្តាច់មុខនៅប្រទេសកម្ពុជាបាននិយាយថា លោកចង់ឲ្យតំណាងផ្សព្វផ្សាយរបស់ Puma គឺគួច សុកុម្ភៈ និង ឃួន ឡាបូរ៉ាវីបានជួបជាមួយកីឡាករ Arsenal ដើម្បីឲ្យពួកគេកាន់តែមានទឹកចិត្ត កម្លាំងចិត្ត និងប្រឹងប្រែងបន្ថែមទៀតសម្រាប់អាជីពបាល់ទាត់របស់ពួកគេ។

លោកថា ៖«នេះជាការជំរុញទឹកចិត្តមួយដល់គួច សុកុម្ភៈ។ គាត់កាន់តែសប្បាយចិត្ត កាន់តែប្រឹងប្រែង ហើយអាជីពបាល់ទាត់របស់គេកាន់តែរីកចម្រើន ហើយជាមាគ៌ាមួយផ្សាភ្ជាប់រវាងកីឡាករបាល់ទាត់កម្ពុជា នឹងកីឡាករលំដាប់ពិភពលោក។ ប៉ុន្តែគួរឲ្យសោកស្តាយចំពោះ ឃួន ឡាបូរ៉ាវី ព្រោះគាត់ជាប់ប្រកួតឲ្យបឹងកេតអង្គរ មិនអាចទៅបាន តែយើងនឹងប្រឹងប្រែងធ្វើអ្វីបន្ថែមទៀតសម្រាប់ពួកគាត់»។

គួច សុកុម្ភៈដែលរួមដំណើរជាមួយប្រធានក្រុមហ៊ុន Meta Sport នឹងធ្វើដំណើរទៅប្រទេសសិង្ហបុរីនៅថ្ងៃសុក្រ ទី១៧ ខែកក្កដានេះ ហើយគ្រោងនឹងជួបសមាជិក Arsenal ពីរនាក់គឺខ្សែការពារលេខ១៨ Nacho Monreal និងលេខ២៤ Hector Bellerin ដែលពួកគេទាំងពីរនាក់សុទ្ធតែជាកីឡាករអេស្ប៉ាញ។

សមាជិកណាហ្គាវើលរូបនេះបានចុះកុងត្រារយៈពេលពីរឆ្នាំធ្វើជាទូតសុឆន្ទៈ (Brand Ambassador)ឲ្យផលិតផលកីឡា Puma ប្រចាំនៅប្រទេសកម្ពុជា។ Puma ជាអ្នកឧបត្ថម្ភក្លិបកាំភ្លើងធំ Arsenal ដែលសមាជិកទាំងអស់របស់ក្លិបអង់គ្លេសមួយនេះសុទ្ធតែជាទូតសុឆន្ទៈដូចប្រធានក្រុមជម្រើសជាតិកម្ពុជារូបនេះដែរ។

កាលពីយប់មិញសម្រាប់ការប្រកួតទី១ Arsenal បានបំបាក់ក្រុមម្ចាស់ផ្ទះសិង្ហបុរីដោយលទ្ធផល ៤-០ ហើយនៅថ្ងៃសៅរ៍ ទី១៨ខាងមុខនេះ Arsenal នឹងប៉ះក្រុម Everton នៅវគ្គផ្តាច់ព្រ័ត្រដែលជាពេល គួច សុកុម្ភៈ ត្រូវចូលរួមទស្សនាមុនពេលត្រឡប់មកប្រទេសកំណើតវិញ៕

សូមទស្សនាវីដេអូរបស់ គួច សុកុម្ភៈ