អ្នកកំប្លែងអង់គ្លេស បាចដុល្លារក្លែងក្លាយដាក់ប្រធាន FIFA

2015-07-21 15:58:35
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាងកំប្លែងអង់គ្លេសម្នាក់ឈ្មោះ Simon Brodkin ត្រូវបានប៉ូលិសឃាត់ខ្លួន បន្ទាប់ពីលោកបានឡើងទៅលើវេទិកា រួចបាចលុយដុល្លារក្លែងក្លាយដាក់ប្រធាន FIFA លោក Sepp Blatter អំឡុងពេលធ្វើសន្និសីទកាសែតនៅប្រទេសស្វីស។

លោក Sepp Blatter បានរៀបចំធ្វើសន្និសីទកាសែតមួយនៅប្រទេសស្វីសដោយបានអញ្ជើញអ្នកកាសែតចូលរួមយ៉ាងច្រើនកុះករ។ ខណៈពេលនោះគេក៏ឃើញមានវត្តមានរបស់តារាកំប្លែងម្នាក់ឈ្មោះ Simon Brodkin ចូលរួមផងដែរ។ តារាកំប្លែងដែលមានរហស្សនាមថា Lee Nelson រូបនេះ គ្រាន់ទៅដល់ភ្លាម បានរត់ឡើងទៅលើវេទិកាភ្លែត ដោយនិយាយថា រីករាយណាស់ដែលបានមកចូលរួមប្រជុំជាមួយលោក Sepp Blatter ។ នេះជាប្រាក់មួយចំនួនដើម្បីបង្កើតព្រឹត្តិការណ៍ World Cup ២០២៦ នៅប្រទេសកូរ៉េខាងជើង។

គ្រាន់តែនិយាយចប់ប៉ុណ្ណឹង ក្រុមសន្តិសុខក៏បានឡើងមកចាប់រូបគេចេញ ហើយគ្រានោះ Simon ក៏បានបាចលុយក្លែងក្លាយទៅកាន់លោក Sepp តែម្ដង។ បន្ទាប់ពីរឿងអាក្រក់នេះកើតឡើង សន្និសីទកាសែតក៏ត្រូវផ្អាកបន្តិចសិន ដោយឱ្យអ្នកសំអាតមកបោសលុយនោះចេញ។ ក្រោយផ្អាកអស់១០នាទី ប្រធាន FIFA វ័យ៧៩ឆ្នាំរូបនេះបាននិយាយថានេះជារឿងមិនល្អនោះទេ ហើយវាគ្រាន់តែជាអំពើរបស់មនុស្សខ្វះចំណេះដឹងប៉ុណ្ណឹង។

បច្ចុប្បន្នលោក Simon Brodkin ត្រូវបានប៉ូលិសចាប់ខ្លួនហើយ ប៉ុន្តែមិនទាន់ដឹងថាមានវិធានការអ្វីចំពោះទង្វើរបស់តារាកំប្លែងអង់គ្លេសរូបនេះនៅឡើយទេ៕